We TV Cambodia

ក្រុមហ៊ុន Minebea ជប៉ុនគ្រោងបង្កើនទំហំវិនិយោគអោយដល់ $400 លានដុល្លារនៅដំណាច់ឆ្នាំ ២០១៩ នេះ

ក្រុមហ៊ុន Minebea ជប៉ុនគ្រោងបង្កើនទំហំវិនិយោគអោយដល់ $400 លានដុល្លារនៅដំណាច់ឆ្នាំ ២០១៩ នេះ

រូបថតៈ សហការី

ដោយៈ
ទិន សុខាវុធ

ក្រុមហ៊ុន​
Minebea
ដែល​ជា​ក្រុមហ៊ុនដ៏​ធំ​​មួយ​មកពី​ប្រទេសជប៉ុន បានប្រកាស​ថា ក្រុមហ៊ុនមាន​គំរោង​បង្កើន​ទុន​វិនិយោគ​នៅកម្ពុជា
អោយ​កើនដល់ $400 លាន​ដុល្លារ នៅ​ដំណាច់​ឆ្នាំ ២០១៩ ខាងមុខ​នេះ​។

យោងតាម​ទំព័រ
Facebook របស់​លោក​នាយករដ្ឋមន្ត្រី​
ហ៊ុន សែន កាលពីថ្ងៃទី ១១ ខែ ធ្នូ ឆ្នាំ ២០១៩ កន្លងទៅ លោក Yoshihisa Kainuma
ប្រធាន​ក្រុមហ៊ុន​ជប៉ុន Minebea នៅ​កម្ពុជា
បានចូលជួប​លោកនាយករដ្ឋ​មន្ត្រី នៅឯវិមានសន្តិភាព ដើម្បី​សុំការគាំទ្រពី​លោក​នាយក​រដ្ឋ​មន្ត្រី​​។

នៅ​ក្នុង​ជំនួបនោះ
លោកប្រធានក្រុមហ៊ុន​បាន​លើកឡើងថា នៅ​ក្នុង​ឆ្នាំ ២០១៨ កន្លងទៅ​នេះ ទុន​វិនិយោគ​របស់​ក្រុមហ៊ុន​របស់​លោក​
បានកើនដល់​ប្រមាណជា $372 លានដុល្លារ​។ ហើយ​នៅ​ដំណាច់ឆ្នាំ ២០១៩
នេះ ទំហំទុនវិនិយោគរបស់​ក្រុមហ៊ុនរបស់​លោកនឹងកើនដល់​​ចំនួន $400
លាន​ដុល្លារ​។

លោក
Yoshihisa
Kainuma បានបន្ថែម​ទៀត​ថា នៅ​ពេលបច្ចុប្បន្ន​នេះ ក្រុមហ៊ុន​របស់​លោក​បាននិងកំពុង​ផលិត​
ម៉ូទ័រ ឧបករណ៍ក្មេងលេង និង អំពូល​ភ្លើង​វៃឆ្លាត ដែលត្រូវ​បិទ​ផ្លាកថា Made in Cambodia ហើយ​​ដែលត្រូវ​ដាក់​លក់​នៅ​កម្ពុជា
និង​នាំ​ចេញ​ទៅ​លក់​នៅ​ក្រៅ​ប្រទេស​។

លើស​ពី​នេះទៀត
យោងតាមលោកប្រធានក្រុមហ៊ុន រហូត​មកដល់សព្វថ្ងៃ​នេះ ក្រុមហ៊ុនរបស់លោកបានបង្កើត​ការងារចំនួន
៧,០០០ កន្លែង​ សំរាប់​កម្មករខ្មែរ​។ ហើយ​នៅ​ពេលអនាគតដ៏​ខ្លីខាង​មុខ​នេះ ក្រុមហ៊ុនរបស់​លោកនឹងបង្កើតការងារបន្ថែមទៀត
អោយ​កើនដល់​ចំនួន ២០,០០០ កន្លែង​។

យោង​តាម​លោក
Yoshihisa Kainuma ក្រុមហ៊ុន Minebea បានផលិតអំពូល​ភ្លើង​វៃឆ្លាតចំនួន ៦,៨៩២
អំពូល សំរាប់​បំពាក់​អោយ​រាជ​ធានី​ភ្នំពេញ និងខេត្តសៀមរាប​។
ចំណែកអំពូល​វៃ​ឆ្លាត​ចំនួន​ប្រមាណ​ជា ២០,០០០ ទៀត ត្រូវ​បាន​ក្រុមហ៊ុនផលិត​និង​នាំ​ចេញ​ទៅលក់នៅ​ប្រទេសជប៉ុន។
នៅ​ពេលខាង​មុខ​នេះ ក្រុមហ៊ុន​គ្រោង​នឹងផលិត​អំពូល​វៃ​ឆ្លាតចំនួន ២០,០០០ អំពូល​ទៀត
សំរាប់​នាំ​ចេញ​ទៅ​​បំពាក់អោយ​ទីក្រុង ហ៊ីរ៉ូស៊ីម៉ា ៕

ដោយឡែក​​នៅ​កម្ពុជា លោក​ប្រធានក្រុមហ៊ុន​បាន​សុំ​អោយ​លោក​នាយក​រដ្ឋ​មន្ត្រី ហ៊ុន សែន គាំទ្រផលិតផលអំពូល​ភ្លើង​វៃឆ្លាតផលិតដោយ​ក្រុមហ៊ុនរបស់លោក ដែលជា​ផលិត​ក្នុង​ស្រុក និង​ដែល​ជា​ផលិតផល​ជួយ​ការពារ​បរិស្ថាន និងជួយ​សន្សំ​សំចៃ​ការប្រើប្រាស់ប្រេងឥន្ទនៈ​និង​ចរន្តអគ្គិសនី៕

រូបថតៈ Facebook លោក​នាយករដ្ឋ​មន្ត្រី ហ៊ុន សែន

Related Articles