ប៉ុន្មានសប្តាហ៍ក្រោយពីមានការរកឃើញអ្នកផ្ទុកមេរោគ COVID-19 ក្នុងប្រទេសកម្ពុជារួចមក រដ្ឋាភិបាលបានចាត់វិធានការមួយចំនួនដើម្បីទប់ស្កាត់ការរីលរាលដាលនៃមេរោគមួយ ហើយការផ្អាកការសិក្សាដោយបិទសាលារៀនជាបណ្ដោះអាសន្នក៏ជាវិធានការមួយផងដែរក្នុងចំណោមវិធានការផ្សេងទៀតរបស់រាជរដ្ឋាភិបាលកម្ពុជា។
ជាមួយគ្នានឹងការបិទសាលារៀនជាបណ្ដោះអាសន្ននេះដែរ ក្រសួងអប់រំ យុវជន និងកីឡាក៏បានរៀបចំកម្មវិធីសិក្សាតាមអនឡាញដើម្បីជួយឲ្យសិស្សានុសិស្សអាចសិក្សានៅតាមផ្ទះបានដោយខ្លួនឯងផងដែរ ដោយគ្រាន់តែប្រើអ៊ីនធឺណេត។ មិនតែប៉ុណ្ណោះ ក្រៅពីក្រសួងអប់រំ ក៏មានក្រសួងពត៌មានផងដែរដែលបានចូលរួមក្នុងការជួយដល់ការសិក្សារបស់សិស្សតាមរយៈប្រព័ន្ធអនឡាញនេះ។
យោងតាមប្រសាសន៍របស់ ឯកឧត្ដម ខៀវ កាញារីទ្ធ រដ្ឋមន្រ្ដីក្រសួងព័ត៌មាននៅក្នុងកិច្ចប្រជុំជាលើកទី២ ដើម្បីពិនិត្យត្រៀមរៀបចំកម្មវិធីបង្រៀនពីចម្ងាយ (E-Learning) បានឲ្យដឹងថា ក្រសួងព័ត៌មានបានរៀបចំជាកម្មវិធីបង្រៀនតាមរយៈ App ក្រសួងព័ត៌មាន និងការផ្សាយបន្តផ្ទាល់ទៅកាន់ទូរទស្សន៍ Satellite តេជោ DTV ផងដែរ។ សម្រាប់ទូរទស្សន៍ DTV នេះទៀតសោត គឺសិស្សានុសិស្សអាចបើកមើលបានតាមបណ្តាញផ្កាយរណបរបស់ ទូរទស្សន៍ តេជោ DTV ដោយមិនចាំបាច់ប្រើអ៊ិនធឺណេតនោះទេ។
ឯកឧត្ដម ខៀវ កាញារីទ្ធ ក៏បានបន្ថែមថា កិច្ចការងារនេះធ្វើឡើងដើម្បីជាការចូលរួមចំណែកជាមួយ ក្រសួងអប់រំ យុវជន និងកីឡា ដែលកំពុងធ្វើការបង្រៀនតាមរយៈ App ផ្លូវការរបស់ខ្លួនផងដែរ។
អត្ថបទដោយ៖ Nevin
ប្រភព៖ ក្រសួងពត៌មាន
