We TV Cambodia

ប្រទេស​ជប៉ុន​ស្ថិត​ក្នុង​​តំបន់​គ្រោះ​រំជួយ​ដី «Ring of Fire»

ដោយៈ ទិន សុខាវុធ

នៅ​រាត្រី​ថ្ងៃ​ទី ៦ ខែ កញ្ញា ឆ្នាំ ២០១៨ ប្រទេស​ជប៉ុន​បាន​ជួប​ប្រទះ​នឹង​គ្រោះថ្នាក់​ធម្មជាតិ​រំជួយ​ដី​ដ៏​ធំ​មួយ នៅ​ក្នុង​តំបន់ Hokkaido ដែលបណ្តាលអោយ​មនុស្ស​ ៤១ នាក់​បាត់បង់​ជីវិត ៦៩១ នាក់​រង​របួស និង ៥.៣ លាន​នាក់​គ្មាន​ចរន្តអគ្គិសនីប្រើប្រាស់​។

នៅ​ថ្ងៃ​ទី ១៤ ខែ មេសា ឆ្នាំ ២០១៦ គ្រោះ​ថ្នាក់​រំជួយ​ដី​មួយ​ទៀត បានកើត​មាន​ឡើ​ងនៅ​ក្បែ​ទីក្រុង Kumamoto ស្ថិត​ក្នុង​តំបន់​ Kyushu ។ ពីរ​ថ្ងៃ​បន្ទាប់​មក​ទៀត គឺ​នៅ​ថ្ងៃ​ទី ១៦ ខែ មេសា ឆ្នាំ ២០១៦ គ្រោះ​ថ្នាក់​រំជួយ​ដី​បាន​កើត​ឡើង​ជា​ថ្មី​ម្តង​ទៀត នៅ​ក្នុង​តំបន់​ដដែល​នេះ​។ ជាលទ្ធផល គ្រោះ​ថ្នាក់​រំជួយ​ដី​ទាំង​ពីរ​នេះ​បានបង្កអោយ​មាន​មនុស្ស​ស្លាប់​ចំនួន ៥០ នាក់ ​និង​របួស​ចំនួន ៣,០០០ នាក់​។

ក្រៅ​ពី​នេះ​ នៅ​មាន​គ្រោះ​ថ្នាក់​រំជួយ​ដី​ជា​ច្រើនរាប់​មិនអស់​ទៀត ដែល​បាន​វាយ​ប្រហារ​ប្រទេស​ជប៉ុន និង​បាន​ធ្វើមនុស្ស​ជា​ច្រើនម៉ឺននាក់ស្លាប់និងរងរបួស ហើយ​ផ្ទះ​សំបែង​ជា​ច្រើន​ខ្នង​ត្រូវ​បាន​បំផ្លាញ​។

ជាកម្មអកុសល យោង​តាម​អ្នក​ជំនាញ ប្រទេស​ជប៉ុន​ស្ថិត​នៅ​ក្នុង​​ទីតាំង​ភូមិ​សាស្ត្រ​មួយ​មាន​​ឈ្មោះថា «Ring of Fire» នៅ​ក្នុង​សមុទ្រ​ប៉ាស៊ីភិក ដែល​តែង​តែ​មាន​គ្រោះ​ថ្នាក់ធម្មជាតិ​រំជួយ​ដី និង​រលក​យក្ស​ស៊ូណាមិ កើតមានឡើង​ជា​ញឹកញាប់​។

ក៏ប៉ុន្តែ ​ទោះជា​ទីតាំង​ភូមិ​សាស្ត្រ​ស្ថិត​ក្នុង​តំបន់​គ្រោះ​រំជួយ​ដី​យ៉ាងណា​ក៏​ដោយ ក៏​ប្រទេស​ជប៉ុន​នៅ​តែ​​ជា​ប្រទេស​​ឧស្សាហកម្ម​ជឿនលឿន​មួយ ដែល​​មាន​សក្តានុពល​សេដ្ឋកិច្ច​​ស្ថិត​ក្នុង​លំដាប់ថ្នាក់​លេខ ៣ បន្ទាប់ពី​សហរដ្ឋអាមេរិក និង​ប្រទេស​ចិន​។

យោង​តាម​ស្ថាប័ន​មូលនិធិ​អន្តរជាតិ IMF ប្រាក់​ចំណូល​ជាមធ្យម​​របស់​ប្រជាជនជប៉ុន​ម្នាក់​ៗ​ប្រចាំ​ឆ្នាំ (GDP per capita) គឺ​ប្រមាណ​ជា $38,937 ដុល្លារ បើ​តាម​តួលេខ​ក្នុង​ឆ្នាំ ២០១៦ ។ លើស​ពី​នេះ​ទៀត ប្រទេស​ជប៉ុនស្ថិត​លំដាប់​ថ្នាក់​ទី ៤ ក្នុង​ការនាំ​ទំនិញ​ចេញ​ទៅ​លក់​នៅ​ក្រៅប្រទេស​៕

Related Articles