We TV Cambodia

ប្រជាកសិករខេត្តកោះកុង ងាកមកដាំដំណាំបន្ថែមពីរបរនេសាទ ដើម្បីផ្គត់ផ្គង់គ្រួសារ

ប្រជាកសិករខេត្តកោះកុង ងាកមកដាំដំណាំបន្ថែមពីរបរនេសាទ ដើម្បីផ្គត់ផ្គង់គ្រួសារ

ដោយ៖ពេជ្រ

កោះកុង៖ ប្រជាកសិករខេត្តកោះកុង ងាកមកដាំដំណាំបន្ថែមពីរបរនេសាទ ដើម្បីផ្គត់ផ្គង់គ្រួសារ ស្របពេលកូវីដ១៩។ នេះបើតាមប្រធានមន្ទីរកសិកម្មរុក្ខាប្រមាញ់ និងនេសាទខេត្តកោះកុង ថ្ងៃ ២៣ កក្កដា ឆ្នំា២០២០។

កសិករខេត្តកោះកុងបង្កើនការដាំដំណាំរួមផ្សំបន្ថែមលើមុខបរបរនេសាទសមុទ្រ ដើម្បីជួយសម្រួលដល់ជីវភាពគ្រួសារឲ្យកាន់តែមានភាពប្រសើរឡើងមួយកំរិតទៀត។

ប្រធានមន្ទីរកសិកម្មរុក្ខាប្រមាញ់ និងនេសាទខេត្តកោះកុង លោក អ៊ី ម៉េងលាង មានប្រសាសន៍ថា ប្រជាកសិករខេត្តកោះកុង បានងាកមកដាំដំណាំរួមផ្សំបន្ថែមទៀត ដើម្បីផ្គត់ផ្គង់នៅក្នុងគ្រួសារប្រចាំថ្ងៃ ក៏ដូចជាផ្គត់ផ្គង់តម្រូវការទីផ្សារក្នុងស្រុក។

លោកបានបន្តថា បច្ចុប្បន្ន ប្រជាកសិករនៅក្នុងខេត្ត ចាប់ផ្តើមដាំបន្លែក្នុងមួយគ្រួសារៗ លើផ្ទៃដី៥០០ម៉ែត្រការ៉េ ទៅ១០០០ម៉ែត្រការ៉េ ហើយបន្លែទាំងអស់នោះរួមមាន ៖ ស្ពៃ ត្រសក់ ត្រប់ សណ្តែកគួ សណ្តែកដី និងបន្លែស្លឹកមួយចំនួនទៀត ។

លោកបានបញ្ជាក់ថា កសិករនៅក្នុងតំបន់នោះអាចលក់បន្លែបាន ក្នុងតម្លៃ២០០០ទៅ៣០០០រៀល ក្នុងមួយគីឡូក្រាម។

លោកបានបញ្ជាក់ថា បើទោះបីការផ្គត់ផ្គង់ក្នុងខេត្តបានគ្រប់គ្រាន់ ក៏មន្ទីរនៅតែបន្តសហការជាមួយអាជ្ញាធរពាក់ព័ន្ធ ដើម្បីចុះណែនាំ និងជំរុញដល់ប្រជាកសិករឲ្យបង្កើនការដាំដុះបន្ថែមទៀត៕

ប្រភព៖ AKP

Related Articles