We TV Cambodia

ប្រធានក្រុមហ៊ុន GCG Asia ជនជាតិម៉ាឡេស៊ីត្រូវជាប់ទោសពីបទឆបោក

ដោយៈ ទិន សុខាវុធ

ជនជាតិ​ម៉ាឡេស៊ី​ម្នាក់​ឈ្មោះ  Yaw Foo Heo អាយុ ៣៩ ឆ្នាំ ត្រូវ​បាន​គេ​អះអាង​ថា​ជាម្ចាស់ក្រុមហ៊ុន
GCG Asia ត្រូវ​បានតុលាការ​ក្រុង​ភ្នំពេញ
កាល​ពី​ថ្ងៃ​សុក្រ​សប្តាហ៍​មុន កាត់​ទោស​អោយ​ជាប់​គុក​រយៈ​ពេល ១ ឆ្នាំប៉ុន្តែ​ត្រូវ​អនុវត្តទោស​តែ ៥ ខែនិង
៦ ថ្ងៃនៅ​ក្នុងពន្ធនាគារ ទោសដែលនៅសល់ត្រូវព្យួរ។

ជនជាតិម៉ាឡេស៊ី​រូប​នោះ​ត្រូវ​បាន​ជាប់​ទោស​ពី​បទ​ប៉ុនប៉ង​ក្លែង​បន្លំ
ក្រោយ​ពី​គាត់​បាន​ប្រើប្រាស់​ឈ្មោះ​ធនាគារ​ជាតិ​នៃ​កម្ពុជា
និង​ឈ្មោះ​លោក​នាយក​រដ្ឋ​មន្ត្រី​ ហ៊ុន សែន ដើម្បី​​កេង​យក​ផល​ប្រយោជន៍សំរាប់​ធ្វើ​ជំនួញ​អចលនទ្រព្យ
និង​រូបិយប័ណ្ណ​ឌីជីថល (Cryptocurrency) ។

នៅក្នុង​សវនការ លោក​ចៅក្រម ឡេ សុខា បាន​មាន​ប្រសាសន៍​ថា
ជន​ជាប់ចោទ Yaw
Foo Heo ត្រូវ​មាន​ទោស​ពី​បទ​ប៉ុនប៉ងក្លែង​បន្លំ ដូច​មាន​ចែង​នៅ​ក្នុងមាត្រា
៣៧៧ ​មាត្រា ៣៧៨ និង​មាត្រា ៣៨១ នៃ​ក្រម​ព្រហ្មទណ្ឌ បន្ទាប់​ពី​ជន​ជាប់ចោទ​បាន​ផ្សព្វផ្សាយ​ជា​លក្ខណៈ​បោក​ប្រាស់
នៅលើ​គេហទំព័រ​របស់​ក្រុមហ៊ុន GCG Asia ។

ពិរុទ្ធជន Yaw Foo Heo
ត្រូវ​បាន​ប៉ូលីស​សន្តិសុខ​ផ្ទៃក្នុង​កម្ពុជា​ចាប់​ខ្លួន​ កាល​ពី​ថ្ងៃ​ទី ១៦ ខែ
ឧសភា ឆ្នាំ ២០១៩ កន្លង​ទៅ នៅ​ក្នុង​ផ្ទះ​ជួល​របស់​គាត់​ក្នុង​រាជ​ធានី​ភ្នំពេញ​​។

ការចាប់​ខ្លួន​លោក​ Yaw Foo Heo
ត្រូវ​បាន​ធ្វើ​ឡើង​ បន្ទាប់​ពី​ជន​ជាប់​ទោសរូប​​នេះ​បាន​បង្ហោះ​រូបថត​របស់​ខ្លួនថត​ជាមួយ​នឹង​លោក​នាយក​រដ្ឋ​មន្ត្រី​
ហ៊ុន សែន នៅ​ក្នុង​ពិធី​មួយ​។

គោលបំណង​នៃ​ការបង្ហោះរូបថត​នេះ
ត្រូវ​បាន​តុលាការ​ចាត់​ទុក​ថា​ជាការផ្សាយ​ពាណិជ្ជកម្ម​ដើម្បី​ទាក់​ទាញ​អ្នកវិនិយោគ​ទាំងឡាយ​អោយ​ចូល​ហ៊ុន
ក្នុង​អាជីវកម្មអចលនទ្រព្យ​របស់​គេ​។

មួយវិញទៀត ពិរុទ្ធជន Yaw Foo Heo
ក៏​ត្រូវ​បាន​តុលាការ​ចោទ​ប្រកាន់​ផង​ដែរ​ពី​បទ​កុហកបោកប្រាស់​សាធារណជន​ថា
ក្រុមហ៊ុន​របស់​គេ​ត្រូវ​បាន​ចុះ​ឈ្មោះ​ជាមួយ​​នឹង​ធនាគាត​ជាតិ​នៃកម្ពុជា​
ដែល​ជា​ស្ថាប័ន​រដ្ឋគ្រប់គ្រងវិស័យ​ហិរញ្ញវត្ថុ​នៅ​កម្ពុជា​។

ទាក់ទង​នឹង​រឿង​នេះ លោក​នាយក​រដ្ឋ​មន្ត្រី ហ៊ុន
សែន ធ្លាប់​សរសេរ​នៅ​លើ​ទំព័រ Facebook របស់​លោក​​ថា ​ក្រុមហ៊ុន GCC Asia បាន​ប្រើ​ឈ្មោះ​និង​រូបភាព​របស់​លោក
ក្នុង​គោល​បំណង​ផ្សព្វផ្សាយ​ពី​ក្រុមហ៊ុន​របស់​ពួក​គេ​។ សម្តេច​ ហ៊ុន សែន
ក៏​បាន​ប្រកាស​ផង​ដែរ អោយប្រជាពលរដ្ឋ​ និង​ ពាណិជ្ចករ​ទាំងក្នុង​និង​ក្រៅ​ប្រទេស
ប្រុង​ប្រយ័ត្ន​ពី​ក្រុមហ៊ុន​មួយ​នេះ​៕

Related Articles