We TV Cambodia

ក្រុមហ៊ុនប្រេងនិងឧស្ម័ននៃប្រទេសអារ៉ាប់រួម កំពុងសិក្សា​ពី​ឳកាស​វិនិយោគ​ក្នុង​វិស័យរុករកប្រេងកាតនៅកម្ពុជា

ក្រុមហ៊ុនប្រេងនិងឧស្ម័ននៃប្រទេសអារ៉ាប់រួម កំពុងសិក្សា​ពី​ឳកាស​វិនិយោគ​ក្នុង​វិស័យរុករកប្រេងកាតនៅកម្ពុជា

ដោយៈ ទិន សុខាវុធ

ក្រុមហ៊ុនប្រេង​និង​ឧស្ម័ន Mubadala Petroleum មកពីប្រទេសអារ៉ាប់រួម កំពុង​ស្វែង​យល់​ពី​ឱកាស​វិនិយោគ​នៅ​ក្នុង​វិស័យ​អាជីវកម្ម​ប្រេងឥន្ទនៈ​នៅ​កម្ពុជា​។

យោង​តាម​លោក ជៀប សួរ ​​អគ្គនាយក ​នៃ​អគ្គនាយកដ្ឋាន​ប្រេង​កាត​​នៃ​ក្រសួង​រ៉ែ និង​ថាម​ពល ប្រទេស​អារ៉ាប់រួម​បាន​ចាប់​អារម្មណ៍ក្នុង​ការធ្វើអាជីវកម្ម ​រុករកប្រេង​កាត​​​ និង​ ការបង្កើតរោងចក្រចំរាញ់ប្រេង​នៅ​កម្ពុជា​។

លោក​បាន​បន្ថែម​ទៀត​ថា កម្ពុជា​​ចង់អោយ​ក្រុមហ៊ុន​​អារ៉ាប់រួម​មួយ​នេះ ​ធ្វើ​អាជីវកម្ម​ប្រេងឥន្ទនៈនៅ​កម្ពុជា ដោយ​ហេតុថា ពួក​គេមានបទពិសោធន៍​គ្រប់គ្រាន់ក្នុង​ការធ្វើអាជីវកម្ម​ប្រភេទ​​នេះ​។ ហើយ​នៅ​កម្ពុជា មានរ៉ែប្រេងកាតចំនួន ៤ ប្លក់ទៀត​នៅក្នុង​សមុទ្រ និង ១៤ ប្លក់​ទៀត​នៅលើដី​គោក ដែលត្រូវ​ធ្វើអាជីវកម្ម​​ទាញ​យក​ប្រេង​កាត។

ជាលទ្ធផល លោក ជៀប សួរ បានថ្លែង​អោយ​ដឹងទៀត​ថា ស្ថាប័នរបស់​លោក​នឹងបង្កើតក្រុមការងារ​មួយ ដើម្បី​ចូលរួម​សហការជជែកពិភាក្សា​​ជាមួយ​នឹងអ្នកជំនាញ​មកពីក្រុមហ៊ុនខាងលើនេះ ក្នុង​គោលបំណងធ្វើយ៉ាង​ណាអោយ​ពួកគេអាច​ឈានទៅ​ដល់ការដាក់ទុនវិនិយោគក្នុង​វិស័យ​ប្រេង​កាតនៅ​កម្ពុជា​។

គួរ​បញ្ជាក់​ថា ក្រុមហ៊ុន Mubadala Petroleum ជា​ក្រុមហ៊ុន​ប្រេង​និងឧស្ម័ន​គ្រប់គ្រងដោយ​រដ្ឋាភិបាលនៃប្រទេស​អារ៉ាប់​រួម​ ដែលរហូត​មក​ដល់ពេលបច្ចុប្បន្ន​នេះ បាននិង​កំពុង​ធ្វើអាជីវកម្មប្រេង​និងឧស្ម័ន​ នៅ​ក្នុង​ប្រទេស​ចំនួន​ ១០ នៅ​មជ្ឈិមបូព៌ា អាហ្វ្រិក​ខាងជើង និង​អាស៊ី​អាគេ្នយ៍​៕

ទាក់ទង​នឹងបញ្ហា​ប្រេង​និងឧស្ម័ន​នេះ ​ក្រុមហ៊ុន KrisEnergy មកពីប្រទេសសិង្ហបុរី បាន​​ធ្វើ​ពិធីសម្ពោធ​បើកការសាងសង់ជើងទំរបូម​ប្រេង​ខ្នាត​តូច​មួយ​នៅ​ក្នុង​សមុទ្រ​កម្ពុជា កាលពីថ្ងៃ​ទី ៦ ខែ ធ្នូ ឆ្នាំ ២០១៩ កន្លង​ទៅនេះ នៅលើកោះ​ Batam ក្នុង​ប្រទេសឥណ្ឌូនេស៊ី ក្រោម​អធិបតីភាព​ឯកឧត្តម ម៉េង សក្តិ​ធារ៉ា រដ្ឋលេខាធិការ​នៃ​ក្រសួង​រ៉ែ​និង​ថាមពល​របស់​​កម្ពុជា។

យោង​តាម​ក្រុមហ៊ុន KrisEnergy ជើងទំរបូម​ប្រេងកាត​ខ្នាតតូច​នេះ​ នឹង​អាច​បូម​យក​ប្រេង​កាត​​ឆៅ​ចំនួន ៧,៥០០ ធុង​ក្នុង​មួយ​ថ្ងៃ ​ក្នុងតំបន់អប្សរា​នៃ​​ Block A ​ស្ថិត​នៅ​ក្នុង​សមុទ្រ​កម្ពុជា នៅ​ពាក់កណ្តាលឆ្នាំ ២០២០ ខាង​មុខ​នេះ៕

Related Articles