ដោយៈ ទិន សុខាវុធ
អ្នកជំនាញបានធ្វើការទស្សទាយថា ទំហំទឹកប្រាក់នៃការទូទាត់តាមប្រព័ន្ធឌីជីតល់នៅកម្ពុជា នឹងកើនដល់ ៥៧ ភាគរយ នៅក្នុងឆ្នាំ ២០២០ ខាងមុខនេះ ខណៈដែលនៅក្នុងឆ្នាំ ២០១៩ នេះ កំណើននៃការទូតទាត់ប្រាក់តាមប្រព័ន្ធនេះ មានចំនួន ៣៧ ភាគរយ។
លោក កែម បូរ៉ា អ្នកជំនាញមកពីស្ថាប័ន Mekong Strategic បានថ្លែងប្រាប់អ្នកសារព័ត៌មានថា ការប្រើប្រាស់ទូរស័ព្ទដៃក្នុងការទូទាត់ប្រាក់ បានកើនឡើងជាបណ្តើរៗហើយ ទន្ទឹមនឹងការលើកទឹកចិត្តរបស់ធនាគារជាតិ អោយប្រើប្រាស់ប្រព័ន្ធនេះ ក្នុងទូទាត់ការទិញលក់ទំនិញផ្សេងៗ។
ក៏ប៉ុន្តែ លោក កែម បូរ៉ា បានគូសបញ្ជាក់ថា ភាគីពាក់ព័ន្ធទាំងអស់ ត្រូវធ្វើយ៉ាងណាជួយលើកទឹកបន្ថែមទៀត ដល់ការប្រើប្រាស់ទូរស័ព្ទដៃ សំរាប់ការទូទាត់នៅក្នុងវិស័យធុរកិច្ច ពីព្រោះនៅពេលបច្ចុប្បន្ននេះ ការប្រើប្រាស់ទូរស័ព្ទក្នុងការទូទាត់ មានត្រឹមតែ ១០ ភាគរយនៃការទូទាត់សរុបតាមប្រព័ន្ធឌីជីតល់។
មួយវិញទៀត ការទូទាត់តាមប្រព័ន្ធឌីជីតល់ ក៏អាចជួយកាត់បន្ថយផងដែរនូវអំពើពុករលួយនៅតាមបណ្តាស្ថាប័នរដ្ឋ។
ទាក់ទងនឹងរឿងនេះ នៅក្នុងពិធីចែកសញ្ញាប័ត្រដល់និសិត្សនៃវិទ្យាស្ថានវ៉ាន់ដា លោកនាយករដ្ឋមន្ត្រី ហ៊ុន សែន បានប្រកាសលើកទឹកចិត្តអោយប្រជាពលរដ្ឋ អោយងាកមកប្រើប្រាស់ប្រព័ន្ធឌីជីតល់សំរាប់ការទូទាត់ប្រាក់ទាំងពួង ជាពិសេសការបង់ពន្ធជូនរដ្ឋ។ ដោយហេតុថា ការទូទាត់នេះអាចជួយកាត់បន្ថយអំពើពុករលួយ នៅតាមស្ថាប័នរដ្ឋ និងអាចជួយកាត់បន្ថយពេលវេលាផងដែរ៕
