ដោយ៖ ពេជ្រ
ត្បូងឃ្មុំ៖ ការដំណាំផ្កាចន្ធូ របស់កសិករម្នាក់ក្នុងខេត្តត្បូងឃ្មុំ ទទួលបានប្រាក់ចំនូលគួរសម ដោយក្នុងមួយខែអាចប្រមូលផលបាន៤ដង រៀងរាល់ថ្ងៃសិល៍។ នេះបើតាមផេកហ្វេសប៊ុក ផ្លូវការរបស់ឯកឧត្តមវេង សាខុន រដ្ឋមន្រ្តីក្រសួងកសិកម្ម រុក្ខប្រមាញ់ និង នេសាទ ថ្ងៃ ២០ កក្កដា ឆ្នាំ២០២០។
ដំណាំផ្កា ចន្ធូ របស់កសិករឈ្មោះ ហ៊ឹង ប៊ុនហេង នៅភូមិ អូររំចេក ឃុំត្រពាំងជង ស្រុកបាកានដែលបានដាំផ្កាចន្ធូ លើផ្ទៃដីតូចដែលមានទំហំតែ កន្លះ ហិកតា តែប៉ុណ្ណោះ តែការដាំដុះរបស់គាត់កំពុងប្រមូលផលបានល្អគ្រាន់បើ ។
លោក ហ៊ឹង ប៊ុនហេង ជាម្ចាស់ចំការដំណាំផ្កាចន្ធូ បានរៀបរាប់អោយដឹងថា ដំណាំផ្កាចន្ធូ បានដាំរយះពេលមួយឆ្នាំ មកហើយ ចំណាយថវិកាទិញពូជ ជី អង្កាម និងប្រេងបូមទឹក អស់ថវិកាសរុប ៨ ៦៨០ ០០០ រៀល ហើយចំពោះការប្រមូលផលវិញគឺបានធ្វើឡើង ០១ សប្តាហ៍ ម្តង។
លោកបន្តថា ការទទួលបានប្រាក់ចំណូលក្នុងការកាត់ផ្កាមួយលើកបាន ៤០០ ០០០ រៀល ទៅ ៥០០ ០០០ រៀល រៀងរាល់ថ្ងៃសីល ដែលក្នុងរយៈពេល០១ ខែកាត់ផ្កាប្រមូលផលបានចំនួន ០៤ លើក។
ម្ចាស់ចម្ការរូបនេះ ក៏បានបន្ថែមទៀតថា ចំពោះការលក់វិញ គឺដឹកយកទៅលក់នៅក្រៅខេត្តដូចជា ខេត្តបាត់ដំបង បន្ទាយមានជ័យ សៀមរាប និងទីក្រុងភ្នំពេញ និងពេលខ្លះឈ្មួញមកទទួលទិញដល់ផ្ទះ ដោយ០១ឆ្នាំ ចំណូលពីការលក់បានចំនួន ១៧ ២០០ ០០០ រៀល ចំណេញសរុបបានចំនួន ៨ ៥២០ ០០០រៀលផងដែរ៕
