We TV Cambodia

ទីបំផុត​ឥណ្ឌាបានបាញ់បង្ហោះ​យាន​អវកាស «Chandrayaan-2» ប្រកប​ដោយ​ជោគជ័យ

ដោយៈ ទិន សុខាវុធ

ទីបំផុត​​ទីភ្នាក់ងារ​អវកាស​ឥណ្ឌា​បាន​បាញ់​បង្ហោះ​យាន​អវកាស «Chandrayaan-2» ចូល​ទៅ​ក្នុង​ទីអវកាស​ប្រកប​ដោយ​ជោគជ័យ កាល​ពី​ថ្ងៃ​ច័ន្ទ​កន្លង​ទៅ​នេះ​ មួយ​សប្តាហ៍​ក្រោយ​ពី​បេសកកម្ម​នេះ​ត្រូវ​បាន​ផ្អាកដោយ​សារ​បញ្ហា​បច្ចេកទេស​។

បេសកកម្មរបស់​យាន​គ្មានមនុស្ស​បើកមួយ​នេះ គឺ​ដើម្បី​​ទៅ​ចុះចត​នៅ​តំបន់​ប៉ូល​ខាងត្បូង​នៃ​ស្ថានព្រះ​ច័ន្ទ ក្នុង​គោលបំណង​ធ្វើការស្រាវជ្រាវរុករក​បន្ថែម​ទៀត​ពី​ប្រភព​ទឹក​នៅ​ទីនោះ ដែល​ត្រូវ​​បាន​ថត​រកឃើញ​​ពី​គន្លង​តារាវិថី​​នៃ​ស្ថាន​ព្រះច័ន្ទ (moon orbit) ដោយ​យាន​អវកាស​​ឥណ្ឌា​ដំបូង​គេ​ មាន​ឈ្មោះថា «Chandrayaan-1» ​​។

ឈ្មោះ​របស់​យាន​អវកាសឥណ្ឌា Chadrayaan ជា​ពាក្យ​សឹស្រ្កឹត​មក​ពី​ពាក្យ​ថា Chandra+yaan ដែល​មាន​ន័យ​ជា​ភាសា​ខ្មែរ​ថា ច័ន្ទ្រា+យាន ឬ​ យានច័ន្ទ្រា​ និង​ដែល​ត្រូវ​បាន​គេ​បក​ប្រែ​ជា​ភាសា​អង់គ្លេស​ថា «moon craft» ។

មួយវិញ​ទៀត វា​ជា​រឿង​មួយ​ដ៏​គូរ​អោយ​ភ្ញាក់​ផ្អើល​ជាទី​បំផុត ដែល​នៅ​ថ្ងៃ​ទី ២៤ ខែ កញ្ញា ឆ្នាំ ២០០៩ ​មជ្ឍមណ្ឌល​​អវកាស​ឥណ្ឌា​ហៅ​កាត់​ថា ISRO​ (Indian Space Research Organization) បានប្រកាស​ប្រាប់​ពិភពលោក​អោយ​ដឹង​ថា​ពួក​គេ​បាន​រក​ឃើញ​វត្តមាន​ «ទឹក» នៅ​លើ​ស្ថាន​ព្រះ​ច័ន្ទ នៅ​ក្នុង​តំបន់​ប៉ូល​ខាង​ត្បូង ដែល​ជា​ទី​កន្លែង​ងងឹត​រហូត​គ្មានពន្លឺ​ថ្ងៃ​។

ដំណឹង​នេះ​បាន​ធ្វើ​អោយ​អ្នក​ឯកទេស​អវកាស​អាមេរិកាំង រុស្សី អឺរ៉ុប និង ជប៉ុន ជា​ច្រើន​នាក់​បាន​ភ្ញាក់​ដាច់​ផ្ងារ​ធ្លាក់​ពី​លើ​កៅអី​ទាំង​មិន​ដឹង​ខ្លួន​ ព្រោះវា​ជារឿង​មួយ​ដែល​មិន​អាច​អោយ​ជឿ​បាន​ ព្រោះ​ពួក​គេ​បាន​ចំណាយ​ពេល​អស់​រាប់សិប​ឆ្នាំ​មក​ហើយ​ ក្នុង​ការស្រាវជ្រាវ​រុក​នៅលើ​ស្ថាន​ព្រះ​ច័ន្ទ ហើយ​ពួក​គេ​មិន​ដែល​ជួប​នឹង​វត្តមាន​ «ទឹក» ម្តង​ណា​ឡើយ​។ មួយវិញទៀត បើ​មាន​ «ទឹក» ហើយ មនុស្ស​និងសត្វ​​ក៏​នឹង​អាច​ទៅ​រស់​នៅ​លើ​ស្ថាន​ព្រះ​ច័ន្ទ​បាន​ដោយ​គ្មានបញ្ហា​អ្វី​ឡើយ​។

ក្រោយ​ពី​លេច​ឮ​ដំណឹងនេះភ្លាម បីខែ​ក្រោយ​មក​ គឺ​នៅ​ថ្ងៃ​ទី ១៣ ខែ វិច្ឆិកា ឆ្នាំ ២០០៩ មជ្ឍមណ្ឌល​អវកាស​​អាមេរិកាំង NASA បាន​ផលិត​​​នូវ​យាន​អវកាស​ភ្ជាប់​ដោយ​ផ្កាយ​រណប​មួយ​ ហៅ​កាត់​ថា LCROSS​ (Lunar Crater Observation and Sensing Satellite) និង​បាន​បង្ហោះ​យាន​អវកាស​នោះ​ទៅ​ថត​មើល​ទីតាំង​ដែល​មាន​វត្តមាន​ទឹក​នៅ​លើ​ស្ថាន​ព្រះច័ន្ទ ដែល​ត្រូវ​​បាន​បញ្ជាក់​ដោយ​មជ្ឍមណ្ឌល​អវកាស​ឥណ្ឌា ISRO ។

បន្ទាប់​មក អង្គការ NASA ក៏​បាន​ប្រកាស​បញ្ជាក់​បន្ថែម​ថា ពិត​ជាមាន​វត្តមាន​​ទឹក​នៅ​ទីនោះ​មែន។ លើស​ពី​នេះទៀត អង្គការ​ NASA ក៏​បញ្ជាក់​ផង​ដែរ​ថា​ ក្រៅ​ពិ​តំបន់​ប៉ូល​ខាង​ត្បូង ទឹក​ក៏​អាច​មាន​វត្តមាន​ទៅ​កន្លែង​ផ្សេង​ៗ​ទៀត​​នៅ​លើ​ស្ថាន​ព្រះ​ច័ន្ទ​ផង​ដែរ​។

ជាលទ្ធផល ទី​ភ្នាក់ងារ​អវកាស​របស់​ប្រទេស​ជឿនលឿន​ទាំងឡាយ​បាន​ងាក​មក​ស្រាវជ្រាវ​រុករក​នៅ​លើ​ស្ថានព្រះ​ច័ន្ទ​សារ​ជា​ថ្មី​ឡើង​វិញ ក្នុង​គោល​បំណង​​រក​ទីតាំង​ដ៏សម​ស្រប​ណា​មួយ​ដើម្បី​តាំងលំនៅ​ស្ថាន ឬ​បោះទីតាំង​យោធា​នៅ​លើ​ស្ថាន​ព្រះ​ច័ន្ទ​។ ហើយ​សហរដ្ឋ​អាមេរិក និង​ប្រទេស​បារាំងក៏​បាន​ប្រកាស​ផង​ដែរ​ថា នឹង​បង្កើត​កងទ័ព​អវកាស​។ ដូចនេះ តើ​សង្គ្រាម​នៅ​លើ​ស្ថាន​ព្រះច័ន្ទ​រវាង​ប្រទេស​មហា​អំណាច​ទាំងឡាយ​​អាច​នឹង​កើត​មានឡើង​ទេ នៅ​ក្នុង​ការវាតទី​ដណ្តើម​ទឹក​ដី​គ្នា​នៅ​លើ​ស្ថាន​ព្រះ​ច័ន្ទ​?

យើង​គួរ​រំលឹក​ឡើង​វិញ​ថា ភព​និមួយ​ៗ​នៅ​ក្នុង​ប្រព័ន្ធ​អាទិត្យ រួម​ទាំងផែនដី​យើង​ផង​ដែរ​នោះ ធ្វើ​ដំណើរជុំវិញ​ព្រះអាទិត្យ​ឬ​វិលជុំវិញ​ព្រះ​អាទិត្យ​តាម​គន្លង​មួយដ៏​ជាក់លាក់ ដែល​ភាសា​អង់គ្លេស​ហៅ​ថា orbit ដែលយើង​អាច​បកប្រែ​ជា​ភាសា​ខ្មែរ​ថា «គន្លង​គោចរ» ឬ​ «តារា​វិថី» ។ ចំពោះ​ផែន​ដី ការវិលជុំវិញ​ព្រះ​អាទិត្យ​មួយ​ជុំ​ ត្រូវ​បានកំណត់ថា​ជា​រយពេលមួយឆ្នាំ ដែល​មានចំនួន ៣៦៥ ថ្ងៃ​និង ៦ ម៉ោង​។ លើស​ពី​នេះ​ទៀត ផែនដីក៏​បាននិងកំពុង​វិលជុំ​វិញ​ខ្លួនឯង​ផងដែរ​ គឺ​ក្នុង​រយៈ​ពេល​ ២៤ ម៉ោង​ក្នុង​មួយ​ជុំ​។

ក៏ប់ុន្តែ សំរាប់​ភព​ព្រះច័ន្ទ​វិញ ត្រូវ​បានគេកំណត់​ថា​​វា​ជា​ភព​មួយ​ដែល​ជា​រណប​រ​បស់​ផែនដី ដោយ​ហេតុ​ថា​​ភព​​នេះ​វិល​ជុំវិញ​ផែនដី និង​ដើរតាម​ផែនដី​ជាប់​រហូត​​ ​បើ​ផែន​ដី​ទៅ​ដល់​ទីណា ភព​ព្រះ​ច័ន្ទ​នឹងទៅ​ដល់​ទីនោះ​ដែរ​។ មួយវិញ​ទៀត ​ភព​ព្រះ​ច័ន្ទវិល​ជុំវិញ​ផែនដី​ក្នុង​រយពេល ២៧ ថ្ងៃ​ ​និង ៤ ម៉ោង​​​។ ផ្ទុយទៅវិញ មួយ​ថ្ងៃ​នៅ​លើ​ស្ថាន​ព្រះ​ច័ន្ទ​មាន​រយៈពេល​យូរ​ជាង​នៅ​លើ​ផែនដី​ឆ្ងាយណាស់ គឺ​មាន​រហូត​ដល់​ទៅ ៧០៨​ ម៉ោង​ឯណោះ ពោលគឺ​រយៈពេល​ប្រហែល​ជា​មួយ​ខែ​នៅ​ផែនដី​។

ជាលទ្ធផល បើគេ​បាញ់​បង្ហោះ​ផ្កាយ​រណបឬ​ស្ថានីយ​អវកាស អោយចេញផុត​ពី​ទំនាញ​ផែនដី គ្រឿងចក្រ​ទាំងនោះ​នឹងត្រូវ​ស្ថិត​​នៅ​ក្នុង​គន្លង​តារាវិថី​របស់​ផែនដី​ជា​ស្វ័យប្រវត្តិ ហើយ​វា​នឹងវិល​ជុំវិញ​ព្រះអាទិត្យ​​ក្នុង​ល្បឿនមួយ​ស្មើ​នឹង​​ល្បឿនរបស់​ផែនដី​ដែរ​​៕

Related Articles