ប្រធានសមាគមគ្រឹះស្ថានឧត្ដមសិក្សា ស្នើក្រសួងអប់រំឲ្យបេក្ខជនប្រឡងបាក់ឌុបជាប់ដោយស្វ័យប្រវត្តិ

បន្ទាប់ពីក្រសួងអប់រំបានប្រកាសកាលពីម្សិលមិញនេះថា ក្រសួងនឹងលើកពេលប្រលងបាក់ឌុបដែលនឹងប្រព្រឹត្តទៅនៅថ្ងៃទី២១ ខែធ្នូនេះ ទៅប្រលងនៅពាក់កណ្ដាលខែមករា ឆ្នាំ២០២១ វិញ ប្រធានសមាគមគ្រឹះស្ថានឧត្ដមសិក្សា បានស្នើដល់ក្រសួងអប់រំឱ្យសិស្សថ្នាក់ទី១២ ជាប់បាក់ឌុបដោយស្វ័យប្រវត្តិតែម្ដង។

លោកហេង វ៉ាន់ដា ប្រធានសមាគមគ្រឹះស្ថានឧត្តមសិក្សា បានថ្លែងនៅព្រឹក​ថ្ងៃទី៨ ខែធ្នូថា «ខ្ញុំ​បានស្នើសុំឲ្យក្រសួងអប់រំរក្សាការប្រឡងបាក់ឌុបនៅថ្ងៃទី២១ ដដែល ប៉ុន្តែក្នុងករណី​ប្រឡង​មិន​បានធ្វើឡើងតាម​កាលបរិច្ឆេទនោះ​ទេដោយស្នើសុំឲ្យជាប់ដោយស្វ័យប្រវត្តិ ឬយកពិន្ទុមធ្យមនៃថ្នាក់ទី១២ ​ដើម្បី​កំណត់​ជាប់​ ឬធ្លាក់​តែម្តង»។

លោកបានបន្ថែមថា «ការស្នើសុំឲ្យបេក្ខជនជាប់ដោយស្វ័​យប្រវត្តិ ឬយកពិន្ទុមធ្យមនៃថ្នាក់ទី១២ នេះ ក៏​ដោយ​សារតែសមាគមគិតអំពីអា​រម្មណ៍របស់សិស្ស ដែលពន្យារពេលរហូតតាំងពីខែកញ្ញា ហើយបន្ដពន្យាររហូតមកដល់ខែ​ធ្នូ និងបន្ដ​ពន្យារពេលរហូតដល់ពាក់កណ្តាលខែមករា ឆ្នាំ២០២១បន្ថែមទៀត។ ចុះបើ​ដល់ពាក់កណ្តាលខែមករា មិនអាចប្រឡងបានទៀត តើក្រសួងនឹង​ត្រូវ​បន្តពន្យារពេលបន្ដទៀត ​ឬមួយទុកឲ្យសិស្សឌុបថ្នាក់ និយាយសុំបញ្ជាក់ឲ្យច្បាស់មកយ៉ាងដូចម្ដេចបានជាមិនព្រមយកមធ្យម​ភាគនៃថ្នាក់ទី១២ មក​វាយ​តម្លៃទៅ? បើបច្ចុប្បន្ន ស្ថានភាព​កូវីដ-១៩កំពុងតែរាតត្បាតបែបនេះ ទៅរកគុណភាពសិក្សាម្ដេចនឹងកើត?​»

សូមជម្រាបថា ជារៀងរាល់ឆ្នាំការប្រលងបាក់ឌុបប្រព្រឹត្តទៅនៅសប្ដាហ៍ទី៣ នៃខែសីហា ប៉ុន្តែដោយសារឆ្នាំ២០២០ នេះមានការផ្ទុះកូវីដ១៩ ទើបក្រសួងសម្រេចលើកពេលប្រលងទៅថ្ងៃទី២១​ខែធ្នូខាងមុខនេះវិញ។ តែគួរឲ្យស្ដាយ កម្ពុជាទើបនឹងមានការផ្ទុះកូវីដ១៩ ក្នុងសហគមន៍ធ្វើឲ្យក្រសួងសម្រេចលើកពេលប្រលងម្ដងទៀតទៅពាក់កណ្ដាលខែមករា ឆ្នាំ២០២១វិញតែ​ម្ដង។

អត្ថបទដោយ៖ Nevin