We TV Cambodia

ធនាគារ PPCBank គ្រោងពង្រីក​សាខា​អោយ​បាន​ ៤ ថែម​ទៀត

ធនាគារ PPCBank គ្រោងពង្រីក​សាខា​អោយ​បាន​ ៤ ថែម​ទៀត

ដោយៈ ទិន សុខាវុធ

ធនាគារ Phnom Penh Commercial Bank (PPCBank) ដែលជា​ធនាគារ​​បុត្រ​សម្ព័ន្ធ​របស់​ក្រុមហ៊ុន JB Financial Group នៅប្រទេស​កូរ៉េ​ខាង​ត្បូង មាន​គំរោង​នឹង​ពង្រីកសាខា​ចំនួន​ ៤ ទៀត​នៅ​​ប្រទេស​កម្ពុជា​ បន្ទាប់​ពី​បាន​ធ្វើប្រតិបត្តិការ​ហិរញ្ញវត្ថុ​ប្រកបដោយ​ជោគ​ជ័យ​ កាល​ពី​ឆ្នាំ​កន្លងទៅ​។

លោក Shin Chang Moo ប្រធាន​ធនាគារ PPCBank បាន​អោយ​ដឹង​ថា ធនាគាររបស់លោក​មាន​គំរោង​នឹងពង្រីក​សាខា​អោយ​បាន​ ៤ ទៀត បន្ថែម​ទៅ​លើ​សាខា​មាន​ស្រាប់​ចំនួន ២១ ដែល​ត្រូវ​បានបំពាក់​ដោយ​ម៉ាស៊ីន​បើកប្រាក់ ATM ចំនួន ៤៦ នៅទូទាំង​ប្រទេស​ប្រទេស​​កម្ពុជា​។

លោក​បានអោយ​ដឹង​ទៀត​ថា សាខា​ថ្មី​ទាំងនោះ​នឹងត្រូវ​បង្កើតឡើង​នៅ​តាម​ជាយ​ក្រុង​ភ្នំពេញ និង​នៅ​ខេត្ត​កពង់ស្ពឺ ប៉ោយប៉ែត និង ស្វាយរៀង​ក្នុង​ក្រុង​បាវិត​។

ទាក់ទង​នឹងបញ្ហា​​ហិរញ្ញប្បទាន​ក្នុង​ការបង្កើត​សាខា​ទាំង ៤ នោះ លោក Shin Chang Moo បាន​លើក​ឡើង​ថា ធនាគារ​របស់​លោក​នឹង​​ប្រមូល​យក​ទុន​វិនិយោគ​ តាម​រយការបើក​​ការ​ខ្ចី​ប្រាក់​ពី​​អ្នកវិនិយោគ​ទាំងឡាយ​ នៅ​លើ​ទីផ្សារ​ភាគ​ហ៊ុន​កម្ពុជា (CSX​) ឬ​អាច​និយាយ​តាមរបៀបទីផ្សារ​​ហិរញ្ញវត្ថុ​​ថា​ ជាការ​បើក​លក់​មូលបត្របំណុលសាជីវកម្ម​នៅ​លើ​ទីផ្សារ​ភាគ​ហ៊ុន​កម្ពុជា​។

ធនាគារ PPCBank ត្រូវបានបង្កើតឡើង​និង​​បាន​ប្រកប​មុខ​របររក​ស៊ី​នៅ​ក្នង​ទីផ្សារ​ហិរញ្ញវត្ថុ​​កម្ពុជា ចាប់​តាំង​ពី​ឆ្នាំ ២០០៨ មក​ម្លេះ​​។ ជារួម PPCBank មាន​គោល​ដៅ​ផ្តល់​សេវា​ហិរញ្ញវត្ថុ មាន​ដូច​ជា​ប្រាក់​កំចី​ជាដើម អោយ​ដល់​ក្រុមហ៊ុន​ឯកជន មាន​ដូច​ជា​សហគ្រាស​ធុន​តូច​និង​មធ្យម​ជាដើម (SME) ​។

យោង​តាមលោក Shin Chang Moo ការជួយ​ពង្រីក​វិស័យ​ឯកជន​ ដែល​ជា SME នៅ​កម្ពុជា ដោយ​ការផ្តល់នូវ​ហិរញ្ញប្បទាន​​ចាំ​បាច់​ទាំងឡាយ​ ដើម្បី​បង្ក​លទ្ធភាព​អោយ​ក្រុមហ៊ុន​ឯកជន​ទាំងនោះ អាច​បង្កើត​មុខ​របរ​ថ្មី ឬ​ពង្រីក​មុខ​របរ​​ចាស់​របស់​ពួក​គេ គឺ​ជា​គោល​ដ៏​ចំបង​របស់​ធនាគារ​របស់​លោក ក្នុង​ការ​ធ្វើ​អោយ​មាន​ការ​រីក​ចំរើន​ជាមួយ​គ្នា​ ជាមួយ​​នឹង​​ក្រុមហ៊ុន​ឯកជនទាំងនោះ​៕

Related Articles