We TV Cambodia

គំរោង​សាង​សង់ពង្រីកព្រលានយន្តហោះខេត្តព្រះសីហនុ អោយ​ទៅ​ជា​ព្រលាន​យន្តហោះ​អន្តរជាតិ សំរេច​បាន ៧០ ភាគរយហើយ

គំរោង​សាង​សង់ពង្រីកព្រលានយន្តហោះខេត្តព្រះសីហនុ អោយ​ទៅ​ជា​ព្រលាន​យន្តហោះ​អន្តរជាតិ សំរេច​បាន ៧០ ភាគរយហើយ

ដោយៈ ទិន សុខាវុធ

គំរោង​សាងសង់​ពង្រីក​ព្រលាន​យន្តហោះ​នៅ​ខេត្ត​ព្រះ​សីហនុ អោយ​ទៅ​ជា​ព្រលាន​យន្តហោះ​ខ្នាត​អន្តរជាតិ ដែល​នឹង​អាច​អនុញ្ញាត​អោយ​យន្តហោះ​ធុន​ធំ​​ខ្នាត​អន្តរជាតិ ​ចុះ​ចត​នៅ​ទីនោះ​បាន ត្រូវ​បាន​សង់​រួចរាល់​​បាន​ប្រមាណ​ជា ៧០% ហើយ​។

លោក​ ជា អូន អ្នក​នាំ​ពាក្យ​របស់​អាជ្ញាធរ​អាកាស​ចរណ៍​ស៊ីវិល​កម្ពុជា បាន​ថ្លែង​អោយ​ដឹង​ថា រហូត​មក​ដល់​ពេល​បច្ចុប្បន្ន​នេះ ការ​សាងសង់​ពង្រីក​ព្រលាន​យន្តហោះ​នេះ ត្រូវ​បាន​​ធ្វើ​រួច​បាន​ប្រមាណ​ជា ៧០% ហើយ​​​​។ ​ជាលទ្ធផល នៅ​ពាក់​កណ្តាល​ឆ្នាំ ២០២០ ខាង​មុខ​នេះ ព្រលាន​យន្តហោះ​​នឹង​ត្រូវ​ដាក់​អោយ​ដំំណើរ​ការ​ជា​ស្ថាពរ​ ដែល​នៅ​ពេល​នោះ​យន្តហោះ​ធុន​ធំ​ខ្នាត​អន្តរជាតិ​ នឹង​​អាច​ចុះ​ចត​នៅ​លើ​​ព្រលាន​នោះ​បាន ដោយ​គ្មាន​បញ្ហា​អ្វី​ឡើយ​​។

អ្នក​នាំ​ពាក្យ​រូប​នេះ បាន​អោយ​ដឹង​ទៀត​ថា​នៅ​ពេល​សង់​រួច​ ផ្លូវ​ហោះ​ហើរ​របស់​ព្រលាន​នេះ​​នឹង​មាន​ប្រវែង​ ៣,៣០០ ម៉ែត្រ ដែល​ជា​កត្តា​ដ៏​សំខាន់​មួយអាច​អនុញ្ញាត​អោយ​យន្តហោះ​ធុន​ធំ​ចុះចត​និង​ហោះ​ឡើង​​​បាន​ទៅ​តាម​លក្ខណ​បច្ចេកទេស​​របស់​អាកាសចរណ៍​ស៊ីវិល​​​។ វា​ក៏​នឹង​ជា​កត្តាមួយ​ដែល​នឹង​ទាក់ទាញ​ភ្ញៀវ​ទេសចរណ៍​អន្តរជាតិ​អោយ​មក​កំសាន្ត​នៅ​ក្នុង​ខេត្ត​ព្រះសីហនុ អោយ​បាន​កាន់​តែ​ច្រើន​ឡើង​ៗ​ទៀត​​ដែរ​។

ទាក់ទង​នឹង​បញ្ហា​នេះ លោក គួច​ ចំរើន អភិបាល​ខេត្ត​ព្រះ​សីហនុ បាន​អោយ​ដឹង​កាល​ពី​ពេល​ថ្មី​ៗ​នេះ​ថា នៅ​ពេល​បច្ចុប្បន្ន​នេះ មាន​ជើង​ហោះ​ហើរ​របស់​ក្រុមហ៊ុន​អាកាសចរណ៍​ស៊ីវិល​ចំនួន ១៤ ក្រុមហ៊ុន​ ដែល​នៅ​ក្នុង​នោះ​មាន​ក្រុមហ៊ុន​ក្នុង​ស្រុក​ចំនួន ៥ និង​ក្រុមហ៊ុន​អន្តរជាតិ​ចំនួន ៩ បាន​នឹង​កំពុង​ភ្ជាប់​ជើ​ងហោះហើរ​ពី​ត្រង់​ពី​ក្រុង​ព្រះសហនុ​ទៅ​កាន់​ប្រទេស​វៀតណាម ម៉ាឡេស៊ី ថៃ ហ្វីលីពីន និង​ប្រទេស​ចិន ​​សរុប​ទាំងអស់​​មាន​ចំនួន​ ២៥ ទីក្រុង​៕

Related Articles