ដោយៈ ទិន សុខាវុធ
កសិករម្នាក់រស់នៅក្នុងខេត្ត កោះកុង បានថ្លែងប្រាប់អ្នកកាសែតជប៉ុន Nikkei Asian Review ថា ដីនៅក្នុងតំបន់របស់គាត់បានឡើងថ្លៃ ១០ ដងច្រើនជាងមុន ទោះជានៅក្នុងតំបន់នោះ ពុំទាន់មានសេវាទូរស័ព្ទដៃយ៉ាងណាក៏ដោយ។
ចំពោះអ្នកជំនាញវិស័យអចលនទ្រព្យ ដីឡើងថ្លៃនៅក្នុងតំបន់ណាមួយ គឺជាសញ្ញាវិជ្ជមានបញ្ជាក់ប្រាប់ថា នៅក្នុងតំបន់នោះ វិស័យជំនួញមានការរីកចំរើនដ៏គួរអោយកត់សំគាល់។
ក៏ប៉ុន្តែ ក៏មានកាសែតបរទេសមួយចំនួនបានលើកឡើងថា ដីឡើងថ្លៃនៅក្នុងខេត្ត កោះកុង គឺជារឿងដ៏គូរអោយព្រួយបារម្ភទៅវិញ។ តើពិតជាដូច្នេះមែនដែរឬទេ?
យោងតាមអ្នកជំនាញអចលនទ្រព្យ មូលហេតុមួយដែលធ្វើអោយដីនៅក្នងខេត្ត កោះកុង ឡើងថ្លៃ គឺការសាងសង់ព្រលានយន្តហោះអន្តរជាតិដ៏ធំមួយមានឈ្មោះថា «តារាសាគរ» មានទីតាំងស្ថិតនៅចន្លោះស្រុក ថ្មបាំង និងស្រុក បុទុមសាគរ ខេត្ត កោះកុង ។
គំរោងនេះត្រូវបាននិងកំពុងវិនិយោគដោយក្រុមហ៊ុនចិន Union Development Group (UDG) ដោយរួមសហការជាមួយក្រុមហ៊ុន MY និងក្រុមហ៊ុន ស៊ីឈួន ហួយស៊ីងគ្រុប។
លោក WANG CHAO អនុប្រធានក្រុមហ៊ុន UDG បានអោយដឹងថា ក្រុមហ៊ុនរបស់លោកគ្រោងបញ្ចប់ការសាងសង់ព្រលានយន្តហោះនៅក្នុងខេត្ត កោះកុង នៅត្រឹមខែ ឧសភា ឆ្នាំ ២០២០ ហើយការហោះហើរសាកល្បងជាលើកដំបូង ក៏នឹងត្រូវធ្វើឡើងនៅក្នុងខែ តុលា ឆ្នាំ ២០២០ ខាងមុខនេះដែរ។
លោកបានបន្ថែមថា នៅពេលព្រលានត្រូវបានសាងសង់រួច ក្រុមហ៊ុនរបស់លោកនឹងធ្វើការបណ្តុះបណ្តាលជំនាញទាក់ទងនឹងព្រលានយន្តហោះ អោយដល់ប្រជាពលរដ្ឋខ្មែរដែលមានសមត្ថភាព អាចទទួលយកជំនាញនេះបាន ក្នុងគោលបំណងប្រើប្រាស់កំលាំងពលកម្មក្នុងស្រុក អោយបានច្រើនបំផុត បើអាចធ្វើទៅបាន។
លោកអនុប្រធានក្រុមហ៊ុន UDG បានបន្តទៀតថា អាកាសយានដ្ឋានអន្តរជាតិខេត្ត កោះកុង ស្ថិតនៅក្នុងទីតាំងភូមិសាស្ត្រដ៏ល្អប្រសើរ ព្រោះជាប់នឹងមាត់សមុទ្រ និងស្ថិតក្នុងតំបន់ភ្នំ ដែលអាចអនុញ្ញាតអោយមានការហោះហើរត្រង់ពីនិងទៅកាន់ទីក្រុង ប៉ារីស នៃប្រទេសបារាំង និងទៅកាន់ប្រទេសផ្សេងៗទៀត។ កត្តានេះនឹងធ្វើអោយភ្ញៀវទេសចរណ៍អន្តរជាតិ មកលេងកំសាន្តនៅប្រទេសកម្ពុជា ជាពិសេសខេត្ត កោះកុង កាន់តែមានចំនួនច្រើនឡើង ៗ ។ មួយវិញទៀត អាកាសយានដ្ឋានមួយនេះ អាចទទួលភ្ញៀវទេសចរណ៍បានចំនួន ៥ លាននាក់ក្នុងមួយឆ្នាំ។
ជាមួយនឹងទុនវិនិយោគជំហានដំបូងចំនួន $2,200 លានដុល្លារ រួមនឹងផ្លូវរត់ហោះហើរមានប្រវែង ៣,២០០ ម៉ែត្រ និងមានទទឹង ៤៥ ម៉ែត្រ អាកាសយានដ្ឋានតារាសាគរនឹងអាចអនុញ្ញាតអោយយន្តហោះធុនធំមានប្រភេទដូចជា Boeing 777 និង Airbus 340 ជាដើម អាចចុះចតនៅលើព្រលានយន្តហោះនោះបានដោយគ្មានបញ្ហាអ្វីឡើយ៕
