ដោយៈ ទិន សុខាវុធ
ផ្សារទំនើបរបស់ប្រទេសថៃ «Big C» ដំបូងគេ បានសម្ពោធបើកទ្វារសាកល្បងលក់ទំនិញនិងម្ហូបអាហារនៅក្នុងក្រុងប៉ោយប៉ែត ខេត្តបន្ទាយមានជ័យ កាលពីថ្ងៃសៅរ៍សប្តាហ៍មុន។
យោងតាមសេចក្តីប្រកាសព័ត៌មាននៅទំព័រ Facebook របស់ក្រុហ៊ុន Big C គោលបំណងនៃការបើកសាខានៅក្នុងក្រុងប៉ោយប៉ែត គឺធ្វើយ៉ាងណាដើម្បីបំពេញសេចក្តីត្រូវការរបស់ប្រជាពលរដ្ឋកម្ពុជា ក្នុងការប្រើប្រាស់របស់របរនិងម្ហូបអាហារមកពីប្រទេសថៃ។
ការបើកផ្សារទំនើបនេះ ត្រូវបានប្រជាពលរដ្ឋរស់នៅក្នុងក្រុងប៉ោយប៉ែត ទទួលស្វាគមន៍ប្រកបដោយក្តីសោមនស្សរីករាយ ហើយនៅថ្ងៃដំបូង ពួកគេបានចូលទិញទំនិញនៅក្នុងផ្សារយ៉ាងច្រើនកុះករ។
ជាលទ្ធផល ប្រទេសកម្ពុជាជាប្រទេសទី ៤ ដែលមានសាខាផ្សារទំនើប Big C មួយនេះ បន្ទាប់ពីប្រទេសថៃ វៀតណាម និង ឡាវ។
ជាគោលការណ៍ ផ្សារទំនើប Big C ផ្តោតសំខាន់ទៅលើអតិថិជនដែលមានប្រាក់ចំណូលទាបនិងមធ្យម ជាមួយនិងទំនិញជាច្រើនមុខ ដែលត្រូវបានដាក់លក់ក្នុងតំលៃមួយយ៉ាងសមរម្យ។
បើតាមក្រុមហ៊ុន Big C សាខាផ្សារទំនើបនៅក្នុងក្រុងប៉ោយប៉ែត ត្រូវបានបង្កើតឡើង ដោយប្រើប្រាស់ទុនវិនិយោគប្រមាណជា $6.8 លានដុល្លារ ហើយដែលអាចបង្កើតការងារជាង ១,២០០ កន្លែង សំរាប់ពលរដ្ឋខ្មែររស់នៅក្នុងតំបន់នោះ។
ក្រុងប៉ោយប៉ែតជាតំបន់សេដ្ឋកិច្ចដ៏សំខាន់មួយ ស្ថិតជាប់នឹងព្រំដែនកម្ពុជា-ថៃ ដែលនៅទីនោះ មានប្រជាជនរស់នៅប្រហែលជាជាង ២០ ម៉ឺននាក់។ អាស្រ័យហេតុនេះ មានក្រុមហ៊ុនបរទេសជាច្រើនបាននិងកំពុងបោះទុនវិនិយោគបង្កើតក្រុមហ៊ុននិងឬរោងចក្រជាបន្តបន្ទាប់ នៅក្នុងទីក្រុងដ៏មមាញឹកមួយនេះ។
ក្រៅពីសណ្ឋាគារ មជ្ឍមណ្ឌលពាណិជ្ជកម្ម កាស៊ីណូធំៗ សំណង់លំនៅដ្ឋាន និងបុរីថ្មីៗ រាជរដ្ឋាភិបាលកម្ពុជាកំពុងធ្វើការសិក្សាពីលទ្ធភាពសាងសង់ព្រលានយន្តហោះមួយនៅក្នុងទីក្រុងនោះផងដែរ៕
