ម្រេចកំពតកំពុងតែជួបនូវបញ្ហាធ្ងន់ ដោយមិនអាចនាំចេញទៅក្រៅប្រទេសបាន ព្រោះតែការរីករាលដាលនៃជំងឺ COVID-19 ដែលតម្រូវឲ្យម្ចាស់ចំការម្រេចទាំងអស់ត្រូវបង្ខំចិត្តហាលម្រេចស្ដុកទុក និងរង់ចាំការថមថយទៅវិញនៃជំងឺ COVID-19 នេះ។
យោងតាមលោក ងួន ឡាយ ប្រធានសមាគមម្រេចកំពត បាន្យដឹងថា ចាប់តាំងពីមានការផ្ទុះជំងឺ COVID-19 មក ម្រេចកំពតមិនអាចលក់ចេញបាននោះទេ ទាំងទីផ្សារក្នុងស្រុក និងក្រៅស្រុក។ បើគិតកាលពីឆ្នាំ២០១៩ យើងអាចលក់បានរហូតដល់ទៅ ៧៨តោនឯណោះ។ សម្រាប់ទីផ្សារក្នុងស្រុកគឺអ្នកទិញភាគច្រើនជា ភ្ញៀវទេសចរ និងភោជនីយដ្ឋានធំៗ ប៉ុន្តែឥឡូវគឺស្ងាត់សូន្យតែម្ដង។
លោក ងួន ឡាយ បានបន្តទៀតថា តាមការប៉ាន់ស្មាន គិតមកទល់ពេលនេះ ម្រេចកំពតដែលនៅសល់លក់មិនដាច់មានចំនួនប្រមាណជិត ១០០តោន ខណៈកាលពីឆ្នាំមុន ម្រេចកំពតទទួលបានទិន្នផលជាង ១២០តោន។ ចំពោះមូលហេតុដែលធ្វើឲ្យម្រេចមិនអាចលក់ចេញបានគឺ ប្រទេសដែលធ្លាប់តែជាទីផ្សារនាំចេញម្រេចបាននឹងកំពុងបន្តជួបនូវបញ្ហាដោយសារ COVID-19 ដែលធ្វើឲ្យគ្មានតម្រូវការម្រេច ជាពិសេសគឺការរឹតត្បឹតការធ្វើដំណើរនៅប្រទេសមួយចំនួនផងដែរ។ មិនតែប៉ុណ្ណោះ បើជំងឺនេះនៅតែអូសបន្លាយយូរទៀត ម្ចាស់ចម្ការភាគច្រើនអាចនឹងត្រូវក្ស័យធន លែងមានទុនមកធ្វើចម្ការម្រេចបន្តទៅទៀតហើយ។
លោកក៏បានបញ្ជាក់ទៀតថា តម្លៃម្រេចកំពតគឺមានតម្លៃ ១៥ដុល្លារក្នុងមួយគីឡូក្រាម សម្រាប់ប្រភេទម្រេចខ្មៅ, ២៥ដុល្លារ សម្រាប់ម្រេចក្រហម និង ២៨ដុល្លារក្នុងមួយគីឡូ សម្រាប់ម្រេចស។ សម្រាប់ទីផ្សារនាំចេញម្រេចកំពតកាលពីពេលកន្លងមក គឺភាគច្រើនជាប្រទេសស្ថិតក្នុងតំបន់អឺរ៉ុប និងអាមេរិក។
ទោះបីជាយ៉ាងនេះក្ដី ក៏ទីផ្សារម្រេចនៅខេត្តត្បូងឃ្មុំ និងកំពង់ចាម នៅតែមានការទិញលក់ធម្មតា ដោយមានតម្លៃចន្លោះពី ៦,៦០០រៀល ទៅ ៦,៩០០រៀលក្នុងមួយគីឡូក្រាម ខណៈដែលកាលពីឆ្នាំ២០១៩ ម្រេចមួយគីឡូអាចលក់បានក្នុងតម្លៃជាង ៨,០០០រៀលឯណោះ។ នេះបើយោងតាមការបញ្ជាក់ដោយលោក ប៊ុន សុវណ្ណរិទ្ធ ដែលជាឈ្មួញទិញម្រេចនៅស្រុកមេមត់ ខេត្តត្បូងឃ្មុំ។
គូសបញ្ជាក់បន្ថែមថា ក្នុងរយៈពេល ៣ខែ ២៨ថ្ងៃ ក្នុងឆ្នាំ២០២០នេះ ម្រេចចំនួនជាង ២,០០០តោន បាននាំចេញទៅកាន់បណ្ដាប្រទេសជាច្រើន ពិសេសប្រទេសក្នុងតំបន់អឺរ៉ុប។ នេះបើយោងតាមរបាយការណ៍របស់ក្រសួងកសិកម្ម។
អត្ថបទដោយ៖ Nevin
ប្រភព៖ ក្នុងស្រុក
