We TV Cambodia

មនុស្ស​ស្លាប់​កើន​ដល់ ៧ នាក់ នៅ​ក្នុង​ហេតុការណ៍​​បាក់​អគារកំពុង​សាងសង់​​នៅ​ខេត្តកែប

មនុស្ស​ស្លាប់​កើន​ដល់ ៧ នាក់ នៅ​ក្នុង​ហេតុការណ៍​​បាក់​អគារកំពុង​សាងសង់​​នៅ​ខេត្តកែប
រូបថតៈ Facebook លោក​នាយក​​រដ្ឋ​មន្ត្រី​ ហ៊ុន សែន

ដោយៈ ទិន សុខាវុធ

ចំនួន​មនុស្ស​ស្លាប់​បាន​កើន​ដល់​ ៧ នាក់​ហើយ រហូត​មក​ដល់​ម៉ោង ៤ ព្រឹក​​ នៅ​ថ្ងៃ​ទី ៤ ខែ មករា ឆ្នាំ ២០២០ នេះ នៅ​ក្នុង​​​​ហេតុការណ៍​បាក់​​រលំ​អគារ​​កំពុង​ត្រូវ​បាន​សាងសង់​មួយ​នៅ​ខេត្ត​កែប​ កាល​ពី​ម្សិលម៉ិញ​នេះ​។

សាកសព​ជន​រងគ្រោះត្រូវ​បាន​កាយ​រក​ឃើញ ដោយ​ក្រុម​អ្នក​ជួយ​សង្គ្រោះ​ដោយ​ប្រើប្រាស់​យានយន្ត​កាយ​ថ្មធុន​ធំ​ប្រភេទ excavator នៅ​ក្រោម​ការត្រួតពិនិត្យ​របស់​លោក​នាយក​រដ្ឋ​មន្ត្រី ហ៊ុន សែន ដោយ​ផ្ទាល់​។

យោង​តាម​លោក ប៉ែន តារា ដែលជា​មន្ត្រី​នគរបាល​ប្រចាំ​ខេត្ត​កែប ជន​រងគ្រោះ​ចំនួន ១៨ នាក់​ត្រូវ​​បាន​ជួយ​សង្គ្រោះ​ពី​សំណង់​បែកបាក់​នោះ​ និងត្រូវ​​បានបញ្ជូន​ទៅមន្ទីរពេទ្យ​ហើយ​​។ ភាគ​ច្រើននៃ​ជន​រងគ្រោះ​ទាំងនោះ ស្ថិត​ក្នុង​ស្ថានភាពធ្ងន់ធ្ងរ​។

លោក​ ប៉ែន តារា ​បាន​បន្ថែម​ទៀត​​ថា នៅ​ក្នុង​អគារ​ដែល​កំពុង​ត្រូវ​បាន​សាងសង់​នោះ មាន​កម្មករ​សំណង់​សរុប​ទាំងអស់​ ៤០ រស់នៅ​និង​ធ្វើការ​នៅ​ទីនោះ​ ដែល​ជា​ប្រការ​មួយ​បំពាន​ទៅ​លើ​ការហាមឃាត់ ចាប់តាំង​ពី​ហេតុការណ៍​បាក់​រលំ​អគារ​នៅ​ខេត្ត​ព្រះ​សីហនុ​​៕

Related Articles