We TV Cambodia

ទូតកាណាដា៖ ការផ្តល់ភាពអនុគ្រោះពន្ធអោយដល់ប្រទេសកំពុងអភិវឌ្ឍន៍ មិនភ្ជាប់លក្ខខ័ណ្ឌសិទ្ធិមនុស្សឡើយ

រូបថតៈ ក្រសួងការបរទេស និងសហប្រតិបត្តិការអន្តរជាតិ

ដោយៈ ទិន សុខាវុធ

លោក​ជំទាវ Donica Pottie ឯកអគ្គរដ្ឋ​ទូត​កាណាដា​ប្រចាំ​នៅ​កម្ពុជា​ចប់​អាណត្តិ បាន​លើក​ឡើង​ថា រដ្ឋាភិបាល​កាណាដា​តែងតែ​​ផ្តល់​ភាព​អនុគ្រោះពន្ធ (GSP)​ អោយ​ដល់​បណ្តា​ប្រទេស​កំពុង​អភិវឌ្ឍន៍​ទាំងឡាយ រួម​ទាំង​ប្រទេស​កម្ពុជា​ផង​ដែរ​​នោះ ដោយ​គ្មានភ្ជាប់​ទៅ​នឹង​លក្ខខ័ណ្ឌ​សិទ្ធ​មនុស្ស​ណា​មួយ​ឡើយ​។ ពោល​គឹ គោលដៅដ៏​ចំបង​របស់​ប្រទេស​កាណាដា​​នៃ​ការផ្តល់​ភាព​អនុគ្រោះពន្ធ​អោយ​ដល់​ប្រទេស​ក្រីក្រ គឺ​គ្មាន​អ្វី​ពី​ការជួយ​​ធ្វើ​អោយ​សេដ្ឋកិច្ច​របស់​ប្រទេស​ទាំង​នោះ​រីក​ចំរើន​ឡើយ​។

យោង​តាម​សេចក្តី​ប្រកាស​ព័ត៌មាន​ ចុះ​ផ្សាយ​នៅ​លើ​ទំព័រ
Facebook របស់​ក្រសួង​ការបរទេស​
និងសហប្រតិបត្តិការអន្តរជាតិ លោក​ជំទាវ Donica Pottie បាន​ជួប​សន្ទនា​ការងារ​ជាមួយ​នឹង​លោក​រដ្ឋ​មន្ត្រី​ក្រសួង​ការបរទេស
ប្រាក់ សុខុន នៅ​ឯ​​ស្ថានទូត​កម្ពុជា​ប្រចាំ​ទីក្រុង​ បាងកក ប្រទេស​ ថៃ​ កាល​ពី​សប្តាហ៍​មុន។

មួយវិញទៀត ក្រៅ​ពី​ផ្តល់​ភាព​អនុគ្រោះពន្ធ រដ្ឋាភិបាល​កាណាដា​ តាម​រយ​ធនាគារ​ជាតិ​នៃ​ប្រទេស​កាណាដា ក៏​បានបោះទុន​វិនិយោគ​យ៉ាង​ច្រើន​សន្ធឹក​សន្ធាប់​ផង​ដែរ នៅ​ក្នុង​វិស័យ​ហិរញ្ញវត្ថុ​នៅ​កម្ពុជា ដោយ​ទិញ​យក​ភាគ​ហ៊ុន​ទាំងអស់​របស់​ធនាគារ ABA ​។

ដូចនេះ រដ្ឋាភិបាល​កាណាដា ក៏​ដូច​ជា​អ្នកជំនួញ​ជនជាតិ​កាណាដា​ទាំងឡាយ
ដែល​កំពុង​ធ្វើការរក​ស៊ី​នៅ​កម្ពុជា តែងតែង​មានបំណង​ចង់បាន​សុខសន្តិភាព​ និង​ស្ថេរភាព​នយោបាយ​​​មួយ​យ៉ាង​ពេញ​លេញ​នៅ​កម្ពុជា​។

ធនាគារ​រដ្ឋ​នៃ​ប្រទេស​កាណាដា
បាន​សំរេច​​ចិត្ត​ទិញ​យក​ភាគ​ហ៊ុន​ទាំងអស់​របស់​ធនាគារ Advanced Bank of Asia (ABA)​
ក្នុង​តំលៃ $63
លាន​ដុល្លារ សំរាប់​ភាគ​ហ៊ុន​ចំនួន​១០% ទៀតដែលនៅ​សល់​។

កាល​ពី​ឆ្នាំ
២០១៦ ធនាគារ​រដ្ឋ​នៃ​ប្រទេស​កាណាដា​បាន​ទិញ​ភាគ​ហ៊ុន​ចំនួន ៩០% របស់​ធនាគារ ABA ដែលជា​ធនាគារ​ដ៏​ធំ​លំដាប់​ទី ៦
នៅ​ក្នុង​ប្រទេស​កម្ពុជា​នៅ​ពេល​នោះ​​។

ជាសរុប​
ធនាគារ​រដ្ឋ​មួយ​នេះបាន​ចំណាយ​ដើម​ទុន​ប្រមាណ $320 លាន​ដុល្លារ
ទិញ​យកភាគ​ហ៊ុនរបស់​ ABA ទាំងអស់​
ក្នុង​គោលបំណងវិនិយោគ​នៅ​លើ​ទីផ្សារ​​ហិរញ្ញវត្ថុ​នៅ​កម្ពុជា​។

លោក
Louis Vachon អគ្គនាយក​នៃ​ធនាគាររដ្ឋ​កាណាដា
បាន​ថ្លែង​ប្រាប់​អ្នកសារព័ត៌មានថា មាន​ហេតុផលច្រើនណាស់​ដែល​ធនាគាររបស់​លោក​សំរេច​បោះទុន​វិនិយោគ​នៅ​លើ​​ទីផ្សារហិរញ្ញវត្ថុ​​នៅ​កម្ពុជា​។
ហេតុផល​មួយ​នៅ​ក្នុង​ចំណោម​ហេតុ​ផលទាំងនោះ
គឺអនាគតដ៏​ភ្លឺស្វាងរបស់​ប្រទេស​កម្ពុជា​។

យ៉ាងណាម៉ិញ កាលពីខែសី​ហា​​កន្លង​ទៅ ធនាគារ ABA បាន​ចុះ​ឈ្មោះជាមួយ​នឹង​​ស្ថាប័ន​ទី​ផ្សារ​មូលបត្រ​កម្ពុជា ហៅ​កាត់​ថា CSX ក្នុង​​គោលបំណង​ប្រមូល​យក​ប្រាក់​កំចី​​អោយបាន​ដល់​ប្រមាណជា $21 លាន​ដុល្លារ​។

យោង​តាម​របាយការណ៍របស់ ABA រហូត​មក​ដល់​ខែកក្កដា​ឆ្នាំ ២០១៩ ទុន​សរុប​របស់​ធនាគារ ABA បាន​កើនដល់ $3.81 ពាន់​លានដុល្លារ ដែល​ជា​កត្តា​ធ្វើ​អោយ​ធនាគារ ABA ស្ថិត​ក្នុង​លំដាប់​ថ្នាក់​ទី ៣ នៅ​កម្ពុជា​នៅ​ពេល​បច្ចុប្បន្ន​នេះ​៕

រូបភាពៈ គេហទំព័រធនាគារ ABA

Related Articles