We TV Cambodia

ធនាគារអភិវឌ្ឍន៍អាស៊ីផ្តល់ហិរញ្ញប្បទាន $119.16 លានដុល្លារ សំរាប់កែលំអប្រព័ន្ធធរាសាស្ត្រក្នុង ៤ ខេត្ត

ធនាគារអភិវឌ្ឍន៍អាស៊ីផ្តល់ហិរញ្ញប្បទាន $119.16 លានដុល្លារ សំរាប់កែលំអប្រព័ន្ធធរាសាស្ត្រក្នុង ៤ ខេត្ត
រូបថតៈ ធនាគារពិភពអភិវឌ្ឍន៍អាស៊ី

ដោយៈ ទិន សុខាវុធ

ធនាគារអភិវឌ្ឍន៍អាស៊ី ហៅ​កាត់​ថា ADB បាន​សំរេច​ផ្តល់​ហិរញ្ញប្បទាន​ចំនួន​ $119.16 លានដុល្លារ សំរាប់​ការកែលំអ​ប្រព័ន្ធធារាសាស្ត្រ​នៅ​ក្នុង​ខេត្ត​ចំនួន ៤ នៅ​ក្នុង​ប្រទេស​កម្ពុជា​ ដែល​នឹង​អាច​ស្រោចស្រព​ដី​ស្រែ​ប្រមាណ​ ៤៣,៥០០ ហិកតា​ របស់​ប្រជាកសិករចំនួន ២៩០,០០០ នាក់ ដែលចំនួនពាក់កណ្តាលនៃ​កសិករទាំងនោះ​គឺ​ជា​ស្ត្រីភេទ​។

យោង​តាម​សេចក្តិប្រកាស​ព័ត៌មាន ចុះ​ផ្សាយ​នៅ​លើ​គេហទំព័រ​របស់​ ADB កាលពី​ថ្ងៃទី ៥ ខែ ធ្នូ ឆ្នាំ ២០១៩ កន្លងទៅ នៅ​ក្នុង​ហិរញ្ញប្បទានចំនួន $119.16 លាន​ដុល្លារ​នោះ ប្រាក់​ចំនួន $117 លាន​ដុល្លារ​ជា​កំចី​សម្បទាន និងប្រាក់ចំនួន $2.16 លាន​ដុល្លារ​ទៀត ជាជំនួយ​ឥត​សំណង។

ប្រព័ន្ធ​ធរាសាស្ត្រដែលនឹងត្រូវ​កែ​លំអ ដោយ​ប្រើប្រាស់​ហិរញ្ញប្បទាន​របស់​ ADB ចំនួន $119.16 លាន​ដុល្លារ​នេះ​រួម​មាន​ ប្រព័ន្ធធរាសាស្ត្រ​កំពីងពួយ​ក្នុង​ខេត្ត​បាត់ដំបង ប្រព័ន្ធ​ធរាសាស្ត្រ​ព្រែកពោរ​ក្នុង​ខេត្ត​កំពង់​ចាម ប្រព័ន្ធ​ធរាសាស្ត្រ​ស្ទឹង​ជីនិត​ខាងត្បូង​ក្នុង​ខេត្ត​កំពង់​ធំ និង​​ប្រព័ន្ធ​ធរាសាស្ត្រ​ព្រែក​ជី​កលេខ ១៥ ក្នុង​ខេត្ត​តាកែវ​។

បើ​តាម ADB បណ្តា​ប្រព័ន្ធ​ធរាសាស្ត្រ​​ខាង​លើ​នេះ​នឹង​ជួយ​បង្កើន​​ទិន្នផលកសិផល​នៅ​ក្នុង​បណ្តា​ខេត្តទាំង ៤ នោះ ហើយ​វា​ក៏​​នឹង​ជា​កត្តា​មួយ​ជួយ​កាត់​បន្ថយ​ភាព​ក្រីក្រនៅ​ទូទាំង​ប្រទេស​ផងដែរ​។

«Agriculture plays a central role in the economic and social life of people in Cambodia, especially those living in rural areas. Boosting agricultural productivity by focusing on the improvement of sector infrastructure such as irrigation systems, which the ADB initiative will focus on, will go a long way to empower people and lift them out of poverty,» នេះ​ជា​ការលើកឡើង​របស់​កញ្ញា Thuy Trang Dang ដែល​ជា​អ្នកឯកទេស​ជើងចាស់​ផ្នែក​អភិវឌ្ឍន៍​ជនបទ​​ប្រចាំ​ ADB ។

ADB បានបន្ថែមទៀត​ថា កសិកម្ម​គឺ​ជា​វិស័យ​សេដ្ឋកិច្ច​ដ៏​សំខាន់​​មួយ​របស់​កម្ពុជា ពីព្រោះ ២២% នៃ​ផលិតផល​ក្នុង​ស្រុក​សរុប (GDP) នៅ​ក្នុង​ឆ្នាំ ២០១៨ បានមកពី​វិស័យ​កសិកម្ម​។ ក៏ប៉ុន្តែ វិស័យ​នេះ​ ដែលជា​ឆ្អឹងខ្នង​ដ៏​សំខាន់​នៃ​ជីវភាពរស់នៅ​របស់​ប្រជាកសិកររស់​នៅ​តាម​តំបន់​ជនបទ មិន​ត្រូ​វ​បាន​លើកស្ទួយ​នោះ​ទេ​។ ពោល​គឺ​វិស័យ​កសិកម្ម​នៅ​កម្ពុជា​ស្ថិត​ក្នុង​ភា​ព​ហួស​សម័យ និង​​មិន​ឆ្លើយ​តប​ទៅ​នឹងសេចក្តី​ត្រូវ​ការ​នៅពេលបច្ចុប្បន្ន​នេះ​ឡើយ​។

ជាក់ស្តែង មាន​ផ្ទៃ​ដី​កសិកម្មចំនួន​ប្រមាណ​ជា ១.៣ លាន​ហិកតាប៉ុណ្ណោះ ក្នុង​ចំណោម​ផ្ទៃដីកសិកម្មសរុប​ទាំងអស់​ប្រហែលជា ​៤ លានហិកតា​​ ​ត្រូវគ្រប​ដណ្តប់​ដោយ​ប្រព័ន្ធ​ធរាសាស្ត្រ​។ ហើយ​ប្រហែល​ជា ៩០% នៃ​ប្រព័ន្ធ​ធរាសាស្ត្រ​ទាំងនោះត្រូ​វ​ចាត់ទុកថា​​ហួស​សម័យ ដែល​មិនឆ្លើយ​តប​ទៅ​នឹង​សេចក្តីត្រូវការ​បច្ចុប្បន្ន​​នៅ​ក្នុង​វិស័យ​កសិកម្ម​​ឡើយ​៕

Related Articles