We TV Cambodia

ធនាគារអភិវឌ្ឍន៍អាស៊ីផ្តល់កំចី $40 លានដុល្លារ ជួយពង្រឹងស្ថេរភាពហិរញ្ញវត្ថុនៅកម្ពុជា

ធនាគារអភិវឌ្ឍន៍អាស៊ីផ្តល់កំចី $40 លានដុល្លារ ជួយពង្រឹងស្ថេរភាពហិរញ្ញវត្ថុនៅកម្ពុជា
រូបថតៈ ធនាគារអភវិឌ្ឍន៍អាស៊ី

ដោយៈ ទិន សុខាវុធ

ធនាគារ​អភិវឌ្ឍន៍​អាស៊ី (ADB) ​​បាន​សំរេច​ផ្តល់​កំចី​ជា​ទឹក​ប្រាក់​ចំនួន $40 លានដុល្លារ សំរាប់​​គាំទ្រ​​ការខិត​ខំ​ប្រឹងប្រែង​​របស់​រាជ​រដ្ឋាភិបាល​កម្ពុជា ក្នុង​ដំណាក់កាល​ទី​ ២ ដើម្បី​ធ្វើ​អោយ​មាន​ស្ថេរភាព​ហិរញ្ញវត្ថុ​នៅ​​ក្នុង​ប្រទេស ​ពង្រីក​វិស័យ​ហិរញ្ញវត្ថុអោយ​ដល់​ជន​គ្រប់​រូប ​​ និងជំរុញ​ការអភិវឌ្ឍ​ប្រកប​ដោយ​និរន្តភាព​។

យោង​តាម​សេចក្តីប្រកាស​ព័ត៌មាន​នៅ​លើ​គេហទំព័រ​របស់​ ADB ចុះ​ផ្សាយ​នៅ​ថ្ងៃ​ទី ១ ខែ តុលា ឆ្នាំ ២០១៩​ ជំនួយ​ឧបត្ថម្ភ​របស់​ ADB នៅ​ពេលនេះ គឺ​ជា​ការបន្ត​ការគាំទ្រ​ជា​លើក​ទី ២ ទៅ​លើ​​កម្មវិធី​អភិវឌ្ឍន៍​មួយ​របស់​រាជ​រដ្ឋាភិបាល​ ក្នុង​ការជួយ​គាំទ្រការពង្រីក​វិស័យ​ហិរញ្ញវត្ថុ​អោយ​បាន​ដល់​ជន​គ្រប់​រូប​នៅ​កម្ពុជា ដែល​ត្រូវ​បាន​ចុះ​ហត្ថលេខា​គាំទ្រ​ដោយ ADB ​កាល​ពី​ខែ តុលា ឆ្នាំ ២០១៦ កន្លងទៅ​។

ជាក់ស្តែង កម្មវិធី​នេះ​នឹងជួយ​ពង្រីកវិស័យ​ហិរញ្ញវត្ថុ អោយ​​បាន​ដល់គ្រួសារ​​កសិករ​ក្រីក្ររស់​នៅតាមតំបន់ជនបទ​នានា​ទូទាំង​ផ្ទៃប្រទេស​​ រួម​ទាំង​សហគ្រាស​ធុន​មធ្យម​ផងដែរ​។ តាម​រយៈគោល​នយោបាយ​នានា​នៅ​ក្នុង​កម្មវិធី​នេះ ស្ថេរភាព​នៃ​​វិស័យ​ហិរញ្ញវត្ថុ​របស់​កម្ពុជា ​នឹង​ត្រូវ​ធ្វើអោយ​ប្រសើរឡើង ហើយ​ហេដ្ឋារចនា​សម្ព័ន្ធរបស់​​វិស័យនេះ ក៏​នឹងត្រូវ​ធ្វើ​អោយ​ទាន់​សម័យ ក្នុង​គោលបំណង​តំរូវ​ទៅ​តាម​សេវាកម្ម​និងផលិតផល​ទំនើបៗ​។

«វិស័យ​ហិរញ្ញវត្ថុ​ប្រកប​ដោយ​ស្ថេរភាព​និង​ទាន់​សម័យ​មួយ មាន​សារសំខាន់​ណាស់​សំរាប់​​ប្រទេស​កំពុង​អភិវឌ្ឍ​​ដូចជា​ប្រទេស​កម្ពុជា​ជា​ដើម។  វានឹង​​ធ្វើ​អោយ​ជនគ្រប់​រូប​អាច​ទទួល​បាន​យ៉ាង​ងាយ​ស្រួល​​នូវ​សេវា​​ហិរញ្ញវត្ថុ​​ជា​ផ្លូវការ​​។ ហើយ​បណ្តា​ក្រុមហ៊ុនទាំងឡាយ ក៏​នឹង​អាច​ខ្ចី​ប្រាក់​មក​ធ្វើ​ដើមទុន​ប្រកប​ដោយ​ភាព​ទុក​ចិត្ត មក​ពង្រីក​មុខ​របរ​របស់​ពួក​គេ ដែល​នឹង​អាច​ជួយ​អោយ​សេដ្ឋកិច្ច​ជាតិ​កាន់​តែ​រី​កចំរើនឡើង​ថែមទៀត​» នេះ​ជា​ការលើក​ឡើង​របស់​អ្នក​ស្រី Benita Ainabe អ្នកឯកទេស​ខាង​វិស័យ​ហិរញ្ញវត្ថុ​មួយ​រូបរបស់​ ADB ។

«កម្មវិធី​នេះតំណាង​អោយ​ភាពជា​ដៃ​គូ​ជា​យូរ​អង្វែង​ រវាង​ ADB និង​រាជ​រដ្ឋាភិបាល​កម្ពុជា ដើម្បី​សំរេច​បាន​​នូវ​គោលដៅ​​ទាំងអស់​នេះ​» អ្នក​ស្រី Benita Ainabe បាន​បន្ថែម​។

យោង​តាម​ ADB វិស័យ​ហិរញ្ញវត្ថុ​នៅ​កម្ពុជាស្ថិត​នៅ​ក្នុង​ស្ថានភាព​​នៃ​ការចាប់ផ្តើម​នៅ​ឡើយ ហើយ​ត្រូវ​គ្របដណ្តប់​ដោយ​ផ្នែក​ធនាគារ​និង​មីក្រូហិរញ្ញវត្ថុ​។ មួយវិញទៀត ទោះបី​ជា​វិស័យ​នេះ​ផ្តល់​​ផលផ្លែផ្កាដ៏គួរ​អោយ​កត់សំគាល់យ៉ាង​ណាក៏​ដោយ​ ក៏ការទទួល​បាន​នូវ​សេវា​ហិរញ្ញវត្ថុ​​នៅ​កម្ពុជា នៅមាន​កំរឹត​នៅ​ឡើយ​ ជា​ពិសេស​នៅ​តាម​តំបន់​ជនបទ​។

គិត​មក​ដល់​ឆ្នាំ ២០១៥ មនុស្ស​ពេញវ័យ​មាន​ចំនួន​តែ ៥៩% ប៉ុណ្ណោះ ដែល​ទទួល​បាន​នូវ​សេវា​ហិរញ្ញវត្ថុ​​​ជា​ផ្លូវការ​។ ផ្ទុយ​ទៅវិញ ស្ទើតែ​មួយ​ភាគ​បី​នៃ​ប្រជាពលរដ្ឋ​មិន​បាន​ទទួល​នូវ​សេវា​ហិរញ្ញវត្ថុ​ណា​មួយ​ឡើយ​។ ហើយ​ការខិតខំ​ប្រឹងប្រែ​កែ​លំអ​សេវា​ហិរញ្ញវត្ថុ​អោយ​បាន​​ដល់​ជន​គ្រប់​រូប ត្រូវ​បាន​ជួប​នឹង​ឧបសគ្គ​នៃ​អនក្ខរភាព​ហិរញ្ញវត្ថុ​ (financial illiteracy) ។

អាស្រ័យ​ហេតុនេះ ការផ្សព្វផ្សាយ​ចំណេះ​​ដឹង​ពី​ប្រព័ន្ធ​ហិរញ្ញវត្ថុ​​​មូលធននិយម កំពុង​ត្រូវ​បាន​អនុវត្ត​នៅតាមសាលារៀន​នានា​។ ហើយ​មេរៀន​ស្តី​​ពី​ប្រព័ន្ធ​នេះ​ ក៏​ត្រូវ​បាន​បញ្ចូល​ទៅ​ក្នុង​កម្មវិធី​សិក្សារ​របស់​សិស្ស​ចាប់​ពី​ថ្នាក់​ទី ១ រហូត​ដល់​ថ្នាក់​ទី ១២ ផង​ដែរ។

ដោយឡែក ចំពោះ​ធនាគារ​អភិវឌ្ឍជនបទ (Rural Development Bank) ដែល​ជា​ធនាគារ​មួយ​​របស់​រដ្ឋ ក៏​ត្រូវ​បានកែទំរង់ ក្នុងគោលបំណង​​បង្កើត​សេវា​ផ្តល់ប្រាក់​កំចី​អោយ​ដល់​សហគ្រាស​ធុន​តូច​និង​មធ្យម ​នៅ​ក្នុង​វិស័យ​កសិកម្ម​។

ចំណែក​ឯ​រាជ​រដ្ឋាភិបាលវិញ​ ក៏​បាន​និង​កំពុង​​​បង្កើត​ច្បាប់​និងបទដ្ឋា​ន​នានា ក្នុង​​គោលដៅ​ការពារ​សិទ្ធិ​របស់​​អតិថិជន ដោយ​បង្កើត​ផ្នែកទទួលពាក្យ​បណ្តឹង​ទាំងឡាយ​របស់​អតិថិជន នៅ​តាម​បណ្តា​ធនាគារ​នៅ​ក្នុង​ប្រទេស​។

លើស​ពី​នេះ​ទៀត ADB ក៏​បាន​និង​កំពុង​​ជួយ​ជ្រែមជ្រែង​ផងដែរ ​នូវ​ការបង្កើត​ឡើង​នូវ​​ប្រព័ន្ធ​ម៉ាស៊ីន​ស្វ័យប្រវត្តិ​របស់​ធនាគារ​ជាតិ ដែល​តាម​រយៈ​ម៉ាស៊ីន​ទាំងនោះ អតិថិជន​អាច​ប្រើប្រាស់​ប័ណ្ណ​ធនាគាររបស់ពួកគេ សំរាប់​ប្រតិបត្តិការ​ហិរញ្ញវត្ថុ​​ជា​ច្រើន​​។

ដូចគ្នា​ដែរ ADB ក៏​បាន​និងកំពុង​ជួយ​ជ្រោមជ្រែង​រាជ​រដ្ឋាភិបាល ក្នុង​ការបង្កើត​ច្បាប់​និង​បទដ្ឋានមួយ​ចំនួន​ទាក់ទង​និងវិស័យ​ហិរញ្ញវត្ថុ មាន​ជា​អាទិ៍​​ដូចជា Trust Law, e-Commerce Law,  និង Consumer Protection Law ៕

Related Articles