We TV Cambodia

ក្រុមហ៊ុន Royal Group បោះ​ទុន​$300 លានដុល្លារ វិនិយោគ​កោះរ៉ុង​​អោយ​ទៅ​ជា​ដែនកោះទេសចរណ៍

ក្រុមហ៊ុន Royal Group បោះ​ទុន​$300 លានដុល្លារ វិនិយោគ​កោះរ៉ុង​​អោយ​ទៅ​ជា​ដែនកោះទេសចរណ៍

ដោយៈ ទិន សុខាវុធ

ក្រុមហ៊ុន Royal Group របស់​លោក​ឧកញ៉ា គិត ម៉េង រួម​ដៃ​ជាមួយ​នឹង​ក្រុមហ៊ុន​ Royal Galaxy Group មក​ពី​ប្រទេស​ចិន បោះ​ទុន​វិនិយោគ​​​ប្រមាណ $300 លាន​ដុល្លារ ដើម្បី​អភិវឌ្ឍ​កោះ​រ៉ុង​ ក្នុង​ខេត្ត​ព្រះ​សីហនុ អោយ​ក្លាយ​ទៅ​ជា​ដែន​ដី​កោះ​នៃ​តំបន់ទេសចរណ៍​ដ៏​ល្អ​ប្រណិត​។

គំរោង​វិនិយោគ​នេះ ត្រូវ​បាន​ប្រកាស​ឡើងនៅ​ក្នុង​កម្មវិធី​ជួបជុំ​គ្នា​មួយ រវាង​អ្នក​ជំនួញ​ខ្មែរ​និង​ចិន កាល​ពី​សប្តាហ៍​មុន នៅ​ខេត្ត​ព្រះ​សីហនុ នៅក្រោម​វត្តមានរបស់​លោក​អភិបាល​ខេត្ត គួច ចំរើន ​។

ជាក់ស្តែង តាមរយៈ​គំរោង​វិនិយោគ​នេះ រមណីយដ្ឋាន​ឆ្នេរ​ខ្សាច់​លំហែ​កាយ​ដ៏​ល្អ​ប្រណិតមួយ នឹងត្រូវ​សង់​ឡើង ដោយ​នៅ​ក្បែ​រនោះ ក៏​នឹងមាន​សណ្ឋាគារ​លំដាប់​ផ្កាយ​ ៥ ដ៏​ទាន់សម័យ​មួយ​ដែរ​។ លើស​ពី​នេះ​ទៀត ទីកន្លែងកំសាន្ត​ជា​ច្រើន​តាម​បែបចិន​និងលោក​ខាង​លិច​ ក៏​នឹង​ត្រូវ​លេច​រូបរាង​ឡើង​ដែរ មាន​ដូចជា ក្លឹប​កំសាន្ត​ទូក ក្លឹប​សមុទ្រ ផ្សារ​ទំនើប ហាង​មួយ​ជា​ច្រើន​ និង​ផ្ទះ​វីឡា​ទំនើប​ជាង ៦០០ ខ្នង​ជាដើម​។

នៅ​ក្នុង​ឱកាស​ជួបជុំ​គ្នា​នោះ លោក​ឧកញ៉ា​ គិត ម៉េង បានគូស​បញ្ជាក់​ថា ទន្ទឹម​នឹងការសាងសង់​រមណីយដ្ឋាននិង​សណ្ឋាគារលំដាប់​អន្តរជាតិ ក្រុមហ៊ុន​របស់​លោក​និង​ក្រុមហ៊ុន​ដៃគូ ក៏​នឹងសាងសង់​កាស៊ីណូ​ជា​ច្រើន​ផងដែរ ក្នុង​គោលបំណងអភិវឌ្ឍកោះ​រ៉ុង​ អោយ​ក្លាយ​ទៅ​ជាដែន​កោះគំរូ​ដ៏​ល្អ​ប្រណិត សំរាប់​ប្រទេស​កម្ពុជា​។

ក្រុមហ៊ុន Royal Group បាន​ទទួល​សិទ្ធិ​អភិវឌ្ឍ​កោះ​រ៉ុង អោយ​ក្លាយ​ទៅ​ជា​ដែន​ដីកោះទេសចរណ៍​អន្តរជាតិ ពី​រាជរដ្ឋាភិបាល តាំង​ពី​ឆ្នាំ ២០០៨ មក​ម្លេះ​។ យ៉ាងណាម៉ិញ តាម​រយៈ​កិច្ចសន្យា​សម្បទាន​នេះ ក្រុមហ៊ុន​ក៏​មានគំរោង​សាងសង់​អាកាសយានដ្ឋាន​អន្តរជាតិ​មួយ​​នៅ​លើ​កោះនោះផង​ដែរ​៕

Related Articles