We TV Cambodia

ធនាគារ ACLEDA គ្រោងលក់ភាគហ៊ុន ក្នុងពេលឆាប់ៗនេះ

ធនាគារ ACLEDA គ្រោងលក់ភាគហ៊ុន ក្នុងពេលឆាប់ៗនេះ

 
 

ដោយៈ ទិន សុខាវុធ

ធនាគារ ACLEDA ដែល​ជា​ធនាគារពាណិជ្ជលំដាប់ថ្នាក់លើ​គេ​​នៅ​កម្ពុជា បាន​ប្រកាស​ថា​​​ថា ពួកគេនឹងដាក់លក់ភាគហ៊ុន ជា​លើកដំបូង​នៅ​លើ​ទីផ្សារ​ភាគ​ហ៊ុន​កម្ពុជា ​ក្នុង​ពេល​ឆាប់​ៗ​ខា​មុខ​នេះ​។

យោង​​តាម​លោកបណ្ឌិត អ៊ិន ចាន់នី នាយក​ប្រតិបត្តិ​នៃ​ធនាគារ ACLEDA ការសំរេច​ចិត្ត​លក់​ភាគ​ហ៊ុន​នេះ គឺ​ក្នុង​គោលបំណង​បង្កើន​ប្រភពទុន អោយ​កាន់តែសំបូរបែប​ថែមទៀត ដើម្បី​​បង្កើនប្រាក់​ចំណេញ អោយ​បានកាន់​តែ​ច្រើនឡើង​​ថែម​ទៀត​។

លោក​នាយក​ប្រតិបត្តិ​ធនាគារ បាន​បន្តទៀត​ថា ភាគហ៊ុន​នៃ​ធនាគាររបស់លោកនឹងត្រូវប្រកាសដាក់លក់ជា​ផ្លូវ​ការ បន្ទាប់​ពី​បាន​ទទួល​ការអនុញ្ញាត​ពីអាជ្ញាធរ​នៃ​ទីផ្សារភាគហ៊ុន​កម្ពុជា​ ហៅ​កាត់​ថា CSX ។

ចំពោះរឿង​លក់ភាគហ៊ុននេះ ធនាគារ ACLEDA បានជ្រើសរើសយក​ក្រុមហ៊ុន Yuanta Securities (Cambodia) Plc. ធ្វើ​ជា​ទីប្រឹក្សា​ហិរញ្ញវត្ថុ​តែ​មួយ​គត់។

ទាក់ទង​នឹង​ប្រាក់​ចំណេញរបស់​ធនាគារ ACLEDA កន្លងមក លោកបណ្ឌិត អ៊ិន ចាន់នី ធ្លាប់​បានអះអាង​ប្រាប់​អ្នក​សារព័ត៌មានថា ប្រាក់​ចំណេញ​​របស់​ធនាគាររបស់​លោក អាចកើនលើសពី​ $100  លាន​ដុល្លារ ដែលជាការ​រំពឹង​ទុក​​នៅ​សំរាប់​ឆ្នាំ​ ២០១៩ នេះ​​។

លោកបានបញ្ជាក់បន្ថែម​ទៀត​ថា មូលហេតុ​ដែល​ធ្វើ​អោយ​ធនាគារ​របស់​លោកទទួល​ប្រាក់​ចំណេញ​ បាន​លើស​ផែនការនេះ ក៏​ដោយសារ​កម្ពុជា​បច្ចប្បន្ន​មាន​ស្ថេរភាព​នយោបាយ និង សន្តិសុខ​សង្គម ដែល​ជា​កត្តានាំ​អោយ​មាន​កំណើន​សេដ្ឋកិច្ច​​​ស្ថិត​ក្នុង​​រង្វង់ប្រមាណ ៧ ភាគរយ​ក្នុង​មួយ​ឆ្នាំ​។

បើតាមការអះអាង​របស់​លោក​ប្រធានធនាគារ មកទល់ខែ កញ្ញា ឆ្នាំ ២០១៩ ធនាគាររបស់​លោកបាន​ផ្តល់ប្រាក់​កំចីប្រមាណ $3.6 ពាន់លាន​ដុល្លារ អោយ​ដល់​អថិជន គឺ​ស្មើ​នឹង​ ៩០% នៃ​ផែនការកំណត់​។ ចំពោះ​ការទទួល​ប្រាក់​បញ្ញើ​វិញ នៅ​ក្នុង​រយពេលដូចគ្នា ធនាគាររបស់លោកបាន​ទទួលប្រាក់បញ្ញើប្រមាណជា $4.2 ពាន់​លានដុល្លារ ដែល​ស្មើ​នឹង​ ៩០% នៃ​ផែនការកំណត់ដូច​គ្នា​។

បើនិយាយ​ពី​ការប្រកួត​ប្រជែងនៅ​លើ​ទីផ្សារ​ហិរញ្ញវត្ថុ​វិញ លោក​ អ៊ិន ចាន់នី បានលើកឡើងថា បណ្តា​ធនាគារ​ពាណិជ្ជ​និង​គ្រឹស្ថាន​មីក្រូហិរញ្ញវត្ថុ​ទាំងឡាយ បំពេញ​កង្វះខាត​អោយ​គ្នាទៅវិញទៅ​មក​។ ជាទូទៅ ភាពប្រកួតប្រជែង​នេះ មានភាព​វិជ្ជមាន​ច្រើន​គឺ​មាន​ន័យ​ថា «រួម​រស់​ជាមួយ​គ្នា​ ដើម្បី​ការរីក​ចំរើន​ទាំងអស់​គ្នា​»។

គួរ​រំលឹក​ឡើង​វិញ​ថា ធនាគារ ACLEDA បានអភិវឌ្ឍខ្លួនពីអង្គការក្រៅរដ្ឋាភិបាល (NGO) ទៅ​ជាធនាគារ​ពាណិជ្ជ​លំដាប់​លេខ ១ នៅ​កម្ពុជា ក្នុង​រយពេល ២៧ ឆ្នាំ​កន្លងមកនេះ​៕

Related Articles