We TV Cambodia

ពលរដ្ឋសង្ឃឹមថា ក្រុមហ៊ុនថ្មីមានសមត្ថភាពនិងការទទួលខុសត្រូវជាងក្រុមហ៊ុន CINTRI

ពលរដ្ឋសង្ឃឹមថា ក្រុមហ៊ុនថ្មីមានសមត្ថភាពនិងការទទួលខុសត្រូវជាងក្រុមហ៊ុន CINTRI
រូបថតៈ Facebook ក្រុមហ៊ុន CINTRI

ដោយៈ ទិន សុខាវុធ

ក្រោយ​ពី​លោកនាយក​រដ្ឋ​មន្ត្រី ហ៊ុន សែន បាន​ប្រកាស​ទិញ​សិទ្ធិ​ពី​ក្រុមហ៊ុន CINTRI មកវិញ ក្នុង​ការប្រមូល​សំរាម​នៅ​ក្នុង​ទីក្រុង​ភ្នំពេញ ប្រជាពលរដ្ឋ​ជាច្រើន​បាន​អបអរ​សាទរ​ ព្រម​ទាំង​សង្ឍឹម​ថា​ ក្រុមហ៊ុន​ថ្មី​ៗ​ទៀត​នឹង​មាន​សមត្ថភាព​ជាង​ក្រុមហ៊ុន​ CINTRI​ ក្នុង​ការប្រមូល​សំរាម​នៅ​​ក្នុង​រាជ​ធានី​ភ្នំពេញ​។

មួយវិញទៀត ប្រជាពលរដ្ឋ​បាន​ទទូច​អោយ​រាជ​រដ្ឋាភិបាល​ ធ្វើយ៉ាងណា​អនុញ្ញាត​អោយ​ក្រុមហ៊ុន​ផ្សេង​ៗ​ទៀត អាច​ចូល​រួម​ដេញ​ថ្លៃប្រមូល​សំរាម ប្រកប​ដោយ​តំលា​ភាព​។

ការប្រកាស​ទិញ​សិទ្ធិ​ពី​ក្រុមហ៊ុន​ CINTRI មកវិញ​នេះ ត្រូវ​បាន​លោកនាយករដ្ឋ​មន្ត្រី​ធ្វើ​ឡើង​ កាលពីថ្ងៃ​ទី ២២ ខែ​ តុលា ឆ្នាំ ២០១៩ នៅ​ក្នុង​ពិធី​ប្រគល់​សញ្ញាប័ត្រ​ដល់​និសិត្ស​ជាង​ ៤,០០០ នាក់ មកពី​សាកលវិទ្យាល័យ Build Bright នៅរាជ​ធានី​ភ្នំពេញ​។

យោងតាម​សម្តេច​ ហ៊ុន សែន បន្ទាប់​ពី​ការទិញ​សិទ្ធិ​ប្រមូល​សំរាម​យក​មកវិញ​ រាជរដ្ឋាភិបាលត្រូវ​ទទួល​កាន់កាប់សិទ្ធិនេះ​ជាបណ្តោះអាសន្ន​សិន មុន​នឹង​ត្រូវ​ដាក់​អោយ​ក្រុមហ៊ុន​ផ្សេង​ៗ​ទៀត​​ដេញ​ថ្លៃ​យក​សិទ្ធិនេះ​ទៅធ្វើ​អាជីវកម្ម​។ ហើយ​សិទ្ធិ​នេះ​នឹងត្រូវ​ប្រគល់​អោយ​ទៅ​ក្រុមហ៊ុនយ៉ាង​តិច​ពី​ ៣ ទៅ ៤ ក្រុមហ៊ុន ក្នុង​ការប្រមូល​សំរាម​នៅ​រាជ​ធានី​​ភ្នំពេញ​។

ទន្ទឹម​នឹង​នេះ លោកនាយក​រដ្ឋ​មន្ត្រី​ក៏​បាន​ជំរុញ​អោយ​ធ្វើការ​សិក្សា ​ទៅលើលទ្ធភាពបង្កើត​រោង​​ចក្រ​ផលិត​ថាមពលអគ្គិសនី​ពី​សំរាម​ផងដែរ​ ក្នុង​គោលដៅ​ជួយ​កាត់​បន្ថយបរិមាណ​សំរាមនៅ​ទីក្រុង​ភ្នំពេញ​។

ទាក់ទងនឹងរឿង​នេះ កន្លង​មក ប្រជាពលរដ្ឋ​រស់​នៅ​ក្នុង​រាជ​ធានី​ភ្នំពេញ មិនពេញចិត្ត​នឹង​សេវា​ប្រមូល​សំរាម​របស់​ក្រុមហ៊ុន CINTRI ឡើយ​។ ព្រោះ​ជា​រឿយ​ៗ គេ​សង្កេត​ឃើញមានការកកស្ទះសំរាម​ ស្ទើរគ្រប់​ទី​កន្លែង​ទាំងអស់ បណ្តាលមកពី​ក្រុមហ៊ុន CINTRI ត្រូវ​អាក់ខាន​ក្នុង​ការប្រមូល​សំរាម ដោយ​មក​ពី​បុគ្គលិក​និង​កម្មករ​ធ្វើ​កូដកម្ម​ជាដើម​។

មួយវិញ​ទៀត ការប្រមូល​សំរាម​របស់​ក្រុមហ៊ុន CINTRI មិន​ត្រឹមត្រូវ​តាម​ស្តង់ដារ​អនាម័យ​នោះទេ ព្រោះ​គេតែងតែ​​ឃើញ​មាន​​ទឹក​ស្អុយ​កខ្វក់​ហូរ​​​ចេញ​ពី​សំរាម ស្រក់​ចេញ​ពី​រថយន្ត​ដឹក​សំរាម​របស់​ក្រុមហ៊ុន នៅ​តាម​ផ្លូវ​ នៅ​ពាស​ពេញ​រាជ​ធានីភ្នំពេញ​៕

Related Articles