We TV Cambodia

មជ្ឈមណ្ឌលស្រាវជ្រាវបច្ចេកវិទ្យា IT ដ៏ទំនើប នឹងត្រូវសង់រួចនៅឆ្នាំ ២០២១

មជ្ឈមណ្ឌលស្រាវជ្រាវបច្ចេកវិទ្យា IT ដ៏ទំនើប នឹងត្រូវសង់រួចនៅឆ្នាំ ២០២១
រូបថតៈ NIPTICT

ដោយៈ ទិន សុខាវុធ

មជ្ឍមណ្ឌល​ស្រាវជ្រាវ​បច្ចេកវិទ្យា​ IT ដ៏ទំនើប​ថ្មី​មួយ​ រប​ស់វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន (NIPTICT) នឹងត្រូវ​សាងសង់​រួច​នៅ​ក្នុង​រយពេល ១៨ ខែ ពោល​គឺ​នៅ​ក្នុង​ឆ្នាំ ២០២១ ខាង​មុន​នេះ​។

យោង​តាម​គេហទំព័រ​របស់ NIPTICT កាល​ពី​សប្តាហ៍​មុន ពិធីក្រុង​ពាលី​បញ្ចុះ​បឋម​សិលា​សាងសង់​អគារមជ្ឍមណ្ឌល​ស្រាវជ្រាវ​បច្ចេកវិទ្យា​ IT ថ្មី​នេះ​ ដែល​នឹងមាន​ឈ្មោះ​ថា «Tech Center» ត្រូវ​បានប្រារព្ធឡើង​ក្រោម​អធិបតី​ភាព ឯកឧត្តម ត្រាំ អ៊ីវតឹក រដ្ឋ​មន្ត្រី​ក្រសួង​ប្រៃណីយ៍​និង​ទូរគមនាគមន៍​ និងតំណាងរបស់ក្រុមហ៊ុន Metfone ដែល​ជា​ដៃ​គូ​ដ៏​សំខាន់​មួយ​ក្នុង​ការ​ផ្តល់​ការប្រឹក្សា​ផ្តល់យោបល់ទាក់ទង​នឹង​បច្ចេកវិទ្យា IT ។

NIPTICT បានបន្ថែម​ទៀត​ថា មជ្ឍមណ្ឌល​​បច្ចេកវិទ្យា​មួយ​នេះ បាននិង​កំពុង​សង់​ឡើង​ដោយ​ប្រើប្រាស់​ថវិកា​របស់​មូលនិធិ​នៃ​ការកសាង​សមត្ថភាព ​និង​ការស្រាវជ្រាវ​​អភិវឌ្ឍ​លើ​វិស័យ​ប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន ហៅ​កាត់​​ថា​ «មូលនិធិ ស.អ» ដែល​​បានមក​ពី​ការផ្តល់វិភាគទាន​​ពីសំណាក់ប្រតិបត្តិករទូរគមនាគមន៍ទាំងឡាយ ដែល​ច្បាប់​តំរូវ​អោយ​បង់វិភាគ​ទាន​ចំនួន ១% នៃ​ប្រាក់ចំណូល​ដុល​របស់​​ពួក​គេ​ ចូល​ទៅ​ក្នុង​មូលនិធិ​នេះ​។

មជ្ឍមណ្ឌល​ស្រាវជ្រាវ​បច្ចេកវិទ្យា IT «Tech Center» នឹង​មាន​កំពស់ ៤ ជាន់ ​នៅ​លើ​ផ្ទៃ​ដី​ទំហំ ៣,៨០០ ម៉ែត្រ​ក្រឡា​។ វា​​នឹង​ក្លាយ​ជា​មជ្ឍមណ្ឌលស្រាវជ្រាវ​ឌីជីតល់​​ ដំបូង​គេ​បង្អស់​នៅ​កម្ពុជា​។

យ៉ាង​ណា​ម៉ិញ មជ្ឍមណ្ឌល​នេះ​កើត​ឡើង​ពី​កិច្ច​រួម​សហការ​​យ៉ាង​ជិតស្និទ្ធិ​រវាង NIPITCT ជាមួយ​នឹង​ក្រុមហ៊ុន Viettel ដែល​ជា​ក្រុមហ៊ុនមេ របស់​ក្រុមហ៊ុន​​សេវា​ទូរស័ព្ទវៀតណាម​​ Metfone ​នៅ​កម្ពុជា​។

និយាយ​​អោយ​ចំ មជ្ឍមណ្ឌល «Tech Center» នឹង​ត្រូវ​ប្រើប្រាស់​សំរាប់​បណ្តា​ការស្រាវជ្រាវ​ទាំងឡាយ​ណា ដែលទាក់ទង​នឹង​វិស័យ​បញ្ញា​សប្បនិម្មិត (AI) វិទ្យាសាស្ត្រ​ទិន្នន័យ (Data Science) ) អ៊ិនធឺណិតនៃវត្ថុ(IoT) បច្ចេកវិទ្យាពពក (Cloud Computing) សុវត្ថិភាពអ៊ិនធឺណិត (Cybersecurity) រដ្ឋាភិបាល​ឌីជីតល់ (GovTech) បច្ចេកវិទ្យាសម្រាប់អប់រំ (EduTech) បច្ចេកវិទ្យាសម្រាប់កសិកម្ម (AgriTech) បច្ចេកវិទ្យាសម្រាប់ហិរញ្ញវត្ថុ (FinTech) បច្ចេកវិទ្យាសម្រាប់សុខាភិបាល (HealthTech) ជាដើម​៕

Related Articles