We TV Cambodia

ផ្លែស្វាយខ្មែរអាចនាំចេញទៅលក់នៅទីផ្សារកូរ៉េខាងត្បូង ក្នុងខែ ធ្នូ ខាងមុខនេះ

រូបថតៈ Facebook ក្រសួងកសិកម្មនិងរុក្ខាប្រមាញ់

ដោយៈ ទិន សុខាវុធ

លោក Kim Hyeon-Soo រដ្ឋមន្ត្រីក្រសួងកសិកម្ម ស្បៀងអាហារ និងអភិវឌ្ឍន៍ជនបទនៃសាធារណៈរដ្ឋកូរ៉េ បានថ្លែង​ថា នៅ​ក្នុង​ខែ ធ្នូ ឆ្នាំ ២០១៩ ខាងមុខ​នេះ បណ្តា​ក្រុមហ៊ុន​ទាំងឡាយ​នៅ​កម្ពុជា​ នឹងអាច​នាំចេញ​ផ្លែ​ស្វាយ​ខ្មែរ​ ទៅ​លក់នៅ​លើ​បណ្តា​ទីផ្សារ​នានា​​នៃ​ប្រទេស​កូរ៉េ​ខាង​ត្បួង​។

ការលើក​ឡើង​របស់​លោករដ្ឋមន្ត្រីកសិកម្មកូរ៉េ​ខាងត្បូង ត្រូវ​បានធ្វើឡើង​នៅ​ក្នុងជំណួបសន្ទនាការងារ ជាមួយ​ឯកឧត្តម វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ​ កាល​ពីថ្ងៃ​ទី ២៥ ខែ វិច្ឆិកា ឆ្នាំ ២០១៩ កន្លងទៅ​នេះ នៅ​ទីក្រុង ប៊ូសាន នៃ​ប្រទេស​កូរ៉េ​ខាងត្បូង​។

«ក្នុងឱកាសនេះផងដែរ ឯកឧត្តម Kim Hyeon-Soo បានបញ្ជាក់ថា ភាគីកូរ៉េបានអនុម័តរួចហើយនូវការអនុញ្ញាតិអោយនាំចូលស្វាយពីកម្ពុជាមកកូរ៉េ កាលពីថ្ងៃទី២៩ ខែតុលា ឆ្នាំ២០១៩ ដូច្នេះក្នុងខែធ្នូ ឆ្នាំ២០១៩ ខាងមុខនេះ កម្ពុជានឹងអាចនាំចូលស្វាយមកកូរ៉េបានហើយ» នេះ​ជាសំណេរ​របស់​ក្រសួង​កសិកម្ម នៅលើទំព័រ​ Facebook របស់​ក្រសួង​។

ជាការឆ្លើយ​តប លោក​រដ្ឋ​មន្ត្រីក្រសួង​កសិកម្ម​នៃ​ប្រទេស​កម្ពុជា បានថ្លែង​អំណរគុណដល់​ភាគីកូរ៉េ​​ខាងត្បូង ដែលបានព្រមព្រៀង​អនុញ្ញាត​ការនាំចូល​ផ្លែ​ស្វាយ​ខ្មែរ​ ទៅ​លក់​នៅ​លើទីផ្សារ​នៃ​ប្រទេស​​កូរ៉េ​​ខាង​ត្បូង​នេះ។

លើស​ពី​នេះទៀត លោក​​រដ្ឋ​មន្ត្រី​ក៏​បាន​ស្នើសុំដល់ភាគីកូរ៉េ​ផង​ដែរ អោយធ្វើយ៉ាងណា​ជួយ​ធ្វើទំនើបនីយកម្ម​ក​ដំណាំ​សិកម្មនៅកម្ពុជា​​។

ជាកុសលល្អ​ លោក​រដ្ឋ​មន្ត្រី​ក្រសួង​កសិកម្មកូរ៉េ​ខាង​ត្បូង បាន​យល់ព្រម​ចំពោះសំណើររបស់កម្ពុជា និងបានសន្យា​ថា នឹង​ជួយ​បង្រៀន​កម្ពុជា​អោយ​ចេះធ្វើការដាំដុះ​ដំណាំ​​ផ្សេង​ៗ​ នៅ​ក្នុង​ផ្ទះផ្ទាំង​កញ្ចក់ (Green House) យោង​ទៅតាមស្តង់ដារ​បច្ចេកវិទ្យា​ចុង​ក្រោយ​ ក្នុង​គោលបំណងធ្វើយ៉ាង​ណា​បង្កើនសមត្ថភាព​កសិករ​ខ្មែរ​ អាច​​ដាំ​ដំណាំ​បានគ្រប់រដូវ​៕

Related Articles