We TV Cambodia

ក្រុមហ៊ុន KrisEnergy បើកការដ្ឋានសាងសង់ជើងទំរខ្នាតតូច បូមយកប្រេងចំនួន ៧,៥០០ ធុងក្នុងមួយថ្ងៃ នៅពាក់កណ្តាលឆ្នាំ ២០២០

ក្រុមហ៊ុន KrisEnergy បើកការដ្ឋានសាងសង់ជើងទំរខ្នាតតូច បូមយកប្រេងចំនួន ៧,៥០០ ធុងក្នុងមួយថ្ងៃ នៅពាក់កណ្តាលឆ្នាំ ២០២០

 
 

ដោយៈ ទិន សុខាវុធ

ជើងទំរបូម​ប្រេងកាត​ខ្នាតតូច​ដំបូង​គេ បាននិងកំពុង​ត្រូវ​សង់​ឡើងដោយ​ក្រុមហ៊ុន KrisEnergy ដើម្បីបូម​យក​ប្រេង​កាត​​ឆៅ​ចំនួន ៧,៥០០ ធុង​ក្នុង​មួយ​ថ្ងៃ ​ក្នុងតំបន់អប្សរា​នៃ​​ Block A នៅ​ពាក់កណ្តាលឆ្នាំ ២០២០ ខាង​មុខ​នេះ។

យោង​តាម​សេចក្តី​ប្រកាស​ព័ត៌មានរបស់​ក្រុមហ៊ុន KrisEnergy ចេញ​ផ្សាយ​នៅ​ថ្ងៃ​ទី ៩ ខែ ធ្នូ ឆ្នាំ ២០១៩ កន្លង​ទៅនេះ ពិធីសម្ពោធ​បើកការសាងសង់ជើងទំរនេះ ត្រូវ​បានធ្វើឡើងកាលពីថ្ងៃ​ទី ៦ ខែ ធ្នូ ឆ្នាំ ២០១៩ នៅលើកោះ​ Batam ក្នុង​ប្រទេសឥណ្ឌូនេស៊ី ក្រោម​អធិបតីភាព​ឯកឧត្តម ម៉េង សក្តិ​ធារ៉ា រដ្ឋលេខាធិការ​នៃ​ក្រសួង​រ៉ែ​និង​ថាមពល​របស់​​កម្ពុជា។

នៅពេល​ជើងទំរខ្នាតតូច​នេះ​ត្រូវ​សង់​រួច អណ្តូង​ប្រេង​កាត​​ចំនួន ៥ កន្លែង​នឹងត្រូវ​បូម​យក​​សារធាតុ​រ៉ែ​ប្រេង​កាត​ យក​ទៅ​ទុក​នៅ​ក្នុង​នាវា​ចំរាញ់យកប្រេង​កាត​ឆៅ​មួយ​មាន​ឈ្មោះថា Ingenium II​ ដែល​​នឹងចំរាញ់​យក​ប្រេងកាតឆៅ​ពី​សារធាតុវ៉ែ​ប្រេងកាតទាំងនោះ សំរាប់​អោយ​នាវា​ដឹក​ប្រេងកាតឆៅ​មួយ​ទៀត ដឹក​យក​ទៅ​រោងចក្រចំរាញ់ប្រេង​កាត​ឆៅ​​​នៅ​កន្លែង​ផ្សេង​ទៀត​។

យ៉ាងណា​ម៉ិញ នាវា​ចំរាញ់​ប្រេងកាត​ឆៅ​ Ingenium II នេះ​ត្រូវ​បាន​ធ្វើការ​​ជួសជុល​កែលំអ​​នៅ​ក្នុង​កំពង់ផែ Benoi របស់​ក្រុមហ៊ុន Keppel Shipyard នៃ​ប្រទេស​សិង្ហបុរី ​តាំង​ពីខែ វិច្ឆិកា ឆ្នាំ ២០១៨ មក​ម្លេះ​។ ជាលទ្ធផល នាវាផលិត​ប្រេងកាតឆៅ​មួយ​នេះ នឹងត្រូវ​ដាក់អោយ​ដំណើរការ​នៅដើមខែ មករា ឆ្នាំ ២០២០ ខាង​មុខ​នេះ​៕

រូបថតៈ សហការី

Related Articles