ខេត្ដកែបបរាជ័យនឹងអាចទទួលបានភ្ញៀវទេសចរណ៍ ២លាននាក់  ព្រោះមេរោគកូវីដ១៩

វិស័យទេសចរណ៍ គឺជាវិស័យមួយដែលទទួលរងផលប៉ះពាល់យ៉ាងធ្ងន់ធ្ងរពីមេរោគកូវីដ១៩ នៅក្នុងប្រទេសកម្ពុជា។ តាមបណ្ដាខេត្ដនានា​ ក្នុងនោះ​ខេត្ដកែប ក៏ជាខេត្ដមួយត្រូវបានគេស្គាល់ថា មានតំបន់ទេសចរណ៍ យ៉ាងស្រស់ស្អាត ហើយអាចអូសទាញបានភ្ញៀវទេសចរណ៍រាប់រលាននាក់ ក្នុងមួយឆ្នាំៗប៉ុន្ដែដោយសារតែ ការរាតត្បាតនៃមេរោគ កូវីដ១៩ កំណើនភ្ញៀវទេសចរណ៍ ក្នុងខេត្ដនេះត្រូវបាន ធ្លាក់ចុះ ខុសពីការរំពឹងទុក។

ឯកឧត្តម កែន សត្ថា អភិបាល​ខេត្តកែប បានមានប្រសាសន៍ ក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងារខេត្តកែប បានឲ្យដឹងថា “ប្រជាជនខេត្ត​កែប​មានតែ ​៤,២ ម៉ឺននាក់ ចំណែកភ្ញៀវទេសចរ​មានដល់​ទៅ ១,៧លាននាក់ ហើយបើ​កុំតែកូវីដនេះ ខេត្តកែប​អាចទទួល​ទេសចរ​ចូលដល់​២លាន​ហើយឆ្នាំនេះ ព្រោះថាប្រជាជន​កំពុងតែ​ផ្តោត​ការយកចិត្ត​ទុកដាក់​ច្រើន​មកលើ​តំបន់​ឆ្នេរខ្សាច់​កម្សាន្ដ​នេះឯង”។

សម្រាប់ការវិនិយោគ វិញ ខេត្ដកែបមួយនេះ នៅមិនទាន់​មានការវិនិយោគ ពីវិនិយោគិន​បរទេស​នៅឡើយទេ ពោលគឹ មិនទាន់មាន​ការវិនិយោគ​ជាលក្ខណៈ​ទ្រង់ទ្រាយធំ​ គឺមានតែ​វិស័យ​ឯកជន​តូចៗ​នៅក្នុង​ស្រុកប៉ុណ្ណោះ។

លោកបានបន្ដទៀតថា សព្វថ្ងៃនេះ ខេត្ដកែប មានកោះ​ចំនួន១៣ ដោយកោះទន្សាយ និងកោះបូរណ៍ ជាកោះ​ដែលពេញ​និយមជាងគេ។ កោះទាំង១៣ បូកនិង​ឆ្នេរសមុទ្រ​ក្នុងខេត្ត​នេះប្រវែង​៣,៥គីឡូម៉ែត្រ​ផងនោះ ក្នុងមួយ​ឆ្នាំខេត្តនេះ អាចទាក់ទាញ​ទេសចរ​ដល់ទៅ ១,៧លាននាក់ ខណៈដែល​ចំនួន​ប្រជាជន​សរុបក្នុង​ខេត្តនេះ មានប្រមាណ​តែ ៤,២ម៉ឺននាក់ប៉ុណ្ណោះ។ ក្រៅពីសមុទ្រដ៏ស្រស់ស្អាត សម្រាប់ទាក់​ទាញ​ទេសចរ​ហើយ ខេត្តកែប​ក៏មានដំណាំ និងផលិតផល​មានសក្តានុពល​មួយចំនួន ដូចជា ម្រេច ទុរេន សាវម៉ាវ អំបិល ជាដើម ដែលបានជួយឲ្យ​ជីវភាព​ពលរដ្ឋ​ មានភាព​ប្រសើរឡើង​មួយកម្រិតថែមទៀត។

ដោយ៖ Stince