ដំណឹងល្អ!! រដ្ឋាភិបាលសម្រេចការបន្ធូរបន្ថយការអនុវត្តពន្ធកាត់ទុកលើការប្រាក់សម្រាប់អ្នកផ្ដល់កម្ចី

យោងតាមសេចក្ដីប្រកាសរបស់រដ្ឋាភិបាលកម្ពុជា ស្ដីពីវិធានការបន្ថែម ដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចនៅក្នុងបរិការណ៍នៃវិបត្តិ, ការស្ដារ និងជំរុញកំណើនសេដ្ឋកិច្ចកម្ពុជាក្រោយពីវិបត្តិនៃជំងឺកូវីដ-១៩ បានឲ្យដឹងថា រដ្ឋាភិបាលកម្ពុជា បានសម្រេចការបន្ធូរបន្ថយការអនុវត្តពន្ធកាត់ទុកលើការប្រាក់សម្រាប់ អ្នកផ្ដល់កម្ចីក្នុងស្រុក និងក្រៅស្រុក (Withholding Tax)។

សេចក្ដីប្រកាសរបស់រដ្ឋាភិបាល ស្ដីពីការបន្ធូរបន្ថយ ការអនុវត្តពន្ធកាត់ទុក លើការប្រាក់សម្រាប់ អ្នកផ្ដល់កម្ចីក្នុងស្រុក និងក្រៅស្រុក (Withholding Tax) នេះដែរ រួមមាន៖

ទី១៖ សម្រាប់កម្ចីថ្មី៖

– ទម្លាក់អត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុ ទាំងខាងក្រៅ និងខាងក្នុងស្រុក មកនៅត្រឹម៥% (ទាំងការខ្ចីពីប្រទេសដែលមាន DTA និងការខ្ចីពីប្រទេស ដែលមិនមាន DTA) សម្រាប់ឆ្នាំ២០២១។

– ទម្លាក់អត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុ ទាំងខាងក្រៅ និងខាងក្នុងស្រុក មកនៅត្រឹម១០% (ទាំងការខ្ចីពីប្រទេសដែលមាន DTA និងការខ្ចីពីប្រទេសដែលមិនមាន DTA) សម្រាប់ឆ្នាំ២០២២។

– ពិនិត្យ និងកែតម្រូវអត្រាពន្ធកាត់ទុកលើកម្ចីធនាគារ និងស្ថាប័នមីក្រូហិរញ្ញវត្ថុ ទាំងខាងក្រៅ និងខាងក្នុងស្រុក ឲ្យឡើងដល់កម្រិតធម្មតាស្របតាមច្បាប់ និងបទប្បញ្ញត្តិជាធរមានវិញនៅឆ្នាំ២០២៣។

ទី២៖ សម្រាប់កម្ចីចាស់៖

– ពិនិត្យ និងកែតម្រូវអត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុ ទាំងខាងក្រៅ និងខាងក្នុងស្រុកឲ្យឡើងដល់កម្រិតធម្មតាស្របតាមច្បាប់ និងបទប្បញ្ញត្តិជាធរមានវិញនៅឆ្នាំ២០២២។

អត្ថបទដោយ៖ Nevin