We TV Cambodia

ខ្សែ​បណ្តាញ​បញ្ជូន​ថាមពលអគ្គិសនី​ ១៩៥ ម៉េហ្គាវ៉ាត់​​ពី​ប្រទេស​ឡាវ ត្រូវ​បានតំលើង​រួច​រាល់​

ខ្សែ​បណ្តាញ​បញ្ជូន​ថាមពលអគ្គិសនី​ ១៩៥ ម៉េហ្គាវ៉ាត់​​ពី​ប្រទេស​ឡាវ ត្រូវ​បានតំលើង​រួច​រាល់​

ដោយៈ ទិន សុខាវុធ

ប្រព័ន្ធ​បញ្ជូន​ថាមពល​អគ្គិសនីចំនួន ១៩៥ មេហ្គាវ៉ាត់​ពី​ប្រទេស​ឡាវ ត្រូវ​បានតំលើង​និង​ត្រូវ​បានតភ្ជាប់​ទៅ​នឹង​ប្រព័ន្ធ​ខ្សែ​បណ្តាញ​បញ្ជូន​ចរន្ត​អគ្គិស​ជាតិ​របស់​កម្ពុជា​រួច​​ស្រេច​បាច់​អស់​​ហើយ​ ក្រោយ​ពី​​ទំនប់​វារីអគ្គិសនី​ Dan Sahong Dam នៅ​ក្នុង​ប្រទេស​ឡាវ​ត្រូវ​បាន​សង់​រួចរាល់​ និង​ត្រូវ​បាន​ដាក់​សាកល្បង​អោយ​ដំណើរការ​ នៅ​ពេលថ្មីៗ​នេះ​។

យោង​តាម​លោក Victor Jona អ្នក​នាំ​ពាក្យ​នៃ​​ក្រសួង​រ៉ែ​និងថាមពល ប្រព័ន្ធ​បញ្ជូនថាមពល​​អគ្គិសនី​នេះ​ គ្រាន់​តែ​​ត្រូវ​បានតភ្ជាប់​តែ​ប៉ុណ្ណោះ មិន​ទាន់​មាន​ដំណើរការ​នៅ​ឡើយ​ទេ​។ ហើយ​ការបញ្ជូន​ថាមពល​អគ្គិសនី​ពិត​ប្រាកដ នឹង​ត្រូវ​ធ្វើ​ឡើង​នៅ​ត្រី​មាស​​ទី​មួយ​​ក្នុង​ឆ្នាំ​នេះ នៅ​ពេល​ដែល​​កម្ពុជា​នឹង​ប្រកាស​ទី​ញ​ថាម​ពល​ពី​ប្រទេស​ឡាវ​ជា​ផ្លូវការ​។

យ៉ាងណាម៉ិញ នៅ​ពេល​ដែល​ការ​បញ្ជា​ទិញ​​ថាមពល​អគ្គិសនី​នឹងត្រូវ​ធ្វើ​ឡើង​ជាផ្លូវការ ថាម​ពលអគ្គិសនី​ចំនួន​ ១៩៥ មេហ្គាវ៉ាត់​​នឹង​ត្រូវ​បញ្ជូន​​មក​ពី​ប្រទេស​ឡាវ ក្នុង​តំលៃ​ $0.073 ក្នុង​មួយ​គីឡូវ៉ាត់​ម៉ោង​ ហើយ​វា​នឹងត្រូវ​តភ្ជាប់​ទៅ​នឹង​ខ្សែ​បណ្តាញ​បញ្ជូន​ចរន្ត​អគ្គិសនី​ជាតិ​ ដែល​ត្រូវ​បាន​សង់​ឡើង​ចាប់​ពី​ខេត្ត​ស្ទឺង​ត្រែង​ រហូត​មក​ដល់​ទីក្រុង​ភ្នំពេញ​។

មួយវិញទៀត ទំនប់វារីអគ្គិសនី Dan Sahong Dam ជា​គំរោង​វិនិយោគ​​មួយ​ មាន​តំលៃ​ជាទឹក​ប្រាក់ប្រមាណ​ជា $500 លាន​ដុល្លារ និង​ត្រូវ​បាន​​និង​កំពុង​វិនិយោគ​ដោយ​ក្រុមហ៊ុន​​ម៉ាឡេស៊ី Mega First Corporation Berhad​ ដែល​មាន​​ភាគ​ហ៊ុន​ចំនួន ៨០% និង​ក្រុមហ៊ុន EDL-Generation Public Company ដែល​មាន​ភាគហ៊ុន​ចំនួន ២០% ៕

Related Articles