We TV Cambodia

គ្មានអីពិបាកផង! តោះគ្នាយើងមករៀនធ្វើនំ«ចាក់ចុល»

គ្មានអីពិបាកផង! តោះគ្នាយើងមករៀនធ្វើនំ«ចាក់ចុល»

គ្រប់គ្នាប្រហែលជាស្គាល់និងធ្លាប់ញុំា នំចាក់ចុល  ហើយមែនទេ? ចាក់ចុល គឺជានំរបស់ខ្មែរយើង តាំងពីបុរាណមកម្លេះ ដែលមានរសជាតិផ្អែម​​​ ហើយប្រជាជនខ្មែរយើង ហៅតាមសម្លេង នៅពេលដែលយើងចាក់ម្សៅនំចូលគឺវាពុះឆុលនៅក្នុងឆ្នាំងខ្ទះតែម្ដង ក្រោយមកពាក្យនេះក៏ត្រូវបានប្ដូរទៅជា នំចាក់ចុល ដោយយោងទៅតាមពាក្យនិយាយធម្មតា។ វាមានលក្ខណៈងាយស្រួលក្នុងការធ្វើ ដោយផ្អែកតាមរូបមន្តខាងក្រោម៖

គ្រឿងផ្សំ៖

១. ម្សៅអង្ករខ្សាយ ២៥០ក្រាម

២. ម្សៅដំណើប ១០០ក្រាម

៣.​ ស្ករត្នោត ១០០ក្រាម

៤. ស្ករស ២៥ក្រាម

៥. ខ្ទិះដូង ១៥០មីលីលីត្រ

៦. ទឹក ១៥០មីលីលីត្រ

៧. ពងមាន់ ១គ្រាប់

៨. អំបិល ១ស្លាបព្រាកាហ្វេ

៩. . វ៉ានីឡា ១ស្លាបព្រាកាហ្វេ ( មិនបាច់ដាក់ក៏បាន)

 

របៀបធ្វើ៖

. លាយគ្រឿងស្ងួតជាមុនសិន គឺចាក់ម្សៅអង្ករខ្សាយនិងម្សៅអង្ករដំណើបចូលក្នុងចានធំមួយ ដាក់អំបិល ស្ករស និងស្ករត្នោត រួចហើយយើងត្រូវកូរវាឲ្យសព្វ។ ចំពោះគ្រឿងទឹក យើងចាក់ខ្ទិះដូងដាក់ក្នុងចានមួយ ចាក់ទឹកវ៉ានីឡាចូល បន្ទាប់មកគោះពងទាមួយគ្រាប់ចូលហើយវាយវាឲ្យម៉ត់ល្អ។​ ចាក់គ្រឿងទឹកដែលយើងបានធ្វើរួចនោះចូលក្នុងចានគ្រឿងស្ងួត ហើយកូរវាបណ្តើរៗដោយចាក់ទឹកចូលម្ដងបន្តិចដើម្បីកូរវាឲ្យបានសព្វចូលគ្នាល្អ ។ ពេលកូរវាសព្វហើយ យើងត្រូវយកថង់ផ្លាស្ទីកឬក្រណាត់មកគ្របវាទុករយៈពេល៦ម៉ោង ឬ១យប់ដើម្បីឲ្យម្សៅឡើងបានល្អ។ បន្ទាប់មក យកខ្ទះ​ ដាក់ខ្លាញ់ល្មមហើយបើកភ្លើងឲ្យក្ដៅ ។ ពេលខ្លាញ់ក្ដៅល្មមហើយ ចាក់ម្សៅនំដោយវាស់ក្នុងកូនពែងមួយចូលក្នុងខ្ទះបំពង នៅពេលនំឡើងក្រហមទាំងសងហើយខាងនោះ យើងនឹងទទួលបាន នំចាក់ចុល ដ៏ឈ្ងុយឆ្ងាញ់ពិសារ។

អត្ថបទដោយ៖ ពិសី

Related Articles