ដោយៈ ទិន សុខាវុធ
ក្រុមហ៊ុនយក្ស Microsoft បានលើកឡើងថា ពួកគេបានទទួលសិទ្ធិពីតុលាការអាមេរិកាំងហើយ ក្នងការរឹបអូសយកបណ្តាអាស័យដ្ឋានគេហទំព័រទាំងឡាយណា (domain) របស់ប្រទេសកូរ៉េខាងជើង ដែលជារបស់ពួកឧក្រិដ្ឋជនលើបណ្តាញ មានគោលដៅវាយប្រហារតាមបណ្តាញ Internet ទៅសកម្មជនសិទ្ធិមនុស្ស អ្នកស្រាវជ្រាវ និង ជនស្លូតត្រង់ដទៃទៀត។
យោងតាមទីភ្នាក់ងារសារព័ត៌មាន AFP ក្រុមហ៊់ុន Microsoft បានបរិយាយយ៉ាងលំអិតថា តុលាការអាមេរិកាំងបានអនុញ្ញាតអោយក្រុមហ៊ុនរបស់ពួកគេ រឹបអូសយកអាស័យដ្ឋានគេហទំព័ររបស់ពួកឧក្រិដ្ឋជនទាំងនោះចំនួន ៥០ អាស័យដ្ឋាន ដែលបានធ្វើប្រតិបត្តិការនៅលើបណ្តាញ Internet ដោយប្រើប្រាស់ឈ្មោះនិងផ្លាកសញ្ញារបស់ក្រុមហ៊ុន Microsoft ។
ក្រុមហ៊ុន Microsoft បានអោយដឹងទៀតថា ក្រុមប្រឆាំងឧក្រឹដ្ឋកម្មឌីជីតល់របស់ក្រុមហ៊ុន បានបើកការស៊ើបអង្កេត និងបានរកឃើញថា ក្រុមឧក្រឹដ្ឋជនឌីជីតល់មួយក្រុមរបស់ប្រទេសកូរ៉េខាងជើង ដែលមានឈ្មោះថា «Thallium» បានលួចក្លែងបន្លំអ៊ីមែលរបស់ពួកវា ថាជាអ៊ីមែលរបស់ក្រុមហ៊ុន Microsoft ដើម្បីទទួលបាននូវការទុកចិត្តពីអ្នកប្រើប្រាស់ Internet និងដែលអាចទទួលនូវពាក្យសំងាត់សំរាប់ចូលទៅក្នុងគណនីទាំងឡាយនៅលើបណ្តាញ Internet របស់ពួកអ្នកប្រើប្រាស់ទាំងនោះ៕
