We TV Cambodia

ព្រលានយន្តហោះអន្តរជាតិភ្នំពេញថ្មីតំលៃ $1,500 លានដុល្លារអាចត្រូវសង់រួចនៅឆ្នាំ ២០២៣

ព្រលានយន្តហោះអន្តរជាតិភ្នំពេញថ្មីតំលៃ $1,500 លានដុល្លារអាចត្រូវសង់រួចនៅឆ្នាំ ២០២៣

ដោយៈ ទិន សុខាវុធ

ព្រលាន​យន្តហោះអន្តរជាតិថ្មីមួយ​ទៀត ​ត្រូវបាន​សម្ពោធ​បើក​ការដ្ឋាន​សាង​សង់​ហើយ
ក្នុង​ទឹកដីនៃ​ខេត្ត​កណ្តាលនិងខេត្តតាកែវ នៅ​ក្រោម​ទុន​វិនិយោគ​ប្រមាណ​ជា $1,500 លានដុល្លារ។
ការសាងសង់​ព្រលានយន្តហោះ​អន្តរជាតិ​ថ្មីនេះ គ្រោង​នឹង​ត្រូវ​បញ្ចប់​នៅ​ឆ្នាំ ២០២៣

លោក​ឧកញ៉ា​ពុង​
ឃា​វសែ​ អគ្គនាយក​ក្រុមហ៊ុនវិនិយោគទុន អាណិកជនកម្ពុជា​ (OCIC​)
បាន​ថ្លែង​អោយ​ដឹង​ថា ការសាងសង់​ព្រលាន​យន្តហោះ​នេះ​ ​បាន​ដំណើរការ​​ទៅ​បាន​ល្អ ដោយ​ក្រុមហ៊ុន​របស់​លោក​មិន​សូវ​ជា​បានជួប​នឹងបញ្ហា​ដីធ្លី​ជាមួយ​នឹងប្រជាពលរដ្ឋ​រស់​នៅ​ក្នុង​តំបន់​​​នោះ​ប៉ុន្មាន​​ទេ​។

ព្រលាន​យន្តហោះថ្មីនេះ​ ជា​គំរោង​វិនិយោគ​រួម​គ្នា
រវាង​រាជ​រដ្ឋាភិបាល​ និង​ក្រុមហ៊ុន OCIC ដោយ​រាជរដ្ឋាភិបាល​កាន់កាប់​ភាគហ៊ុន​ប្រមាណ ១០
ភាគ​រយ ហើយ​ក្រុមហ៊ុន OCIC កាន់កាប់​ភាគហ៊ុន ៩០ ភាគរយ​។ នៅ​ក្នុង​ទុនវិនិយោគ​ប្រមាណ
$1,500 លាន​ដុល្លារ​នោះ
$1,100 លាន​ដុល្លារ
ជា​កំចី​ពី​ធនាគារ​បរទេស  $280 លាន​ដុល្លារ​ទៀត
ជា​ទុនវិនិយោគ​របស់ OCIC និង $280 លាន​ដុល្លារ​ទៀត​ជា​ដើម​ទុន​ចុះ​បញ្ជី​។

យោង​​តាម​រាជ​រដ្ឋាភិបាល ព្រលានយន្តហោះ​ថ្មីនេះ ត្រូវ​សង់ឡើង​នៅ​ផ្ទៃដី​ទំហំ​ប្រមាណជា
២,៦០០ ហិកតា ដែល​ជា​ដី​ស្ថិត​ក្នុង​ក្រុង​តាខ្មៅ ស្រុក​កណ្តាល​ស្ទឹង​ក្នុង​ខេត្តកណ្តាល
ហើយ​ក៏​អាច​ប៉ះពាល់​ផង​ដែរ​​ដល់តំបន់​មូយ​ចំនួន​ស្ថិត​ក្នុង​ស្រុក​បាទី​ក្នុង​ខេត្តតាកែវ​។

យោង​តាម​លោក​ឧកញ៉ា​ ពុង​ ឃា​វសែ ព្រលាន​យន្តហោះ​ថ្មី​នេះ ស្ថិត​ក្នុង​ប្រភេទ​ 4F ដែល​ជា​ប្រភេទ​ព្រលាន​យន្តហោះ​ខ្នាតធំ ដែល​អាច​អនុញ្ញាត​អោយ​យន្តហោះ​ធុនធំ​ហោះ​ឆ្លង​ទ្វីប​ដូចជា​យន្តហោះ​ប្រភេទ Airbus​ A380​-800​ និង​ យន្តហោះ​ Boeing​ 747​-800​ អាច​ចុះចត​នៅ​លើ​នោះ​​បាន​​ដោយ​គ្មាន​បញ្ហា​អ្វី​ឡើយ​៕

Related Articles