We TV Cambodia

ចំណូលពន្ធដារក្នុង​ឆ្នាំ ២០១៩ បាន​ចំនួន​ជាង $6,000 លាន​ដុល្លារ

ចំណូលពន្ធដារក្នុង​ឆ្នាំ ២០១៩ បាន​ចំនួន​ជាង $6,000 លាន​ដុល្លារ

ដោយៈ ទិន សុខាវុធ

នៅក្នុង​ឆ្នាំ ២០១៩ កន្លង​ទៅ​នេះ រាជ​រដ្ឋាភិបាល​ប្រមូល​ពន្ធ​បាន​ប្រមាណ​ជា​ជាង $6,000 លាន​ដុល្លារ គឺ​កើន​លើសផែនការដែល​​បាន​គ្រោង​ទុក យោង​តាម​តួលេខ​របស់​ក្រសួងសេដ្ឋកិច្ច​និងហិរញ្ញវត្ថុ​។

ជាក់ស្តែង ចាប់​តាំង​ពីខែ​មករា រហូត​ដល់​ខែ​ធ្នូ ​ក្នុង​ឆ្នាំ ២០១៩ អគ្គនាយកដ្ឋានពន្ធដារ និង​អគ្គនាយកដ្ឋាន​គយ​និង​រដ្ឋាករ ដែលសុទ្ធតែ​នៅ​ក្រោម​ឱវាទ​របស់​ក្រសួង​សេដ្ឋកិច្ច​និង​ហិរញ្ញវត្ថុ បាន​ប្រមូលពន្ធ​បាន​លើស​ផែនការបានចំនួន $1,485 លាន​ដុល្លលារ​។

តាម​ការគ្រោងទុក រាជ​រដ្ឋាភិបាល​បាន​កំណត់​ថា ចំណូល​ពន្ធក្នុង​ឆ្នាំ ២០១៩ អាច​កើនដល់ចំនួន $4,560 លាន​ដុល្លារ ដែលនៅ​ក្នុង​នោះ ចំណូល​ពន្ធ​ប្រមាណ​ជា $2,260 លាន​ដុល្លារ នឹង​បាន​មក​ពី​អគ្គនាយកដ្ឋានគយ​និងរដ្ឋាករ និង​ចំណូល​ពន្ធ​ប្រមាណ​ជា $2,300 លាន​ដុល្លារ​ទៀត នឹងបានមកពី​អគ្គនាយកដ្ឋានពន្ធដារ​។

ទាក់ទង​នឹង​បញ្ហា​នេះ លោក​នាយក​រដ្ឋ​មន្ត្រី ហ៊ុន សែន ​ធ្លាប់​បាន​លើក​ឡើង​ថា អគ្គនាយកដ្ឋានពន្ធដារបានប្រមូល​ពន្ធលើសការគ្រោងទុក​ប្រមាណ​ជា $900 លាន​ដុល្លារ ចំណែក​ឯខាង​អគ្គនាយក​ដ្ឋានគយវិញ បានប្រមូល​ពន្ធ​លើសផែនការ​បាន​ប្រមាណ​ជា $500 លាន​ដុល្លារ​។

លោក​នាយករដ្ឋ​មន្ត្រី​បាន​អោយ​ដឹង​ទៀត​ថា ចំណូល​ពន្ធ​លើស​ការគ្រោង​ទុក​នេះ ជា​លទ្ធផល​បាន​មកពី​កម្មវិធី​​កែទំរង់​ប្រព័ន្ធ​គ្រប់គ្រង​ហិរញ្ញវត្ថុ​សាធារណ​​របស់​រាជ​រដ្ឋាភិបាល ជាពិសេស​គឺ​ការធ្វើ​ឌីជីតល់ភាវូបនីយកម្មប្រព័ន្ធ​គ្រប់គ្រងហិរញ្ញវត្ថុ​​។

ជាលទ្ធផល លោក​នាយក​រដ្ឋ​មន្ត្រី​បាន​លើកឡើងថា ចំណូល​ពន្ធ​លើសផែនការនេះ បង្ហាញ​ថា​ កម្ពុជា​បាន​និង​កំពុង​ក្លាយ​ទៅជាប្រទេស​មួយ​ ដែល​ប្រកាន់នូវ​វប្បធម៌​បង់​ពន្ធ ដូច​ជា​ប្រទេស​ដទៃ​ទៀត​ នៅ​ជុំវិញពិភពលោក​យើង​នេះ​ដែរ​៕

Related Articles