We TV Cambodia

ទូតជប៉ុនថ្មីសរសើរពលករខ្មែរធ្វើការអោយក្រុមហ៊ុនជប៉ុនថា ជាមនុស្សឧស្សាហ៍ព្យាយាម

រូបថតៈ Facebook ក្រសួងការងារនិងបណ្តុះបណ្តាលវិជ្ជាជីវៈ

ដោយៈ ទិន សុខាវុធ

ឯកឧត្តម MIKAMI Masahiro ឯក​អគ្គរាជ​ទូត​ជប៉ុនថ្មី​​ប្រចាំ​នៅ​កម្ពុជា
បាន​សំដែង​ក្តី​សោមនស្ស​រីករាយ​ ដោយ​បាន​លើកឡើង​ថា ពលករខ្មែរ​ធ្វើការនៅ​ប្រទេសជប៉ុន
សុទ្ធ​តែ​អ្នក​ឧស្សាហ៍​ព្យាយាម និងត្រូវ​បានក្រុមហ៊ុនជប៉ុន​ជា​ច្រើនកោតសរសើរ​។

យោង​តាម​ទំព័រ Facebook  របស់​ក្រសួង​ការងារ​និង​បណ្តុះបណ្តាល​វិជ្ជាជីវៈ
នៅក្នុង​កិច្ចពិភាក្សាការងារជាមួយ​នឹងលោករដ្ឋ​មន្ត្រី អ៊ិត​ សំហេង កាលពី​ថ្ងៃ​ទី
១៤ ខែ តុលា ឆ្នាំ ២០១៩ នៅ​ឯ​​ទីស្តីការរបស់​ក្រសួង លោក​ឯក​អគ្គរាជ​ទូត​បាន​មាន​ប្រសាសន៍​ថា
មាន​​តំណាង​ក្រុមហ៊ុនជប៉ុនជា​ច្រើន​ ទាំង​នៅ​ប្រទេស​ជប៉ុន ទាំង​នៅ​ប្រទេស​កម្ពុជា
បាន​ពោល​សរសើរ​ពី​ភាពឧស្សាហ៍​ព្យាយាម​របស់​ពលករកម្ពុជា​។

«ឯកឧត្តមបានជួបសំណេះសំណាលជាមួយតំណាងក្រុមហ៊ុនរបស់ជប៉ុន
ដូចជាក្រុមហ៊ុនអ៉ីអនជាដើម ដែលកំពុងដំណើរការនៅប្រទេសកម្ពុជា ដោយពួកគេបានរាយការណ៍
និងកោតសរសើរពីការខិតខំប្រឹងប្រែងធ្វើការរបស់បុគ្គលិកជនជាតិខ្មែរ ដែលបានបង្កឱ្យមានបរិយាកាសការងារល្អ
ពិសេសគឺមានភាពអត់ធ្មត់ ឧស្សាហ៍ព្យាយាម និងស្មោះត្រង់ចំពោះការងារ»
នេះ​ជា​សំណេរ​របស់​​ក្រសួង​ នៅ​លើ​ទំព័រ Facebook ។

លើសពី​នេះ​ទៀត
លោក​ឯកអគ្គរាជ​ទូត ក៏​បានសន្យា​ផង​ដែរ​ថា​ប្រទេស​ជប៉ុន​នឹង​ខិតខំ​ធ្វើ​យ៉ាង​ណា​​ជួយ​រាជ​រដ្ឋាភិបាល​កម្ពុជា
ក្នុង​ការ​លើក​ស្ទួយ​វិស័យ​ឧស្សាហកម្ម ក្នុង​គោល​បំណងប្រកួតប្រជែង​ជាមួយ​នឹងប្រទេស​ដទៃទៀតក្នុង​តំបន់​។

«ឯកឧត្តមឯកអគ្គរាជទូតជប៉ុន
ក៏បានមើលឃើញអំពីសារៈសំខាន់ នៃការប្រកួតប្រជែងលើវិស័យឧស្សាហកម្មរបស់កម្ពុជា
ដោយឯកឧត្តមបានប្ដេជ្ញាថានឹងជួយពង្រឹង និងពង្រីកឧត្តមភាពប្រកួតប្រជែងលើវិស័យឧស្សាហកម្មរបស់កម្ពុជា
ឱ្យកាន់តែខ្លាំងក្លាបន្ថែមទៀត។» នេះ​ជា​ការលើកឡើង​របស់​ក្រសួង​។

ជា​លទ្ធផល
ឯកឧត្តម MIKAMI
Masahiro បាន​បន្តទៀត​ថា
ក្នុង​នាម​លោក​ជា​ឯក​អគ្គ​រាជ​ទូតតំណាងអោយ​ប្រទេស​ជប៉ុន លោក​នឹង​ខិត​ខំ​ធ្វើយ៉ាង​ណា​ជួយ​ពលករ​កម្ពុជា​
អោយ​ទៅ​ធ្វើ​ការនៅ​ប្រទេស​ជប៉ុន​ អោយ​បានកាន់ច្រើនឡើងថែមទៀត​។

ជាការឆ្លើយតប លោក​រដ្ឋ​មន្ត្រី អ៊ីត សំហេង ​បាន​ប្រកាស​គាំទ្រ​យ៉ាង​ពេញ​ទំហឹង​នូវ​បំណង​ល្អរបស់​លោក​ទូត​ជប៉ុន​។
ហើយ​លោក​រដ្ឋ​មន្ត្រី​ក៏បានលើក​សរសើរ​ផង​ដែរ​ ពីលក្ខខ័ណ្ឌការងារ​ល្អ​សំរាប់ពលករ​កម្ពុជា
នៅ​តាម​ក្រុមហ៊ុន​ជប៉ុន​ទាំងឡាយ ទាំង​នៅ​ក្នុង​ស្រុកនិងនៅក្រៅ​ស្រុក​។

យោង​តាមលោករដ្ឋ​មន្ត្រី
ពលករ​ខ្មែរ​ទៅ​ធ្វើការ​នៅ​ប្រទេស​ជប៉ុន ក្នុង​នាម​ជាកម្មសិក្សាការី មានចំនួន​ប្រមាណ​ជា
១២,០០០ នាក់។ ហើយ​មក​ទល់​នឹង​ខែ​ កញ្ញា ឆ្នាំ ២០១៩ នេះ កម្ពុជា​បាន​បញ្ជូន​ពលករ​ជំនាញ​ចំនួន​
១១ នាក់ ជា​​លើក​ដំបូង​ទៅ​បំរើ​ការ​នៅ​ប្រទេស​ជប៉ុន​៕

Related Articles