We TV Cambodia

ផ្សារទំនើបដ៏ធំនៅក្រុងព្រះសីហនុ FURI Times Square Mall បើកដំណើរការសប្តាហ៍ក្រោយ

ផ្សារទំនើបដ៏ធំនៅក្រុងព្រះសីហនុ FURI Times Square Mall បើកដំណើរការសប្តាហ៍ក្រោយ

ដោយៈ ទិន សុខាវុធ

នៅសល់ប្រហែល​ជា​មួយ​សប្តាហ៍​ទៀត​តែប៉ុណ្ណោះ ផ្សារ​ទំនើប​ដ៏​ធំ​មួយ​​មាន​ឈ្មោះថា FURI Times Square Mall នៅ​ក្រុង​ព្រះ​សីហនុ នឹង​បើក​អោយ​ដំណើរការ​ទទួល​អតិថិជន គ្រប់​ស្រទាប់​វណ្ណៈ​។

យោង​តាម​អ្នក​នាង​ លីម​ សុខា​ដា​វីន នាយិកា​គ្រប់គ្រង​ទីផ្សារ​ និង​ការ​លក់​របស់​ផ្សារ​ទំនើប​មួយ​នេះ FURI Times Square Mall នឹង​បើក​អោយ​ដំណើរការ​​ ជា​ជំហាន​ដំបូង​​នៅ​​ចុង​ខែ​នេះ​ ក្នុង​ឱកាស​ឈប់​សំរាក​បុណ្យ​អុំ​ទូក បណ្តែត​ប្រទីប អក​អំបុក និង​ សំពះ​ព្រះ​ខែ​។ ហើយ​ការបើកសម្ពោធ​ជាផ្លូវការ នឹងត្រូវ​ធ្វើឡើង​នៅ​ដំណាច់​ឆ្នាំ ២០១៩ នេះ​។

អ្នក​នាង​ លីម សុខាដាវីន បាន​​អោយ​ដឹងទៀតថា FURI Times Square Mall នឹង​ជា​ផ្សារ​ទំនើប​ពោរពេញ​ទៅ​ដោយ​មុខ​​ទំនិញ​អាហារ​​ចំរុះ​និង​​មាន​គុណភាព​ខ្ពស់ ដែលនឹង​ជា​ម៉ាកល្បី​ៗ​នៅ​លើពិភពលោក​។ ហើយ​រហូត​មក​ដល់​ថ្ងៃ​​ទី ១៩ ខែ តុលា ឆ្នាំ ២០១៩ ស្តង់​លក់​ទំនិញ​និង​ទី​កន្លែង​ផ្សេង​ៗ​ទៀត ត្រូវ​បានលក់​ដាច់​បាន​ជាង​ ៩០% ហើយ​​។

ផ្សារ​ទំនើប FURI Times Square Mall មាន​ទីតាំង​លក់​រាយ និង​កន្លែង​កំសាន្ត​សរុប​ចំនួន ៦,០០០ ម៉ែត្រ​ការ៉េ ដែល​ត្រូវ​សាងសង់​ឡើង​តាម​រចនាបថ​ស្ថាបត្យកម្ម​ដ៏​​ល្អ​ផ្តាច់គេមួយ ដែលត្រូវ​បានទទូល​ពាន​រង្វាន់​អចលនទ្រព្យ​​នៃ​ប្រទេស​កម្ពុជា​។

ផ្សារ​ទំនើប​មួយ​នេះ​មាន​កំពស់ ៥ ជាន់ ស្ថិត​នៅ​តាមផ្លូវ​ឯករាជ្យ ក្នុង​សង្កាត់​មិត្តភាព ខ័ណ្ឌ​មិត្តភាព ក្រុង​ព្រះសីហនុ​៕

Related Articles