We TV Cambodia

នាយករដ្ឋមន្ត្រីថា បើកដក EBA សហភាពអឺរ៉ុបក៏​ខាតដូចកម្ពុជាដែរ

នាយករដ្ឋមន្ត្រីថា បើកដក EBA សហភាពអឺរ៉ុបក៏​ខាតដូចកម្ពុជាដែរ

 
 

ដោយៈ ទិន សុខាវុធ

លោកនាយក​រដ្ឋ​មន្ត្រី ហ៊ុន សែន បាន​លើកឡើង​ថា ប្រសិន​បើសហភាព​អឺរ៉ុប (EU) សំរេច​ព្យួរ​ភាព​អនុគ្រោះ​ពន្ធ EBA សហភាពអឺរ៉ុប​ខ្លូនឯង ក៏​នឹងខាតបង់ប្រាក់ជាច្រើន ដូច​ជាកម្ពុជា​ដែរ​ ពីព្រោះនៅ​ពេលដែល​ទំនិញ​កម្ពុជា​ត្រូវ​ជាប់​ពន្ធ តំលៃ​នៃទំនិញទាំងនោះក៏​នឹងត្រូវ​ឡើងថ្លៃ​​ទៅ​តាម​តំលៃ​ពន្ធនោះដែរ​។

ការលើកឡើងរបស់​លោកនាយករដ្ឋមន្ត្រី ត្រូវ​បានធ្វើឡើងនៅ​ក្នុងពិធី​​ចែកសញ្ញាប័ត្រដល់និស្សិត​នៃ​សាកលវិទ្យាល័យ​ឯកទេសនៃកម្ពុជា (CUS) សរុបចំនួន ៦,៧៦២ នាក់ កាលពីថ្ងៃ​ទី ១១ ខែ ធ្នូ ឆ្នាំ ២០១៩ កន្លងទៅនេះ​។

លើស​ពី​នេះ​ទៀត សម្តេច ហ៊ុន សែន ក៏​បានបញ្ជាក់ជា​ថ្មីម្តងទៀត​​ថា កម្ពុជា​មិន​​អាចធ្វើតាម​សេចក្តីស្នើ​សុំរបស់​សហភាព​​បាន​ទាំងអស់​នោះទេ​។

មួយវិញទៀត ​ចំពោះ​សំណុំ​​រឿង​របស់​លោក កឹម សុខា ប្រធាន​គណបក្ស​សង្គ្រោះជាតិ ដែលត្រូវ​បានតុលាការកំពូលរំលាយ​ចោលនោះ កំពុង​ស្ថិត​នៅ​ក្នុង​ដៃ​របស់​តុលាការ​កម្ពុជា ដែលលោកនាយករដ្ឋ​មន្ត្រីបានអះអាង​ថា​ជាតុលាការឯករាជ្យ​មួយ​ ដែល​រដ្ឋាភិបាលរបស់លោកគ្មាន​សិទ្ធិ​លូកដៃ​ចូល​សុំអោយ​​​ទំលាក់បទចោទ​ប្រកាន់ប្រឆាំង​លោក កឹម សុខា បានឡើយ​​។

ក៏ប៉ុន្តែ​ទោះ​ជា​យ៉ាងណាក៏​ដោយ ក៏​ក្រសួង​ការបរទេស​កម្ពុជា​បាន​អោយ​ដឹង​ថា ក្រសួង​នឹង​ធ្វើ​ការ​​ឆ្លើយ​តប​ជា​លាយលក្ខណ៍អក្សរ​ ទៅ​កាន់សហភាព​អឺរ៉ុប​វិញ​ នៅ​ថ្ងៃ​ទី ១២ ខែ ធ្នូ​ ឆ្នាំ ២០១៩ នេះ​ ចំពោះ​សំណើររបស់​សហភាប​អឺរ់ុប ទាក់ទង​ទៅ​នឹង​បញ្ហា​ EBA នេះ​។

ជុំវិញ​ភាព​អនុគ្រោះពន្ធ EBA កាលពីខែ​មុន លោក​នាយក​រដ្ឋ​មន្ត្រី​បាន​គូស​បញ្ជាក់ថា សហភាព​អឺរ៉ុបបាននិងកំពុង​ប្រើប្រាស់​ការផ្តល់ភាព​អនុគ្រោះពន្ធ EBA នេះ ជា​ឧបករណ៍ សំរាប់បង្ខំ​អោយ​កម្ពុជាធ្វើតាម​ពួកគេ។ ហើយ​ជាការឆ្លើយ​តប  សម្តេច ហ៊ុន សែន បានប្រកាស​ថា កម្ពុជាមិនចង់​បាត់បង់​នូវ EBA នោះទេ ក៏ប៉ុន្តែ​កម្ពុជា​ក៏​​នឹង​មិនធ្វើការដោះដូរ​អធិបតេយ្យ​ជាតិ​ជាមួយ​នឹង​​ជំនួយឬការផ្តល់​ភាពអនុគ្រោះ​ពាណិជ្ជកម្ម​ណាមួយ​ឡើយ​។

មួយវិញទៀត យោង​តាម​លោក​នាយករដ្ឋ​មន្ត្រី យូរ​ឬ​ឆាប់ ប្រព័ន្ធ​អនុគ្រោះពន្ធ EBA នឹងត្រូវ​បាត់បង់ នៅ​ពេលដែលកម្ពុជា​ក្លាយ​ខ្លួនទៅ​ជា​ប្រទេស​ចំណូល​មធ្យម​កំរឹត​ខ្ពស់ ​ពី​ព្រោះប្រព័ន្ធ​អនុគ្រោះពន្ធ EBA ត្រូវផ្តល់​អោយ​តែសំរាប់ប្រទេស​ណា​ដែល​​មាន​ការអភិវឌ្ឍតិច​តួច​តែប៉ុណ្ណោះ​។

ប្រព័ន្ធ​អនុគ្រោះពន្ធ EBA បាន​និង​កំពុង​អនុញ្ញាត​អោយ​កម្ពុជា​ដែល​ជា​ប្រទេស​​អភិវឌ្ឍន៍​​​តិចតួច​មួយ​ (least developed country) ​ក្នុងចំណោម​ប្រទេស​​អភិវឌ្ឍ​​ន៍​តិច​តួច​មួយ​ចំនួន​ទៀត អាច​នាំ​ទំនិញ​ចេញ​ទៅ​លក់​ក្នុង​ទី​ផ្សារ​​របស់​សហភាព​អឺរ៉ុប ដោយ​មិនបាច់​បង់​ពន្ធ​សំរាប់​ទំនិញប្រមាណជា ៩៥%​ និង​ក្នុង​បរិមាណ​គ្មានចំនួនកំណត់​។ ក៏ប៉ុន្តែ ភាព​អនុគ្រោះពន្ធ​នេះ នឹង​ត្រូវ​ដកហូត​យក​ទៅ​វិញ​ពី​ប្រទេស​​ដែល​នៅ​ទីនោះ សហភាព​អឺរ៉ុប​យល់​ឃើញ​ថា​មាន​ការរំលោភ​សិទ្ធិ​មនុស្ស​។

យោង​តាម​សហភាព​អឺរ៉ុប កម្ពុជា​ជា​ប្រទេស​ទី ២ ដែល​ទទួល​បានផល​ប្រយោជន៍​ច្រើនជាង​គេ ពី​ភាពអនុគ្រោះ​ពន្ធ EBA នេះ​។ ពោល​គឺ​ទំនិញ​កម្ពុជា​ដែល​បាន​នាំ​ចេញ​ទៅ​លក់​នៅ​លើ​ទី​ផ្សារ​របស់​សហភាព​អឺរុប មាន​ចំនួន​សរុប​​ច្រើន​ជាង ១៨% នៃ​ទំនិញ​នាំ​ចូល​ទី​ផ្សារ​សហភាព​អឺរ៉ុប នៅ​ក្នុង​ឆ្នាំ ២០១៨ ​។

 
ផ្ទុយ​ទៅ​វិញ អ្នក​ជំនាញ​បាន​លើកឡើងថា ក្នុងករណីប្រព័ន្ធ​អនុគ្រោះ​ពន្ធ EBA ត្រូវ​បានដក​ហូត​យក​ទៅ​វិញ កម្ពុជា​នឹងត្រូវ​បង់​ពន្ធសំរាប់​ទំនិញ​នាំ​ចេញគ្រប់​មុខ គិតជា​ទឹកប្រាក់ប្រមាណ $700 លាន​ដុល្លារ​ ក្នុង​មួយ​ឆ្នាំ​ៗ​៕

Related Articles