We TV Cambodia

ធនាគារអភិវឌ្ឍន៍អាស៊ីៈ តំលាភាពជាគន្លឹះនៃការដឹកនាំប្រកបដោយវឌ្ឍនភាព

ធនាគារអភិវឌ្ឍន៍អាស៊ីៈ តំលាភាពជាគន្លឹះនៃការដឹកនាំប្រកបដោយវឌ្ឍនភាព

រូបថតៈ ធនាគារអភិឌ្ឍន៍អាស៊ី

ដោយៈ ទិន សុខាវុធ

ធនាគារអភិវឌ្ឍន៍អាស៊ី ហៅ​កាត់ថា ADB បាន​លើក​ឡើង​ថា ដើម្បី​អោយ​ការដឹកនាំ​មួយ​ដែលនាំមកនូវ​វឌ្ឍនភាព ការដឹក​នាំ​​នោះចាំ​បាច់​ត្រូវ​មានតំលាភាព​ និង​​បំរើ​អោយ​ផល​ប្រយោជន៍​របស់ប្រជាពលរដ្ឋ​ ​។

នៅ​ក្នុង​បទ​វិភាគ​មួយ​ចុះ​ផ្សាយ​នៅ​លើគេហទំព័រ​របស់​ ADB កាលពី​សប្តាហ៍​មុន លោក Woochong Um និង​លោក Marcos Bonturi ដែល​សុទ្ធសឹង​ជា​អ្នកឯកទេស​ផ្នែក​អភិបាលកិច្ចប្រចាំ​​ធនាគារ​អភិវឌ្ឍន៍​អាស៊ី បាន​សរសេរ​ថា រដ្ឋាភិបាល​បើក​ចំហរ​​ ​និង​ដែល​មាន​គោលដៅបំរើ​​អោយ​ផលប្រយោជន៍​របស់​​ប្រជាពលរដ្ឋ​ នៅ​ក្នុង​ការផ្តល់សេវា​សាធារណៈ និង​អភិបាលកិច្ច​សាធារណៈ នឹង​អាច​ប្រើប្រាស់​ធនធាន​ដ៏​​តិចតួច​មាន​កំរឹត​ប្រកប​ដោយ​ប្រសិទ្ធិភាព​។ ហើយ​ជាការឆ្លើយ​តប រដ្ឋាភិបាលនោះនឹងទទួលបាននូវការទុកចិត្ត​ និងភាព​ស្របច្បាប់ ពី​សមត្ថភាព​នៃ​ការផ្តល់​សេវាសាធារណ​របស់​ពួក​គេ​។

«A “people-centric” approach to public governance and public
service can support the efficient use of limited public resources, strengthen
the legitimacy of public institutions and restore trust in the competence and
values of the public service,» នេះ​ជាការលើកឡើង​របស់​អ្នកឯកទេស​ផ្នែកអភិបាលកិច្ចទាំងពីរខាង​លើនេះ​។

លោក Woochong Um និង​លោក Marcos Bonturi បានបន្ថែម​ទៀត​ថា ជាទូទៅ បណ្តា​ប្រជាពលរដ្ឋ​និង​ក្រុមហ៊ុនទាំងឡាយ​ នៅ​ទូទាំង​ពិភពលោក តែង​តែ​ចង់ឃើញ​រដ្ឋាភិបាលរបស់​ពួក​គេ​ ផ្តល់​នូវ​សេវា​សាធារណ​នានា ប្រកបដោយ​​ប្រសិទ្ធិភាព តំលាភាព និង​ សំរាប់​ជនគ្រប់​រូប (inclusive) ដោយ​ប្រើប្រាស់នូវ​បច្ចេកវិទ្យា​ចុង​ក្រោយ​បង្អស់​។

ក៏ប៉ុន្តែ យោង​តាម​អ្នកឯកទេស​ទាំងពីរ​នាក់នេះ ទោះ​បី​ជា​បណ្តា​ប្រទេស​​នៅ​ក្នុង​ភូមិភាគ​អាស៊ី​អាគ្នេយ៍
បាន​ខិតខំ​ធ្វើ​យ៉ាង​ណា អោយ​រដ្ឋាភិបាលរបស់​ពួកគេជា​រដ្ឋាភិបាលបើកចំហរ​ប្រកប​ដោយ​តំលាភាព​
យ៉ាងណា​ក៏​ដោយ ក៏​មាន​​​ប្រទេស​តែ​បួនប៉ុណ្ណោះ​
ដែល​បាននិងកំពុង​ផ្តល់​នូវ​ទិន្នន័យ​ទាំងឡាយ អោយ​ដល់​សាធារណជន​។

ដើម្បីដោះ​ស្រាយ​បញ្ហានេះ អ្នក​ឯកទេស​ផ្នែកអភិបាលកិច្ចប្រចាំ​ ADB បានផ្តល់អនុសាសន៍​ថា ដើម្បីអោយ​មាន​ភាព​បើកចំហរ​ឬ​តំលាភាព រដ្ឋាភិបាលអាស៊ីអាគ្នេយ៍ទាំងឡាយ គួរ​គាប់បីមាន​ឆន្ទៈ​នយោបាលក្នុង​ការ​ធ្វើរឿង​នេះ​។

លើសពី​នេះ​ទៀត ការធ្វើការប្រៀបធៀបពីគុណភាព​នៃការផ្តល់​សេវាសាធារណ​
ជាមួយ​នឹងប្រទេស​ផ្សេង​ៗ​ទៀត​នៅ​ក្នុងតំបន់ ក៏​ជា​ប្រការមួយ​ដែលធ្វើ​រដ្ឋាភិបាលក្នុង​តំបន់​អាស៊ីអាគ្នេយ៍​
អាច​វាស់ស្ទង់​និង​ធ្វើការ​កែលំអរ ពី​ការផ្តល់សេវានិងអភិបាលកិច្ចសាធារណ អោយបានកាន់​តែ​ប្រសើរឡើងទៀត​។

ទាក់ទង​នឹង​ការផ្តល់​សេវា​សាធារណ​នៅ​កម្ពុជា ថ្លែង​នៅ​ក្នុង​សន្ទរកថា​​នៃ​​ការបើក​សិក្ខាសាលា​រៀបចំ​ផែនការ​សកម្មភាពជាតិ
​ស្តី​ពី​ការកែ​ទំរង់​រដ្ឋបាល​សាធារណៈ​នៅ​កម្ពុជា កាល​ពី​ថ្ងៃ​ទី ២២ ខែ តុលា ឆ្នាំ
២០១៩ លោក​ស្រី Inguna
Dobraja ប្រធាន​គ្រប់គ្រងសាខា​ធនាគារពិភពលោក​ប្រចាំ​នៅ​កម្ពុជា
បាន​មាន​ប្រសាសន៍​ថា សេវា​សាធារណ​​ដែលអាច​ដំណើរការទៅ​បាន
គឺជាសេវា​សាធារណ​ដែល​បំរើ​ផល​ប្រយោជន៍​​ប្រចាំ​ថ្ងៃ​របស់​ប្រជាពលរដ្ឋ​គ្រប់​រូប​។

«Public
services work when they take an inclusive approach» នេះ​ជា​ការលើកឡើងរបស់​លោក​ស្រី Inguna Dobraja ។

លោក​ស្រី​បាន​ពន្យល់​បន្ថែម​ទៀត​ថា
សេវា​សាធារណ​​ដែល​អាច​ដំណើរការ​ទៅ​បាន
គឺ​នៅ​ពល​ណា​ដែល​សេវា​ទាំង​នោះ​លើក​ទឹក​ចិត្ត​អោយ​កុមារី​​ទៅ​រៀន​នៅ​សាលា
​នៅ​ពេល​ណា​ដែល​​សេវា​ទាំងនោះ​អនុញ្ញាត​អោយ​សិស្សានុសិស្ស​និង​ឪពុកម្តាយ​របស់ពួក​​គេ​អាច​ចូល​រួម​ក្នុង​សកម្មភាពរបស់​សាលារៀន​​
និង​នៅ​ពេល​ណា​ដែល​​​ប្រជា​សហគមន៍​អាច​ទទួលខុស​ត្រូវ​ពី​សេវា​សុខភាព​របស់​ពួក​គេ​។

លើស​ពី​នេះ​ទៀត
លោកស្រី​ក៏​បាន​លើកឡើងផងដែរថា សេវា​សាធារណ​ដែល​អាច​​ដំណើរការ​ទៅ​បាន
គឺ​ជា​សេវា​​​ទាំងឡាយ​ណា​ ដែល​អាច​ដោះ​ស្រាយ​បាន​នូវ​បញ្ហា​​អំពើ​ពុក​រលួយ
ដែល​បាន​និង​កំពុង​​ជះ​ឥទ្ធិពល​​ដ៏​អាក្រក់​ទៅ​លើ​សេវា​ជា​មូលដ្ឋាន​គ្រឹះ​​ផ្សេង​ៗ​ទៀត​មាន​​ដូចជា​សេវា​សុខភាព
​​និង សេវា​​អប់រំ​ជាដើម​ ដែល​​ប្រជាពលរដ្ឋ​​កំពុង​ត្រូវការ​ជាទី​បំផុត​។

សរុប​មក លោក​ស្រី​ប្រធាន​ធនាគារពិភពលោកប្រចាំ​នៅ​កម្ពុជា បាន​គូស​បញ្ជាក់​ថា កន្លងមក ការរៀបចំ​សេវា​សាធារណ គឺ​គ្រាន់តែ​ជា​គំនិត​​​និង​​​សេចក្តី​ត្រូវ​ការ​របស់​រដ្ឋបាល​សាធារណ​តែ​ប៉ុណ្ណោះ​។ ពោល​គឺ​វាមិន​បា​ន​ឆ្លើយតប​ទៅ​នឹងសេចក្តីត្រូវការរបស់​ប្រជាពលរដ្ឋ​អោយ​បាន​គ្រប់​ជ្រុង​ជ្រោយ​នោះ​ឡើយ​។ ផ្ទុយ​ទៅវិញ រដ្ឋបាលដែនដីមាន​​ឱកាស​គ្រប់គ្រាន់ ក្នុង​ការតាក់តែងគោលនយោបាយ​សេវាសាធារណ ដែល​​ឆ្លើយ​តប​ទៅ​នឹងតំរូវការរបស់ប្រជាពលរដ្ឋ ដោយ​គ្រាន់តែ​ស្តាប់​នូវ​អ្វី​ៗ​ដែលប្រជាពលរដ្ឋ​ចង់បានតែ​ប៉ុណ្ណោះ​។

លោក​ស្រី​បាន​អះអាង​ទៀត​ថា នៅ​ពេល​បច្ចុប្បន្ន​នេះ បណ្តា​រដ្ឋបាល​ដែនដី​​​នៅ​ជុំវិញ​ពិភពលោក ​បាន​និង​កំពុង​យក​ចិត្ត​ទុកដាក់​ជា​ខ្លាំង​ ក្នុង​ការតាក់តែង​គោលនយោបាយ​សេវា​សាធារណ ដោយ​រួម​សហការ​និង​ទទួល​យក​នូវ​អ្វី​ៗ​ដែល​ជា​តំរូវការ​​របស់​ប្រជាពលរដ្ឋ​នៅ​ក្នុង​មូលដ្ឋាន​របស់​ពួក​គេ​។ មិនត្រឹម​តែប៉ុណ្ណោះ រដ្ឋបាល​ដែនដី​ទាំងនោះ​ ក៏​បាន​និង​កំពុង​បង្កើត​​ផង​ដែរ​នូវ​យន្តការ​ស្តាប់​យោបល់​រាស្ត្រដោយ​ផ្ទាល់ នៅ​ពេល​ដែល​ពួក​គេ​​ផ្តល់​​សេវា​សាធារណ​អោយ​ដល់​ប្រជាពលរដ្ឋ​​ (real-time feedback) ៕

គំរូ​សាលា​ឃុំ​មួយ​នៅ​ក្នុង​ប្រទេស​កម្ពុជា​

Related Articles