We TV Cambodia

ទីក្រុងរណបជ្រោយចង្វារនឹងជាទីក្រុងពាណិជ្ជកម្ម

រូបថតៈ ក្រុមហ៊ុន OCIC

 
 

ដោយៈ ទិន សុខាវុធ

ទីក្រុង​រណបជ្រោយចង្វារ ដែលកំពុង​ត្រូវ​បានវិនិយោគដោយ​ក្រុមហ៊ុន OCIC (Overseas Cambodian Investment Corporation) នឹងក្លាយ​ជា​ទីក្រុង​ពាណិជ្ជកម្ម​ក្នុង​ពេល​ឆាប់​ៗ​នេះ​ ដែលនៅ​ក្នុង​​នោះ នឹងមានមជ្ឍមណ្ឌល​ពាណិជ្ជកម្ម​ទំនើបទាន់​សម័យ ដែល​មានលក្ខណ​ជា​ទីក្រុងវៃឆ្លាត (Smart City) ។

លោក​ ទូច​ សំណាង ដែល​ជា​ថ្នាក់ដឹកនាំ​មួយរូប​ នៅ​ក្នុង​​ក្រុមហ៊ុន OCIC បានលើកឡើងថា ក្រុមហ៊ុន​របស់​លោក​រួម​ជាមួយ​នឹង​អ្នកវិនិយាគ​ដទៃ​ទៀត បាន​និងកំពុង​បោះ​ទុនវិនិយោគ​ប្រមាណ​ជាង $3,000 លាន​ដុល្លារ​ក្នុង​ការអភិវឌ្ឍ​ទីក្រុង​រណបមួយ​នេះ អោយក្លាយ​ទៅ​ជា​មណ្ឌលពាណិជ្ជកម្ម​ដ៏​ទំនើប​និងទាន់​សម័យ​។

លោក​បានបន្តទៀត​ថា បន្ទាប់ពី​បានរួម​សហការជាមួយ​នឹង​អាជ្ញាធរ​រួច​មក ក្រុមហ៊ុន OCIC របស់​លោក បាន​សំរេចកាត់ដី​ប្រមាណ​ ១០២ ហិកតា អោយ​ទៅប្រជាពលរដ្ឋ​។ បន្ទាប់មកទៀត ក្រោយ​ពីកាត់ដីសំរាប់​ធ្វើផ្លូវ ​ធ្វើ​សួន​ច្បារ ​និង​ប្រព័ន្ធ​លូ ក្រុមហ៊ុន OCIC នៅសល់ដីប្រហែលជា ១១០ ហិកតា​​សំរាប់​ការអភិវឌ្ឍ​ទីក្រុង​រណបមួយ​នេះ​។

ក៏ប៉ុន្តែ ផ្ទៃដីប្រមាណ​ជា ១០ ហិកតា របស់​ក្រុមហ៊ុន​ត្រូវ​ប្រគល់​អោយ​ទៅ​​រាជ​រដ្ឋាភិបាល សំរាប់​ការសាងសង់ស្ថាប័ន​មួយ​ចំនួន​​មានដូច​ជា សាលាឧទ្ធរណ៍ សាកលវិទ្យាល័យ​ភូមិន្ទ សាលាវិចិត្រសិល្បៈ សាលាគយ សហព័ន្ធ​យុវជន និង សាលាខណ្ឌ​ជា​ដើម។ ដូចនេះ ផ្ទៃ​ដី​នៅសល់សំរាប់ការសាងសង់​ទីក្រុងរណប មានចំនួនប្រមាណជា ១០០ ហិកតា​តែប៉ុណ្ណោះ​។

លោកបានបង្ហើបអោយ​ដឹង​ទៀតថា នៅ​ពេល​បច្ចុប្បន្ននេះ ក្រុមហ៊ុនរបស់​លោកបានបញ្ចប់ការសាងសង់ផ្លូវប្រវែងសរុប ៣០ គីឡូម៉ែត្រ និងប្រព័ន្ធ​លូ​ទឹក​ប្រវែង ៦០ គីឡូម៉ែត្រ​ ដោយ​ចំណាយ​ថវិកាប្រមាណ $150 លាន​ដុល្លារ។ ទន្ទឹមនឹងនេះ​ ក្រុមហ៊ុន​ក៏​កំពុង​សាងសង់​ ផ្ទះល្វែង អគារពាណិជ្ជកម្មកំំពស់ពី ១០ ទៅ ១២ ជាន់ និង​អគារការិយាល័យ​កណ្តាលកំពស់ ២០ ជាន់​ផងដែរ​​។

ទីក្រុង​រណបជ្រោយ​ចង្វារ លាតសន្ធឹងលើសង្កាត់ចំនួន ៣ គឺ​សង្កាត់ជ្រោយ​ចង្វារ ព្រែកលាប និង​សង្កាត់ ព្រែកតាសេក ស្ថិតក្នុង​ខណ្ឌ​ជ្រោយ​ចង្វារ​។

ទាកទង​នឹងរឿង​នេះ លោក ម៉េត មាសភ័ក្តី អ្នកនាំពាក្យសាលាក្រុង​ភ្នំពេញ បានលើកឡើងថា ទោះបីជា​ក្រុមហ៊ុន OCIC បានទទួលសិទ្ធិក្នុងការអភិវឌ្ឍក្រុង​រណប​ជ្រោយ​ចង្វារ​យ៉ាងណា​ក៏​ដោយ ក៏ក្រុមហ៊ុន OCIC ចាំបាច់​ត្រូវ​ធ្វើតាមប្លង់​គោលអភិវឌ្ឍ​ក្រុង ដែលត្រូវ​បានកំណត់ឡើង​ដោយ​រាជ​រដ្ឋាភិបាល​ដែរ​ ក្នុង​គោលបំណងធានា​អោយ​ទីក្រុង​ថ្មីនេះ ប្រកបដោយ​និរន្តរភាព និងមានផលប៉ះពាល់តិចបំផុត​ដល់​បរិស្ថាន​៕

Related Articles