We TV Cambodia

ទំហំពាណិជ្ជកម្ម កម្ពុជា-ជប៉ុន កើនដល់ជាង $2 ពាន់លានដុល្លារ

រូបថតៈ Facebook ក្រសួងការបរទេសនិងសហប្រតិបត្តការអន្តរជាតិ

ដោយៈ ទិន សុខាវុធ

រយៈពេល​ ៥ ​ខែ​ដើម​ឆ្នាំ ២០១៩ នេះ
ទំហំពាណិជ្ជកម្ម​រវាង​កម្ពុជា​និង​​ជប៉ុន​ បាន​កើនដល់​ជាង $2 ពាន់​លាន​ដុល្លារ​។

យោង​តាម​សេចក្តី​ប្រកាសព័ត៌មាន​របស់​ក្រសួង​ការបរទេស​កម្ពុជា ចុះ​ផ្សាយ​នៅ​ទំព័រ Facebook របស់​ក្រសួង កាល​ពី​ថ្ងៃ​ទី ២៣ ខែ កញ្ញា ឆ្នាំ ២០១៩​ ការកើន​ឡើង​នៃ​ទំហំពាណិជ្ជកម្មនេះ បាន​កើត​ឡើង​ក្រោយ​ពី​មាន​ការ​ភ្ជាប់​ការហោះហើរ​ត្រង់​​រវាង​ប្រទេស​​កម្ពុជា​និង​​ប្រទេស​ជប៉ុន​។

លើស​ពី​នេះ​ទៀត ក្រសួង​បានបន្ថែម​ទៀត​ថា ការភ្ជាប់​ការហោះហើរ​ត្រង់​នេះ​រវាង​ប្រទេស​ទាំងពីរ
មិនត្រឹម​តែ​បង្កើន​នូវ​ទំហំ​ពាណិជ្ជកម្មតែ​ប៉ុណ្ណោះ​ទេ វា​ក៏​ជា​កត្តា​ជួយ​ជំរុញ​អោយ​មាន​ការផ្លាស់​ប្តូររវាង​ប្រជាជននិង​ប្រជាជន​នៃ​ប្រទេស​ទាំងពីរផងដែរ​។

«ឯក​ឧត្តម​ឧបនាយក​រដ្ឋ​មន្ត្រី [ប្រាក់​ សុខុន] បាន​កត់​សំគាល់​ដោយ​ពេញ​ចិត្ត នូវ​កំណើន​ពាណិជ្ជកម្ម​រវាង​ប្រទេស​ទាំងពីរ ដែល​ក្នុង​រយពេល​ ៥ ខែ ដើម​ឆ្នាំ ២០១៩ នេះ មានទំហំ​រហូត​ដល់​ជាង​ពីរ​ប៊ីលាន​ដុល្លារ​អាមេរិក ជា​ពិសេស​ក្រោយ​ពី​មាន​ការភ្ជាប់​ការហោះហើរ​ត្រង់ ដែល​មិន​ត្រឹម​តែ​បាន​ជំរុញ​ការផ្លាស់ប្តូរ​ប្រជាជន​នឹងប្រជាជន​ប៉ុណ្ណោះ​ទេ ថែម​ទាំង​រួមចំណែក​ក្នុង​ការជំរុញពាណិជ្ជកម្ម និង​ វិនិយោគ​ផង​ដែរ​» នេះ​ជាការ​លើក​ឡើង​របស់​ក្រសួង​នៅ​ក្នុង​សេចក្តីប្រកាសព័ត៌មាន​។

ជាការឆ្លើយ​តប ឯកអគ្គរាជ​ទូត​ជប៉ុន MIKAMI Masahiro ប្រចាំ​នៅ​កម្ពុជា ដែល​ទើប​មកដល់​ថ្មី
បាន​មានប្រសាសន៍​ថា រាល់​លើក​ដែល​លោក​នាយករដ្ឋ​មន្ត្រី ហ៊ុន សែន ទៅ​ទស្សនកិច្ច​នៅ​ប្រទេស​ជប៉ុន
លោក​នាយក​រដ្ឋ​មន្ត្រី​តែងតែ​ពន្យល់​ប្រាប់​ធុរជន​ជប៉ុន ពីភាព​អនុគ្រោះ​ក្នុង​ការវិនិយោគ​នៅ​កម្ពុជា​
ដែលជាប្រការ​ធ្វើអោយ​វិនិយោគិន​ជប៉ុន​បាន​សំរេច​ចិត្ត​មក​ដាក់​ទុន​វិនិយោគនៅ​ប្រទេស​កម្ពុជា​កាន់​តែ​ច្រើនឡើង​
ៗ។

មួយវិញទៀត លោក​ MIKAMI Masahiro ក៏​បាន​គូស​បញ្ជាក់​ផងដែរ​ពីកំណើន​នៃ​ពលរដ្ឋ​​កម្ពុជា​ចូល​ទៅ​ប្រទេស​ជប៉ុន​ជា​រៀង​រាល់​ឆ្នាំ​
ក្នុង​នាម​ជា​ពលករ​ឬ​ជា​​អ្នកជំនួញ​។

ទន្ទឹម​នឹងនេះ
លោកឯកអគ្គរាជទូត​ជប៉ុន​​ក៏​​បានថ្លែង​អំណរគុណ​ផង​ដែរ​​ដល់​រាជ​រដ្ឋាភិបាលកម្ពុជា​
ដែលបាននិងកំពុង​គាំទ្រ​​គំនិត​ផ្តួច​ផ្តើម «Free
and Open Indo-pacific» របស់​ប្រទេស​ជប៉ុន​ ក៏​ដូច​ជាគោលនយោបាយ​ការបរទេស​ផ្សេង​ៗ​ទៀត​របស់​ប្រទេស​ជប៉ុន​នៅ​លើ​ឆាកអន្តរជាតិ​៕

Related Articles