We TV Cambodia

ដំណើរការណ៍ច្បាប់អាជីវកម្មមួយត្រូវឆ្លងកាត់ក្រសួងច្រើន ជាឱកាសមន្ដ្រីមួយចំនួនអាចរកស៊ីក្រៅ

ដំណើរការណ៍ច្បាប់អាជីវកម្មមួយត្រូវឆ្លងកាត់ក្រសួងច្រើន ជាឱកាសមន្ដ្រីមួយចំនួនអាចរកស៊ីក្រៅ

រូបភាពឯកសារ

ពោធិ៍សាត់៖សម្ដេច ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បានថ្លែងក្នុងពិធី​សម្ពោធ និង​ប្រកាស​ដាក់​ឲ្យ​ដំណើរការ​ជា​ផ្លូវការ​អង្គភាព​ច្រកចេញចូល​តែមួយ និង​ការិយាល័យ​ប្រជាពលរដ្ឋ នៅ​ខេត្តពោធិ៍សាត់ ​កាលពី​ព្រឹក​ថ្ងៃ​ពុធ ថ្ងៃទី​២២ ខែមករា ឆ្នាំ​២០២០ ថា ៖ ​ពលរដ្ឋ​មិនអាច​ដាក់​លិខិត​តែមួយ​កន្លែង​នោះឡើយ ដោយ​ពួកគាត់​ត្រូវ​ទៅ​ដាក់​មន្ទីរ​ពាក់ព័ន្ធ​ពី ២​ទៅ​៣​ក្រសួង ទម្រាំ​បាន​ក្រដាស​ស្នាម​ដល់​ប្រធាន​មន្ទីរ ត្រូវការ​ពេល​យូរ ហើយ​ក៏ជាការទុក​ឱកាស​ដល់​មន្ត្រី​ខិលខូច​មួយចំនួន អាចរកលុយបានក្រៅ ដោយការទារ​សុំ​បង់​កម្រៃ​ក្រៅផ្លូវការ​។ បន្ថែមពីលើនោះទៅទៀត សម្ដេច ក៏បានសង្កត់ធ្ងន់ផងដែរថា ក៏បាន​ស្នើ​ទៅ​ក្រសួង​ស្ថាប័ន​ពាក់ព័ន្ធ​ផ្ទេរ​សេវាកម្ម​ទៅកាន់​ការិយាល័យ​ច្រកចេញចូល​តែមួយ ប៉ុន្តែ​ប្រធាន​មន្ទីរ និង​មន្ត្រី​ការងារ​ជំនាញ​នៅតែ​ជា​អ្នកសម្រេច​ដដែល​។

បច្ចុប្បន្ន កម្ពុ​ជាមាន​ការិយាល័យ​ច្រកចេញចូល​តែមួយ​ចំនួន​១១៥ ដែល​ក្នុងនោះ​មាន​២៧​ក្រុង ៤៧​ស្រុក និង​១៤​ខណ្ឌ ដែល​ស្មើនឹង​៥៧​ភាគរយ​នៃ​ការិយាល័យ​ច្រកចេញចូល​តែមួយ​ថ្នាក់ក្រុង ស្រុក ខណ្ឌ ទូទាំងប្រទេស​។​

ការិយាល័យ​ច្រកចេញចូល​តែមួយ ត្រូវ​ផ្តល់​សេវា​រដ្ឋបាល​សាធារណៈ ជា​កញ្ចប់​នៅ​កន្លែង​តែមួយ​ ហើយសេវា​កម្មនេះ នឹងទទួលបាន​ការគាំទ្រ​យ៉ាងច្រើន​ពី​សំណាក់​ប្រជាពលរដ្ឋ ហើយ​អាច​ប្រមូល​ចំណូល​ចូល​ថវិកាជាតិ​ប្រកបដោយ​តម្លាភាព និង​ទប់ស្កាត់​អំពើពុករលួយ​។​

ដោយ៖ អឿ អ៊ុយ

ប្រភព៖ ក្នុងស្រុក

Related Articles