We TV Cambodia

ធនាគារពិភពលោកថា ការតភ្ជាប់ទៅនឹងសេដ្ឋកិច្ចពិភពលោក ធ្វើអោយកំណើនសេដ្ឋកិច្ចកម្ពុជាមានស្ថេរភាព

រូបភាពៈ ធនាគារពិភពលោក

ដោយៈ ទិន សុខាវុធ​

ថ្មីៗ​នេះ ធនាគារពិភពលោក (World Bank) បានចុះផ្សាយ​នៅ​លើគេហទំព័រ​របស់ខ្លួន​ នូវ​អនុសាសន៍មួយ​ចំនួន ដែល​នៅ​ក្នុង​នោះ ការ​តភ្ជាប់​សេដ្ឋកិច្ចកម្ពុជា​ទៅ​នឹងសេដ្ឋកិច្ច​ពិភពលោក​និងតំបន់​ ជា​កត្តាមួយ​ដ៏​សំខាន់​ ដែលអាច​ជួយ​ធ្វើ​​អោយ​កំណើនសេដ្ឋកិច្ចរបស់​កម្ពុជា​​មានស្ថេរភាព នៅចំពោះមុខហានិភ័យ​នៃ​ការបាត់បង់​ EBA  និង​ការចុះ​ខ្សោយ​នៃ​កំណើន​​សេដ្ឋកិច្ចនៅ​​ប្រទេស​ចិន​ ដែល​ជា​ប្រភព​​ហិរញ្ញប្បទានដ៏​សំខាន់​​សំរាប់​កម្ពុជា​។

យោ​ងតាម​​ធនាគា​រពិភពលោក ក្នុង​បរិបទ​នៃ​ការតភ្ជាប់​សេដ្ឋកិច្ចកម្ពុជា​ ទៅ​នឹងសេដ្ឋកិច្ចពិភពលោក កម្ពុជា​ចាំបាច់​ត្រូវ​លើកស្ទួយ​វិស័យ​ឯកជន​​ និងសហគ្រិនភាព ដោយ​ធ្វើ​យ៉ាង​ណាជួយ​សំរួល​អោយ​​វិនិយោគិន​និងអ្នក​ជំនួញ​ទាំងឡាយ អាច​ដាក់ទុនវិនិយោគនិងឬ​បើកមុខ​ជំនួញ​របស់​ពួក​គេ បានយ៉ាង​ងាយ​ស្រួល​។

មួយវិញទៀត ធនាគារពិភពលោក​បានបន្ថែម​ទៀតថា ការបង្កើត​នូវ​គោលនយោបាយ​សារពើពន្ធ​ដ៏​ត្រឹម​ត្រូវ​មួយ​របស់​រាជ​រដ្ឋាភិបាល អាច​ជា​មធ្យោបាយ​មួយ​ទប់ទល់​នឹង​ឥទ្ធិពល​ដ៏​អាក្រក់ កើត​ឡើង​ពីការ​បាត់បង់​ EBA ជាយថាហេតុ​​។

ចំពោះ​ស្ថានភាព​ម៉ាក្រូសេដ្ឋកិច្ច​របស់កម្ពុជា​នៅ​ពេលបច្ចុប្បន្ននេះ ធនាគារពិភពលោក​បានគូសបញ្ជាក់​ថា ទោះបីជា​កំណើនសេដ្ឋកិច្ចរបស់​កម្ពុជា​នៅ​តែ​មាន​ភាព​ខ្លាំងក្លា​យ៉ាង​ណា​ក៏​ដោយ ក៏​ធនាគារពិភពលោកបានប្រមើលមើលថា កំណើននេះ​នឹងថយ​ចុះមកនៅត្រឹម ៧% នៅ​ក្នុង​ឆ្នាំ ២០១៩ នេះ​។

យ៉ាងណាម៉ិញ ការនាំចេញ​​នូវ​ទំនិញ​ផ្សេង​ៗ​ចេញពី​កម្ពជា​ទៅ​កាន់ប្រទេស​ផ្សេង​ មាន​ការថយ​ចុះ​អាស្រ័យ​ដោយ​តំរូវ​ការ​នៅ​ក្នុង​បណ្តាប្រទេស​ទាំងនោះ​មានការថយ​ចុះ​។ ក៏ប៉ុន្តែ វិស័យសំណង់​នៅ​កម្ពុជា​នៅ​តែ​មាន​សន្ទុះ​ខ្លាំង​ក្លាដដែល​៕

Related Articles