ដោយ៖ពេជ្រ
មណ្ឌលគិរី៖ ភ្នំឡែងកៅ គឺជាតំបន់ទេសចរណ៍ធម្មជាតិ ដែលមានទឹកជ្រោះដ៏ទាក់ទាញ មិនចាញ់ទឹកជ្រោះប៊ូស្រានោះទេ។ធនធានធម្មជាតិ និងជីវៈចម្រុះសំបូរបែបដែលទាក់ទាញរួមមាន៖ ទឹកធ្លាក់ច្រើនដំណាក់បង្កើតបានជាសំលេងធម្មជាតិយ៉ាងពិរោះរណ្ដំ។
បើតាម ទិដ្ឋភាពជាក់ស្ដែង ទឹកត្រជាក់ដូចទឹកអម្រិតហូរកាត់ផ្ទាំងថ្មដា រួមផ្សំជាមួយសម្រែកសត្វទោច(ប្រភេទសត្វដែលមានតម្លៃអភិរក្ស) និងបក្សាបក្សី។ សម្រស់ធម្មជាតិ នៃ ព្រៃស្រោងសើមដុះតាម ជ្រលងភ្នំ សងខាងមាត់ជ្រោះ លប់ទៅដោយដើមស្លាព្រៃ និងរុក្ខជាតិតិណ្ណជាតិគួរឱ្យចង់ទៅលេងកំសាន្ត។
បើនិយាយពីសណ្ឋានដី និងភូមិសាស្ត្រ ទីនោះជាតំបន់ភ្នំមានសោភ័ណភាពទាក់ទាញ ប៉ុន្តែនៅមិនទាន់ដឹងថាជាប្រភេទថ្មអ្វី។ ចំណែកផ្នែកតម្លៃប្រវត្តិសាស្ត្រ និងវប្បធម៌វិញ នៅទីនោះ មានជនជាតិដើមភាគតិចព្នង ដែលតែងតែជឿថាតំបន់ភ្នំឡែងកៅមានភាពស័ក្តសិទ្ធ។
ចំណែក ទឹកជ្រោះឡែងកៅ ជាឈ្មោះ ដែលហៅតាមព្រៃអារក្ស ឬ ព្រៃតំណមរបស់ជនជាតិដើមភាគតិច និងនៅមានរឿងរ៉ាវជាច្រើនដែលមិនទាន់ដឹងអស់នៅទីនោះ។
តាមរយៈ ក្រសួងបរិស្ថាន បានឲ្យដឹងថា លក្ខណៈពិសេសរបស់ព្រៃភ្នំសក្ការៈបូជានេះ បូកនឹងការប្រឈមនឹងការកាប់រុករាន និងដុតដីព្រៃដើម្បីធ្វើចម្ការអាចធ្វើឱ្យប្រព័ន្ធអេកូឡូស៊ីតំបន់ព្រៃភ្នំនេះប្រែប្រួល។ ភ្នំនេះ ស្ថិតនៅភូមិអណ្តូងក្រឡឹង ឃុំសែនមនោរម្យ ក្នុងស្រុកអូររាំង ខេត្តមណ្ឌលគិរី ។ ទឹកជ្រោះមានចម្ងាយ១ គីឡូម៉ែត្រ ពីផ្លូវជាតិលេខ៧៦ ត្រង់ផ្លូវបត់ចូលទៅទឹកជ្រោះមានចម្ងាយ៣៤៥ គ.ម ពីរាជធានីភ្នំពេញ ឬហួសស្នាក់ការអូររាំង នៃដែនជម្រកសត្វព្រៃកែវសីមាប្រមាណ១គ.ម នៅខាងស្តាំដៃ ឬ ២៦ គ.ម ពីក្រុងសែនមនោរម្យ នៅខាងឆ្វេងដៃ។
សូមបញ្ជាក់ដែរថា រដ្ឋាភិបាលបានចេញលិខិតលេខ ៨៣អនក្រ.បក ចុះថ្ងៃទី០៩ ខែឧសភា ឆ្នាំ២០១៦ ឱ្យក្រសួងបរិស្ថានរៀបចំបង្កើតជាដែនជម្រកសត្វព្រៃកែវសីមា លើផ្ទៃដី២៩២,៦៩០ហិកតា គ្របដណ្តប់ភ្នំឡែងកៅ សម្រាប់ទុកជាកេរ្តិ៍មរតកមនុស្សគ្រប់ជំនាន់។
ជាមួយគ្នានេះដែរ ជនជាតិដើមភាគតិចព្នង បាននិងកំពុងចូលរួមថែរក្សាការពារព្រៃភ្នំសក្ការៈបូជានេះ សម្រាប់កូនចៅពួកគាត់គ្រប់ជំនាន់ និងមានគម្រោងស្នើសុំក្រសួងបរិស្ថានថែរក្សាការពារផងដែរ៕
