ដោយៈ ទិន សុខាវុធ
លោក Patrick Murphy ឯកអគ្គរដ្ឋទូតនៃសហរដ្ឋអាមេរិក ប្រចាំនៅកម្ពុជា បានលើកឡើងថា សហគ្រាសធុនតូចនិងមធ្យម (SME) ជាកំលាំងចលករនៃការរីកចំរើនសេដ្ឋកិច្ចនៅកម្ពុជា។
ការលើកឡើងរបស់លោកទូត ត្រូវបានធ្វើឡើងនៅក្នុងជំនួបមួយ ជាមួយនឹងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីថ្ងៃទី ២២ ខែ វិច្ឆិកា ឆ្នាំ ២០១៩ នៅឯទីស្តីការរបស់ក្រសួងពាណិជ្ជកម្ម។
លើសពីនេះទៀត ដើម្បីគាំទ្រការអភិវឌ្ឍសហគ្រាសធុនតូចនិងមធ្យមនៅកម្ពុជា លោកឯកអគ្គរដ្ឋទូតក៏បានលើកឡើងផងដែរថា ស្ថានទូតអាមេរិកនឹងរៀបចំវេទិកាមូយ ស្តីពី «កសិ-ឧស្សាហកម្ម» នៅខែ កុម្ភៈ ខាងមុខ ក្នុងគោលបំណងអញ្ជើញក្រសួងពាណិជ្ជកម្ម អោយចូលរួមពិភាក្សាក្នុងវេទិកានេះ។
មួយវិញទៀត លោកទូតបានបន្ថែមទៀតថា ក្រុមហ៊ុនយក្សអាមេរិក GE ក៏មានបំណងចូលរួមវិនិយោគនៅក្នុងវិស័យថាមពលនៅកម្ពុជាផងដែរ ដើម្បីបំពេញតំរូវការនៅលើទីផ្សារថាមពល។
ទាក់ទងនឹងសហគ្រាសធុនតូចនិងមធ្យមនៅកម្ពុជា ធនាគារពិភពលោកក៏បានយល់ឃើញដូចគ្នាដែរថា កម្ពុជាចាំបាច់ត្រូវលើកស្ទួយវិស័យឯកជន បើសិនជាកម្ពុជាចង់បាននូវការរីកចំរើនសេដ្ឋកិច្ចមួយ ដែលបំរើផលប្រយោជន៍អោយអ្នកក្រ។
យោងតាមសេចក្តីប្រកាសព័ត៌មានមួយ ចុះផ្សាយនៅលើគេហទំព័ររបស់ធនាគារពិភពលោក កាលពីដើមខែវិច្ឆិកានេះ ធនាគារពិភពលោកបានលើកឡើងថា កត្តាមួយចំនួនដែលបាននិងកំពុងធ្វើអោយសេដ្ឋកិច្ចកម្ពុជារីកចំរើនរហូតមកដល់សព្វថ្ងៃនេះ នឹងមិនគ្រប់គ្រាន់ឡើយសំរាប់ធ្វើអោយសេដ្ឋកិច្ចកម្ពុជាបន្តរីកចំរើនតទៅមុខទៀត។ ប្រការនេះទាមទារចាំបាច់អោយកម្ពុជាត្រូវអនុវត្តការកែទំរង់ជាគន្លឹះមួយចំនួន ដើម្បីធានាអោយមានការរីកចំរើនសេដ្ឋកិច្ចមួយដែលបំរើផលប្រយោជន៍អោយជនក្រីក្រ។
បើតាមធនាគារពិភពលោក ការកែទំរង់ចាំបាច់ទាំងនោះរួមមាន៖ ការទាក់ទាញវិនិយោគក្នុងវិស័យឯកជន ក៏ដូចជាការលើកស្ទួយវិស័យឯកជន ក្នុងបរិបទសម័យកាលឌីជីតល់ ការធ្វើពិពិធកម្មសេដ្ឋកិច្ច ការតភ្ជាប់ទៅនឹងសេដ្ឋកិច្ចពិភពលោក ការលើកស្ទួយវិស័យជំនួញនិងហិរញ្ញវត្ថុ និង ការលើកទឹកចិត្តដល់គំនិតសហគ្រិនភាពនិងការបង្កើតថ្មី។
ឯចំណែកឯលោករដ្ឋមន្ត្រី ប៉ាន សូរស័ក្តិ ក៏យល់ឃើញដូចគ្នានេះដែរ។ កន្លងមក លោក បានប្រកាសនៅលើទំព័រ Facebook ថាលោកនឹងធ្វើយ៉ាងណាជំរុញវិស័យឯកជនជាពិសេសសហគ្រាសធុនតូចនិងមធ្យម (SME) អោយក្លាយទៅជា «ក្បាលម៉ាស៊ីននៃកំណើនសេដ្ឋកិច្ច» (The Engine of Economic Growth) ។
មួយវិញទៀត លោករដ្ឋមន្ត្រីក៏បានលើកទឹកចិត្តផងដែរ អោយគ្រឹស្ថានជំនួញ ផលិតករ ពាណិជ្ជករ ចូលរួមបញ្ចេញមតិយោបល់និងសំណូមពរទាំងឡាយ ក្នុងទិសដៅធ្វើអោយកាន់តែប្រសើរឡើងថែមទៀតនូវលក្ខខ័ណ្ឌទីផ្សារ ដើម្បីអាចអោយក្រសួងរបស់លោកអាចដោះស្រាយបញ្ហាដែលពួកគេកំពុងជួបប្រទះ៕
