បណ្ដាភោជនីយដ្ឋាន កន្លែងកម្សាន្ដនានា កំពុងតែប្រែប្រួលទៅជាស្ងាត់បណ្ដើរៗ

រូបភាពឯកសារ

ដើម្បីធ្វើការទប់ស្កាត់ ការពានឹងការរីករាលដាលពី មេរោគកូវីដ១៩ ទើបតែពង្រីកខ្លួន នៅកម្ពុជា រដ្ឋាភិបាលក៏បាន ចេញសេចក្ដីសម្រេច ប្រកាសបិទ អាជីវកម្មកម្សាន្ដបណ្ដោះអាសន្ន មានដូចជា អាជីវ​កម្មការ៉ាអូខេ រោងកុន ក្លឹបរាត្រី និងព្រឹតិការណ៍ជួបជុំសាធារណៈផ្សេងទៀត ដោយឡែកនៅឡើយតែប្រភេទ​អាជីវកម្មបែប អាហារដ្ឋានតែប៉ុណ្ណោះ។

តាមបណ្ដាភោជនីយដ្ឋាន ឬអាហារដ្ឋានជាច្រើន ក្នុងតំបន់គោលដៅ ដែលជាពិសេស ក្នុងរាជធានីភ្នំពេញ និង សៀមរាប កំពុងតែផ្លាស់ប្ដូរឥរិយាបទជាបណ្ដើរៗហើយ លើសេវាកម្មរបស់ខ្លួន ដោយផ្នែកលើស្ថានភាពភ្ញៀវ។ ជាក់ស្ដែងអាជីវកម្មនេះ ក្នុងអំឡុងពេលបច្ចុ​ប្បន្ន នៅដំណើរ ធម្មតា​ ប៉ុន្ដែសេវាកម្មត្រូវបានផ្លាស់ប្ដូរ ដោយមានទំនោរលើការ​ ដឹកជញ្ជូន ដល់ទីកន្លែង លែងតម្រូវឲ្យអតិថិជនមកដល់ហាងផ្ទាល់។​

អាហារដ្ឋានអ៊ីតាលីមួយកន្លែងនៅក្នុងទីក្រុងភ្នំពេញឈ្មោះ The Godfather Restaurant Pizza & Pasta បានបង្ហោះសារផ្ញើរទៅកាន់ អតិថិជនរបស់ខ្លួន តាមរយៈផេកហ្វេសប៊ុក ថា ​” អតិថិជនជាទីស្រឡាញ់ដោយសារតែការរីករាលដាលនៃជំងឺកូរ៉ូណា ដើម្បីរក្សាសុវត្ថិភាពរបស់អ្នកទាំងអស់គ្នា យើងសូមជម្រាបជូនដំណឹង ថាចាប់ពីថ្ងៃទី ១៧ ខែមីនាឆ្នាំ ២០២០ ភោជនីយដ្ឋានរបស់យើងនឹងឈប់បំរើការនៅក្នុងហាងហើយ ប៉ុន្ដែទន្ទឹមនឹងនេះ យើងចាប់ផ្តើមលក់ជាមួយនឹងការដឹកជញ្ជូនក្នុងតម្លៃដ៏គួរឱ្យទាក់ទាញ” ។

ដោយឡែកអាហារដ្ឋាន ហ្វីលីពីនមួយកន្លែងទៀត ឈ្មោះ Bistro Manila ដែលទើបតែបង្កើតនៅភ្នំពេញ បានប្រកាសពី គោលជំហររបស់ខ្លួន ដោយផ្ដោតសំខាន់លើការពង្រឹងផ្នែកសុវត្ថិភាព ទាំងផ្នែកខាងក្នុង(បុគ្គលិក) និងផ្នែកខាងក្រៅ(ភ្ញៀវ)។ បុគ្គលិកក្នុងហាង ត្រូវអនុវត្ដបន្ថែម ពង្រឹងផ្នែកអនាម័យកាន់តែខ្ពស់ ដែលធានាឲ្យបាននូវ ទីតាំងប្រកបដោយសុវត្ថិភាព នឹងផ្ដល់ទំនុកចិត្ដដល់ភ្ញៀវ។

តែយ៉ាងណាក៏ដោយ ក៏នៅមានអាហារដ្ឋានមួយចំនួនតូចត្រូវបានបិទទ្វារ​ទាំងស្រុង ទាំងបណ្ដាខេត្ដ និងរាជធានី ខណៈដែលអាជិវកម្មរបស់ពួកគេ មានភាពធ្លាក់ចុះអតិថិជន។

គូសបញ្ជាក់ផងដែរថា​មកទល់ពេលនេះ​កម្ពុជា មានករណីផ្ទុកមេរោគ កូវីដ១៩ ចំនួន៣៧នាក់ហើយ។