We TV Cambodia

ទំហំពាណិជ្ជកម្ម កម្ពុជា-កាណាដា កើនដល់ជាង $1 ពាន់លានដុល្លារ

រូបថតៈ Facebook លោកនាយករដ្ឋមន្ត្រី ហ៊ុន សែន

ដោយៈ ទិន សុខាវុធ

នៅក្នុង​ជំណួប​ជាមួយ​លោក​ស្រី Domica Pottie កាលពី​ល្ងាច​ថ្ងៃ​ទី ១១ ខែ តុលា ឆ្នាំ ២០១៩ ​នៅ​ឯ​វិមាន​សន្តិភាព លោក​នាយករដ្ឋ​មន្ត្រី​ ហ៊ុន សែន បាន​លើក​ឡើងថា ទំហំ​ពាណិជ្ជកម្ម​រវាង​ប្រទេស​កាណាដា​និង​ប្រទេស​កម្ពុជា បាន​កើន​ដល់ជាង​ $1 ពាន់​លាន​ដុល្លារ​។ ហើយ​ទំនិញ​ដែល​កម្ពុជា​​នាំ​ចេញ​ទៅ​ប្រទេស​​កាណាដា ភាគ​ច្រើន​ជា​ផលិតផល​សំលៀក​បំពាក់​។

យោង​តាម​ទំព័រ Facebook របស់​សម្តេច ហ៊ុន សែន ជាការឆ្លើយ​តប លោក​ស្រី​ឯក​អគ្គរដ្ឋ​ទូត បាន​លើកឡើង​ថា ទំនាក់ទំនាក់​រវាង​កម្ពុជា​និងកាណាដា មានភាព​ល្អ​ប្រសើរ​ ហើយ​លោក​ស្រី​កោត​សសើរ​រាជ​រដ្ឋាភិបាល​កម្ពុជា ដែល​បានយកចិត្ត​ទុកដាក់​ដល់​ជីវភាព​របស់​កម្មករកម្មការិនី​ នៅ​ក្នុង​វិស័យ​ឧស្សាហកម្ម​សំលៀកបំពាក់​។

លោក​ស្រី​បាន​រៀបរាប់​ថា រាជរដ្ឋាភិបាលកម្ពុជា បានគិតគូរ​ពី​កន្លែង​ធ្វើការ ប្រាក់ខែ និង របស់​គាំពារ​សង្គម ដល់​កម្មករ​កម្មការិនី​ក្នុង​វិស័យ​នេះ ជាពិសេស​កម្មការិនី​មានផ្ទៃ​ពោះ​។

លើសពី​នេះ​ទៀត លោក​ស្រីឯក​អគ្គរដ្ឋទូតចប់អាណាត្តិ ក៏​បាន​កោតសរសើរ​ផងដែរ​ ពី​ការរីកចំរើន​របស់​កម្ពុជា ក្រោម​ការដឹកនាំ​របស់​សម្តេច​ ហ៊ុន សែន ។

យោង​តាមលោកនាយករដ្ឋ​មន្ត្រី ហ៊ុន សែន ប្រទេស​កាណាដាបានដើរតួនាទីយ៉ាងសំខាន់ ​នៅ​ក្នុង​ការស្វែង​សន្តិភាព​សំរាប់​​កម្ពុជា​។ មួយវិញទៀត ប្រទេស​កាណាដា​ក៏​បាននិងកំពុង​ចូល​រួម​យ៉ាង​សកម្ម​ផងដែរ​ក្នុង​ការអភិវឌ្ឍ​កម្ពុជា មាន​ដូច​​ជា​​ការបោស​សំអាត​មីន ការវិនិយោគ​ក្នុង​វិស័យ​ធនាគារ ​ពាណិជ្ជកម្ម និង​ វិស័យ​អប់រំ​ជាដើម​។

ទាក់ទង​នឹង​ការវិនិយោគក្នុង​វិស័យ​ធនាគារ កាលពីពេលថ្មីៗ​នេះ ធនាគារ​រដ្ឋ​នៃ​ប្រទេស​កាណាដា បាន​សំរេច​​ចិត្ត​ទិញ​យក​ភាគ​ហ៊ុន​ទាំងអស់​របស់​ធនាគារ Advanced Bank of Asia (ABA)​ ក្នុង​តំលៃ $63 លាន​ដុល្លារ សំរាប់​ភាគ​ហ៊ុន​ចំនួន​១០% ទៀតដែលនៅ​សល់​។ ហើយ កាល​ពី​ឆ្នាំ ២០១៦ ធនាគារ​មួយ​នេះ​​បាន​ទិញ​ភាគ​ហ៊ុន​ចំនួន ៩០% របស់​ធនាគារ ABA ។

ជាសរុប​ ធនាគារ​រដ្ឋ​នៃ​ប្រទេស​កាណាដា បាន​ចំណាយ​ដើម​ទុន​ប្រមាណ $320 លាន​ដុល្លារ ទិញ​យកភាគ​ហ៊ុនរបស់​ ABA ទាំងអស់​ ក្នុង​គោលបំណងវិនិយោគ​នៅ​លើ​ទីផ្សារ​​ហិរញ្ញវត្ថុ​នៅ​កម្ពុជា​។

លោក Louis Vachon អគ្គនាយក​នៃ​ធនាគាររដ្ឋ​កាណាដា បាន​ថ្លែង​ប្រាប់​អ្នកសារព័ត៌មានថា មាន​ហេតុផលច្រើនណាស់​ដែល​ធនាគាររបស់​លោក​សំរេច​បោះទុន​វិនិយោគ​នៅ​លើ​​ទីផ្សារហិរញ្ញវត្ថុ​​នៅ​កម្ពុជា​។ ហេតុផល​មួយ​នៅ​ក្នុង​ចំណោម​ហេតុ​ផលទាំងនោះ គឺអនាគតដ៏​ភ្លឺស្វាងរបស់​ប្រទេស​កម្ពុជា​៕

Related Articles