We TV Cambodia

តម្រូវការទីផ្សារ ជម្រុញឲ្យកសិករក្នុងខេត្តស្វាយរៀងបង្វែរពីការធ្វើស្រូវ មកជាការដាំអំពៅវិញ

តម្រូវការទីផ្សារ ជម្រុញឲ្យកសិករក្នុងខេត្តស្វាយរៀងបង្វែរពីការធ្វើស្រូវ មកជាការដាំអំពៅវិញ
ចំការអំពៅក្នុងខេត្តស្វាយរៀង (ប្រភព៖ ឯកឧត្តម វេង សាខុន)

មន្ទីរកសិកម្មខេត្តស្វាយរៀង បានជំរុញឲ្យប្រជាកសិករបង្វែរពីការធ្វើស្រូវមកដាំអំពៅស្ករវិញ ដើម្បីបង្កើននូវប្រាក់ចំណូលបន្ថែមក្នុងគ្រួសារ ខណៈអំពៅស្ករកំពុងតែមានតំលៃនៅលើទីផ្សារ និងមានតម្រូវការខ្ពស់ផងដែរ។

ចំការអំពៅក្នុងខេត្តស្វាយរៀង (ប្រភព៖ ឯកឧត្តម វេង សាខុន)

លោក ថាច់ រតនា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀង បានមានប្រសាសន៍ថា បច្ចុប្បន្នដំណាំអំពៅស្ករកំពុងតែមានទីផ្សារហើយតំលៃក៏ល្អដែរ ដូច្នេះប្រជាកសិករគួរងាកមកដាំដំណាំអំពៅវិញ ស្របពេលដែលដីនៅក្នុងខេត្តនេះអំណោយផលលើដំណាំអំពៅ។

ចំការអំពៅក្នុងខេត្តស្វាយរៀង (ប្រភព៖ ឯកឧត្តម វេង សាខុន)

លោកបន្តថា មន្ទីរកសិកម្មបានសហការជាមួយក្រុមហ៊ុនចំនួន ៥ក្នុងខេត្ត ដោយបានប្រមូលទិញអំពៅពីប្រជាកសិករ ធ្វើអោយកសិករងាយស្រួលក្នុងការលក់អំពៅចេញ។ មួយវិញទៀត អំពៅស្ករក្នុង ១ហិកតា ទទួលបានផល ៦០តោន ហើយក្នុងមួយតោនតម្លៃ ៣៩ដុល្លា បើប្រៀបធៀបទៅនឹងការធ្វើស្រូវវិញ គឺទទួលបានផលច្រើនជាងពី៤ ទៅ ៥ដងឯណោះ។

ចំការអំពៅក្នុងខេត្តស្វាយរៀង (ប្រភព៖ ឯកឧត្តម វេង សាខុន)

លើសពីនេះទៀត មន្ទីរកសិកម្មបានធ្វើការជំរុញការផ្សព្វផ្សាយដល់ប្រជាកសិករដែលមានដីជាប់នឹងចំការដំណាំអំពៅ ដែលធ្វើស្រែបានទិន្នផលទាប អាចពិចារណាធ្វើការផ្លាស់ប្ដូរមុខដំណាំ ដោយកុំពឹងផ្អែកទៅលើដំណាំស្រូវតែមួយមុខ ពោលត្រូវផ្លាស់ប្ដូររកមុខដំណាំណាដែលគិតថាមានតម្លៃខ្ពស់ ហើយចំណាយដើមទុនតិចដើម្បីយើងមានលទ្ធភាពបង្កើនការងារផង បង្កើនប្រាក់ចំណូលផង អញ្ចឹងយើងបានណែនាំអោយពួកគាត់ធ្វើការផ្ទេរមុខដំណាំ ដោយបង្វែរមកដាំអំពៅ ឬដំណាំផ្សេងៗទៀត។

ចំការអំពៅក្នុងខេត្តស្វាយរៀង (ប្រភព៖ ឯកឧត្តម វេង សាខុន)

សូមបញ្ជាក់ថា នៅក្នុងខេត្តស្វាយរៀងមានផ្ទៃដីដាំអំពៅស្ករប្រមាណ ៦,៤០០ហិកតា និងមានក្រុមហ៊ុនចំនួន៥ កំពុងវិនិយោគលើដំណាំអំពៅស្កររួមមាន៖ មានក្រុមហ៊ុនផាត់ សំណាង, ក្រុមហ៊ុនស្វាយរៀង ស៊ូហ្គើខេន, ក្រុមហ៊ុនមិត្តភាព, ក្រុមហ៊ុនធើន រ៉ាយ ហ្វៀល និងក្រុមហ៊ុន កុយ សារ៉េន៕

អត្ថបទដោយ៖ Nevin

Related Articles