We TV Cambodia

បិទអាជីវកម្មម៉ាស្សាមួយកន្លែងទៀត ក្រោយបង្កប់សេវាកម្មខុសពីការពិត

បិទអាជីវកម្មម៉ាស្សាមួយកន្លែងទៀត ក្រោយបង្កប់សេវាកម្មខុសពីការពិត

ហាងម៉ាស្សាមួយកន្លែងស្ថិតនៅសង្កាត់​អូរបែកក្អម ខណ្ឌ​សែនសុខ ត្រូវបានកម្លាំងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ ចុះបិទភ្លាមៗបន្ទាប់ពីរកឃើញថា ហាងម៉ាស្សានេះមានបង្កប់សេវាផ្លូវភេទ។

ក្នុងការចុះបង្ក្រាបនេះដែរ អាជ្ញាធរបានឃាត់ខ្លួនជនជាតិ​ចិន ​ថៃ វៀតណាម​ប្រុស-ស្រីចំនួន​ ៦នាក់បញ្ជូនទៅតុលាការ ខណៈ​បុរស​ខ្មែរ​ ៧​នាក់ទៀត​ក៏ត្រូវ​ឃាត់ខ្លួន​នៅ​ខណ្ឌ​ឫស្សីកែវ​ផងដែរ ក្នុងករណី​លេងល្បែង​ភ្នាល់​ចាក់បាល់​តាម​អ៊ីនធឺណិត​។

បើយោងតាមការឲ្យដឹងពីមន្ត្រីក្នុងការចុះបង្ក្រាបនោះបានបញ្ជាក់ថា ដោយ​មាន​ការសង្ស័យ​ថា ហាង​ម៉ាស្សា​ទីតាំង​ខាងលើ​អាចមាន​បង្កប់​បម្រើសេវា​ផ្លូវភេទ​នោះ​ទើប​សមត្ថកិច្ច​ចុះទៅបង្ក្រាប ​និងបានរកឃើញ​ស្រោមអនាម័យ​ប្រើ​រួច និង​មិនទាន់​ប្រើ​មួយចំនួន ព្រមទាំងបានប្រមូលយក​រក្សា​ទុកជា​វត្ថុតាង​ដើម្បី​បញ្ជូន​ទៅ​តុលាការ​ផងដែរ។

សូមជម្រាបថា នេះជាហាងម៉ាស្សាទី២ ហើយបន្ទាប់ពីហាងម៉ាស្សាយីហោ «ដាយមិន» ដែលត្រូវបានអាជ្ញាធរចុះបង្ក្រាបកាលពីថ្ងៃទី២៦ ខែវិច្ឆិកាកន្លងទៅនេះ ដោយសារតែមានបង្កប់សេវាផ្លូវភេទ។

អត្ថបទដោយ៖ Nevin

Related Articles