ទូកុងតឺន័រជិត ២ពាន់ ធ្លាក់ចូលទៅក្នុងមហាសមុទ្រប៉ាស៊ីហ្វិក ដោយសារជួបឧបទ្ទវហេតុខ្យល់ព្យុះ

នាវាដឹកទូកុងតឺន័រ ដែលនៅក្រោមការគ្រប់គ្រងរបស់ក្រុមហ៊ុន NYK Shipmanagement ជប៉ុន បានធ្លាក់លិចចូលទៅក្នុងមហាសមុទ្រប៉ាស៊ីហ្វិក ក្នុងនោះទូកុងតឺន័រជិត ២,០០០ រងការខូចខាតយ៉ាងដំណំ ខណៈនាវាត្រូវបានវាយប្រហារដោយខ្យល់ព្យុះដ៏ខ្លាំងមួយ ដែលមានចំងាយ ២,៩៦០គីឡូម៉ែត្រ ពីភាគពាយព្យនៃកោះហាវ៉ៃ នេះបើយោងតាមការឱ្យដឹងពីសារពត៏មាន​ Reutersប្រទេសជប៉ុន។ គួរជម្រាបឱ្យដឹងផងដែរថា នាវាដឹកទូកុងតឺន័រ ONE Apus ដែលជាកម្មសិទ្ធិរបស់ក្រុមហ៊ុន Chidori Holding LLC បានធ្វើដំណើរចេញពីកំពង់ផែក្នុងស្រុក Yantian ប្រទេសចិន ក្នុងបំណងឆ្ពោះទៅកាន់ទីក្រុង Long Beach រដ្ឋកាលីហ្វ័រញ៉ា។ ដោយឡែក​ ចំនួននៃការខាតបង់ និងការខូចខាតទូកុងតឺន័រសរុប ត្រូវបានគេប៉ាន់ស្មានថា អាចមានលើសពី ១,៩០០ ទូកុងតឺន័រឯនោះ ដែលក្នុងនោះ ៤០ ទូកុងតឺន័រ ត្រូវបានគេជឿថាផ្ទុកទៅដោយទំនិញគ្រោះថ្នាក់។ គួរជម្រាបផងដែរថា យោងទៅតាមរបាយការណ៍ឆ្នាំ ២០២០ ស្តីពីការខាតបង់ទូកុងតឺន័ររបស់គណៈកម្មការដឹកជញ្ជូនពិភពលោកបានឱ្យដឹងថា ជាមធ្យមក្នុងរយៈពេល ១២ ឆ្នាំកន្លងមកនេះ ទូកុងតឺន័រចំនួន ១,៣៨២ ត្រូវបានលិចចូលទៅក្នុងសមុទ្រជារៀងរាល់ឆ្នាំ។

អត្ថបទដោយ៖ ​ពិសី