ភ្នំពេញ៖ រដូវកាលធុរេន កាន់តែខិតជិតមកហើយ រាប់ចាប់ពីខែឧសភា រហូតទៅដល់ខែកក្កដា ជារដូវកាលដែលពេញសម្បូរណាស់ នៃការប្រមូលផលធុរេនប្រចាំឆ្នាំ។ កម្ពុជា ប្រមាណជាង៥ឆ្នាំចុងក្រោយនេះ មានការផ្កត់ផ្គង់ តម្រូវការទីផ្សារធុរេនបានល្អគ្រប់គ្រាន់ណាស់ ព្រោះបច្ចុប្បន្នដំណាំនេះ អាចដាំដុះបាន ច្រើនកន្លែង ក្នុងខេត្ដនានា ក្នុងប្រទេសកម្ពុជា។ ប៉ុន្ដែគួរកត់សំគាល់ថា ដំណាំទិន្នផលមួយនេះ នៅតាមបណ្ដាប្រទេសជិតខាង ដូចជាប្រទេសថៃ វៀតណាម ពួកគេបានពង្រីកទីផ្សារ ឈានទៅដល់នាំចេញទៅក្រៅប្រទេស ដែលទីផ្សារធំរបស់គេគឺ ប្រទេសចិន។
ប្រទេសចិន គឺជាទីផ្សារនាំចូលធំបំផុត លើដំណាំបន្លែផ្លែឈើដែល បានចិញ្ចឹមកសិករវៀតណាម និងថៃ រាប់ពាន់លានដុល្លារ ក្នុងមួយឆ្នាំៗ។ ហើយដំណាំផ្លែឈើ ទាំងនោះក៏មានរាប់បញ្ចូល ធុរេន ក្នុងនោះដែរ។ កាលពីឆ្នាំ២០១៧-១៨ ចិនបានរឹតបណ្ដឹង ទំនិញនាំចូលពីវៀតណាម ជាពិសេសផ្ដោតលើ ទំនិញផ្លែឈើ ខណៈប្រទេសវៀតណាម ប្រើប្រាស់សារធាតុគីមីលើសកម្រិត បណ្ដាលឲ្យទំនិញទាំងនោះ ត្រូវបាននាំចូលបានតែ ៥០ភាគរយ នៃគុណភាពដែលទទួលយកបាន។ ទំនិញផ្លែឈើជាច្រើន ដូចជាគូលែន ស្រកានាគ ធុរេន នឹងទំនិញផ្សេងទៀត ត្រូវវៀតណាម ច្រាលចេញមកលើទីផ្សារកម្ពុជា និងមួយចំនួនទៀត ត្រូវចរាចរណ៍ក្នុងស្រុក ឬត្រូវបំផ្លាញចោល។ ជារៀងរាល់ឆ្នាំចាប់ពី ២០១៧ – ២០១៩ ថៃបាននាំចេញធុរេន ទៅកាន់ទីផ្សារប្រទេសចិនមិនក្រោម ១ពាន់តោននោះទេ ដោយប្រភេទធុរេន ស្ថិតក្នុងលំដាប់ថ្នាក់ ស្ទើតែអាចប្រជែងជាមួយនឹងធុរេន ម៉ាឡេស៊ី។ សម្រាប់ឆ្នាំនេះ ២០២០ ទំនងប្រហែលជាពិបាក ក្នុងការនាំចេញធុរេនទៅកាន់ប្រទេសចិន ព្រោះថាមកទល់ពេលនេះ ប្រទេសរងគ្រោះដោយ មេរោគ កូរ៉ូណា កំពុងតែមាន វិបត្ដិយ៉ាងខ្លាំង លើវិស័យសេដ្ឋកិច្ច ដែលមិនត្រឹមតែការនាំចូល ឬចេញនោះទេ សុទ្ធតែមានការលំបាក។
ជាក់ស្ដែងបច្ចុប្បន្ន ប្រសិនជាប្រទេសចិន នៅតែមានភាពវឹកវរបែបនេះ ត្រឹមតែ២ទៅ៣ ខែខាងមុខ ទៀត ទំនិញទាំងនោះទំនងជាអាច ចរាចរណ៍មកកាន់ប្រទេសកម្ពុជាច្រើន។
អត្ថបទដោយ៖ អឿ អ៊ុយ
ប្រភព៖ ក្រៅស្រុក
