We TV Cambodia

ភ្នាក់ងារពាណិជ្ជកម្មនៅអាមេរិកព្រមានឱ្យប្រុងប្រយ័ត្នជាមួយនឹងការក្លែងបន្លំ (Phishing) ថាជាក្រុមហ៊ុន Zoom

ភ្នាក់ងារពាណិជ្ជកម្មនៅអាមេរិកព្រមានឱ្យប្រុងប្រយ័ត្នជាមួយនឹងការក្លែងបន្លំ (Phishing) ថាជាក្រុមហ៊ុន Zoom

សម្រួលអត្ថបទ៖ រដ្ឋ ស្រីពេជ្រ

បើតាមការផ្សព្វផ្សាយឱ្យដឹងពី នាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថាភ្នាក់ងារពាណិជ្ជកម្ម (Better Business Bureau BBB) នៅសហរដ្ឋអាមេរិកបានធ្វើការព្រមានកាលពីសប្តាហ៍កន្លងទៅដល់អ្នកប្រើប្រាស់កម្មវិធី Zoom ឱ្យមានការប្រុងប្រយ័ត្នជាមួយនឹងសារដែលជនអនាមិកបានផ្ញើតាមរយៈអុីមែល និងបណ្ដាញទំនាក់ទំនងសង្គមមួយចំនួនដែលក្លែងបន្លំធ្វើជាសារមកពីក្រុមហ៊ុន Zoom ដើម្បីលួចចូលក្នុងគណនីរបស់អ្នកប្រើប្រាស់។

បន្ថែមពីនេះ នៅក្នុងការវាយប្រហារនេះជនអនាមិកបានផ្ញើសារទៅឱ្យអ្នកប្រើប្រាស់ ដោយមានប្រើនិមិត្តសញ្ញាផ្លូវការរបស់ក្រុមហ៊ុន Zoom ថែមទាំងមានភ្ជាប់ជាមួយនូវឃ្លាព្រមានមួយចំនួនដូចជា “គណនី Zoom របស់លោកអ្នកត្រូវបានផ្អាកដំណើរការ ចុចទីនេះដើម្បីចាប់ផ្ដើមដំណើរការឡើងវិញ” ឬ “លោកអ្នកបានអវត្តមានក្នុងការប្រជុំ ចុចទីនេះដើម្បីទទួលបានព័ត៌មានលម្អិត” ជាដើម។ បើតាមការផ្សព្វផ្សាយរបស់ភ្នាក់ងារនេះ ក្រុមជនអនាមិកបានបង្កើតគណនីអុីមែលដែលមានអាសយដ្ឋានបង្កប់ជាមួយនឹងពាក្យ Zoom ចំនួនប្រមាណ២៤៤៩ កាលពីខែមេសានិងឧសភា ដើម្បីអាចផ្ញើអុីមែលដែលមើលទៅស្រដៀង ឬដូចគ្នានិងអុីមែលមកពីក្រុមហ៊ុនពិតប្រាកដ។

ទោះបីជានាយកដ្ឋានពុំទាន់បានឃើញករណីនេះកើតមានឡើងច្រើននៅក្នុងប្រទេសកម្ពុជាយើងក៏ដោយ ប៉ុន្តែនាយកដ្ឋាននៅតែចង់ឱ្យលោកអ្នកមានការប្រុងប្រយ័ត្ននៅពេលដែលទទួលបានសារណាមួយ ដែលលោកអ្នកមិនបានស្នើសុំនោះ។ ក្នុងករណីដែលលោកអ្នកទទួលបានសារស្រដៀងគ្នានេះ សូមលោកអ្នកកុំចុចនៅលើតំណភ្ជាប់ដែលមាននៅក្នុងសារនោះ ហើយសូមលោកអ្នកធ្វើការទំនាក់ទំនងទៅក្រុមហ៊ុនដោយផ្ទាល់ដើម្បីទទួលបានព័ត៌មានវិញ៕

ប្រភព៖ នាយកដ្ឋានប្រឆាំងបទល្មើសបច្ចេកវិទ្យា

 

Related Articles