We TV Cambodia

ពលរដ្ឋម៉ូស្លីមជាង៨ពាន់នាក់ ជុំគ្នា ប្រារព្ធពិធីសាសនា ​នៅប្រទេស​ឥណ្ឌូណេស៊ី ដោយមិនខា្លច Covid -19

ពលរដ្ឋម៉ូស្លីមជាង៨ពាន់នាក់ ជុំគ្នា ប្រារព្ធពិធីសាសនា ​នៅប្រទេស​ឥណ្ឌូណេស៊ី ដោយមិនខា្លច Covid -19
រូបភាពឯកសារ

កាលពីថ្ងៃពុធកន្លងទៅ នៅប្រទេសឥណ្ឌូណេស៊ី ក្នុងតំបន់ Gowa មានការរៀបចំប្រារព្ធពិធីបែបសាសនា ដែលមានអ្នកចូលរួមរហូតទៅដល់ ជាង៨ពាន់នាក់ មកពីបណ្ដាប្រទេសផ្សេងៗក្នុងទ្វីបអាស៊ី។ ​ការប្រមូលផ្ដុំរៀបចំ ​ពិធី​បែប​សាសនា​ដ៏​ធំ​នេះ​គឺជាលើកទី២ហើយ បន្ទាប់ពីប្រទេសម៉ាឡេស៊ី ដោយ​មិន​ខ្លាច​រអា​នៃការឆ្លង​រាល​ដាល​វីរុស Covid-19 ។

យោងតាមការលើកឡើងរបស់អ្នករៀបចំ និង មន្ដ្រីអាជ្ញាធរ នៅតំបន់នោះបានបញ្ជាក់ថា ការរៀបចំពិធីបែបសាសនាមួយនេះ គឺមានលក្ខណៈធំ ហើយមានប្រជាប្រិយភាពខ្លាំង លំដាប់ទី៤ លើពិភពលោក ហើយការប្រារព្ធពិធីនេះ ទៀតសោធ នៅតែអាចប្រព្រឹតទៅបាន​ បើទោះបីជាមានការហាមឃាត់ ពីមន្ដី្ររដ្ឋាភិបាល ឥណ្ឌូណេស៊ីក៏ដោយ។

បើតាមការ​ដក​ស្រង់​សម្តី​លោក Mustari Bahranuddin អ្នក​រៀប​ចំ​កម្មវិធី​ជួប​ជុំ​បែប​សាសនា​នេះ បានលើកឡើងថា ពួក​គេ​ពិត​ជា​ខ្លាច​ឆ្លង​រាតត្បាត​វីរុស Covid-19 ហើយ ប៉ុន្តែ​អ្វី​ពួក​គេ​ខ្លាច​ជាង​នេះ គឺ​ព្រះ​ជា​ម្ចាស់។ដោយ​សារ​យើង​សុទ្ធ​តែ​ជា​មនុស្ស​ធម្មតា គ្រប់​គ្នា​ប្រាកដ​ជា​ខ្លាច​ឈឺ ខ្លាច​ស្លាប់ ប៉ុន្តែ​ក្រៅ​ពី​រាង​កាយ នៅ​មាន​រឿង​មួយ​ទៀត គឺ​ព្រលឹង​របស់​ពួក​យើង។

​ប៉ូលិស​​ឥណ្ឌូណេស៊ី លោកArifuddin Saeni  បានបញ្ជាក់ថា អាជ្ញាធរ​បាន​ស្នើ​ឲ្យ​ពន្យារ​ពេល​ការ​ជួប​ជុំ​នេះ ប៉ុន្តែ​ត្រូវ​អ្នក​រៀប​ចំ​កម្មវិធី​បដិសេធចោល។

កម្មវិធី​ជួប​ជុំ​បែប​សាសនា​ដ៏​ធំ​នេះ ត្រូវ​បានគេ​ប៉ាន់​ប្រមាណថានឹងមាន​អ្នក​ចូល​រួម​សរុប​ ៨៦៩៥​នាក់ ខណៈដែនៅមាន ​ពលរដ្ឋ​ម៉ូស្លីម​ជា​ច្រើន​ទៀត កំពុង​ធ្វើ​ដំណើរ​មក​ចូល​រួម​ជា​បន្ត​បន្ទាប់ មានដូចជា ​ប្រទេស​ថៃ អារ៉ាប់រួម ឥណ្ឌា និង​ហ្វីលីពីន​ជាដើម។

គូសបញ្ជាក់ផងដែរថា កាលពី​ពេល​កន្លងមក ក៏មានការរៀបចំ​ពិធី​ជួប​ជុំ​បែប​សាសនា​ម៉ូស្លីម​ដ៏​ធំ​ ស្រដៀងគ្នាមួយ បាន​ប្រារព្ធ​ធ្វើ​នៅ​ប្រទេស​ម៉ាឡេស៊ី មាន​អ្នក​ចូល​រួម​សរុប ១៦០០០​នាក់ ដែល​ជា​កន្លែង​ធ្វើ​ឲ្យ​មាន​ការ​ឆ្លង​រាតត្បាត​វីរុស Covid-19 រាប់​រយ​ករណី​ទាំង​ក្នុង​ប្រទេស​ម៉ាឡេស៊ី ឥណ្ឌូណេស៊ី ប្រ៊ុយ​ណេ និង​កម្ពុជា​ជាដើម។

ដោយ៖ Stince

ប្រភព៖ក្រៅស្រុក

Related Articles